12.03.2021

12.03.2021, फाल्गुन (फाल्गुन) गटॖ पछॖ (कृष्ण पक्ष) च़्वदह (देवादेव) (चतुर्दशी) (देवादेव) शॊकुरवार (शुक्रवार/ जुम्मा/भार्गवार) श्री सप्तर्षि सम्वत 5096, नक्षत्र शत, राश कुम्भ (चलान), ऋतु शिशर (चलान), द्रठॖपऻन्च़ुक (पंचक) (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ तॖ आय बत्तॖ। वुद्यूग करव मुकाम प्रावव

**************************

     महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वाहा स्वधा नमोस्तुते

**************************

            नुंदॖ रॆशॖन्य श्रुक्य

नफसय म्यान्ये च़ेरिवि अगो

दिच़मय दगो फ्वलहम नॖ ज़ात

मंद्यन्यन मूहिथ च़ॊलहम ठगो

हा सगौ पतॖ च़ॊलहम नॖ ज़ात

            अर्थात

नफसो खऻहिश छि च़ेरॖ कुल्यकिस अगस बराबर युस नॖ स्यठहाव टासव ति छु हरि हरि सपदान या गन्डस यिवान। यॊद नॖ यिम जवऻनी मंज़ कोबू यिन करनॖ यिम छि मॆथॖर बऺनिथ ज़न च़ूर फऺरिथ गछ़ान। यॆमि सॗत्य बुजरस मंज़ छु इन्सान पोन्टल तॖ पत्यॆथ सपदान

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

             *********

1. कऻश (Slice/Piece of)

2. कऻसिब (Artist/Artisan)

3. कऻसिद (Messenger/Courier/Envoy)

4. कऻयदॖ (Rule/Regulation/Maxim/Formula/System/Order)

5.कऻज़्य (Judge/Justice/Magistrate)

               मुहावरॖ

1. मु: नद्यऻरिस दॊगॖन्य द्यार

    अ: ग़रीबस द्वगनॖ ख़र्चॖ

2. मु: नबस सॗत्य गाडॖ बुज़िथ

         ख्यॆनि

    अ: पानस बराबर नॖ कांह

          मानुन, या, दाब दिन्य

3. मु: नब पंजन प्यठ रटुन

    अ: बहोदरी हॖन्द्य लाफ दिन्य

     (पनॖन्य शुर्य ह्यॆछॖनऻव्यूख)

**************************

पंचान्ग:- त्वहि सारिनी छु हेरच़ हुन्द पोश्तॖ। राथ ॴस सलाम। यि  शब्द सलाम आव कति प्यठॖ तॖ किथॖ पऻठ्य। अज़ ताम छि ॳस्य सऻरी अमि लफज़ुक इस्तिमाल करान आमॖत्य। सलाम लफॖज़ दपान छु उर्दू लफॖज़ तॖ ॳस्य छि पनॖनि माजि ज़्यॆवि मंज़ उर्दू लफज़न हुन्द इस्तिमाल कम ख्वतॖ कम करान या दपव न वनॖनस बराबर। बोज़नस मंज़ छु आमुत ज़ि यि सलाम लफॖज़ हेरच़ॖ द्वह पगाह वनॖनॖच प्रथा छ़ि त्रॆ हथ तॖ च़ोरव वऺर्यव प्यठॖ पकान आमॖच़ तॖ यि प्रथा छि वुन्युखताम चलान। अज़ छि व्हाटसापन प्यठ कॆंह म्यऻन्य ब्यॆनि बऻय यि सलाह दिवान ज़ि असि पज़ि नॖ हेरच़ पगाह सलाम लफज़ुक इस्तिमाल करुन। हऻरऻनी हॖन्ज़ कथ छि यि ज़ि अज़ क्याह ज़रूरथ प्यव असि अथ कथि प्यठ ग़ोर करनॖच तॖ यि सलह लूकन दिनॖच। अज़ ताम क्याज़ि प्यव नॖ कऻन्सि अथ कुन ज़्वन। सोंचनॖच कथ छि यि ति ज़ि अथ लफ़ज़स मंज़ क्याह छु त्युथ युथ सऻन्य बऻय ब्यॆनि अमि लफज़ुक इस्तिमाल करनॖस गुरेज़ करान छि। कांह जबान छा कऻन्सि हॖन्ज़ ज़ऻती जऻगीर बनिथ ह्यकान। क्याह कांह ज़बान वनॖनस छा कांह ठाख या पाबंदी आसान। हालांकि सलाम लफॖज़ छु कऻशुर लफ़ज़ॖय तॖ तवय छु म्यॆ बासान ज़ि सऻन्य ज़िठ्य आमॖत्य हतॖबद्यव वऺरियव प्यठॖ अज़ ताम ॴस बंद कऺरिथ तॖ यि मऻनिथ ज़ि यि लफॖज़ छु सानि ज़बऻन्य मंज़कुय अख लफॖज़। सलाम लफॖज़ कति प्यठॖ आव, हेरच़ प्यठॖय क्याज़ि आव वनॖनॖ। अथ प्यठ करव पगाह ब्रोंहकुन कथ। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव म्योन यि ॳज़्युक सबक़ podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)