09.03.2021

09.03.2021, फाल्गुन (फाल्गुन) गटॖ पछॖ (कृष्ण पक्ष) काह (देवादेव) (एकादशी) (देवादेव) बॊम्वार (मंगलवार) श्री सप्तर्षि सम्वत 5096 नक्षत्र उषा, राश मकर (चलान) ऋतु शिशर (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

       महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वाहा स्वधा नमोस्तुते

**************************

             नुंदॖ रॆशॖन्य श्रुक्य

पॊज़ यॊद बोज़ख पांछ़ नॊमुरख

नतॖ माज़ नॊमुरख स्वय छय नॆमाज़

शिवस तॖ शुन्यहस म्युल यॊद करख

सिदव स्वय छय दन्थर नॆमाज़

            अर्थात

हे प्वखतॖ इन्सानॖ श्रद्धायि रॊस शरीर रूप माज़ बनि दऺस्य नॆमाज़ छि बेमतलब, मगर यॆन्द्रिय शॆमरिथ नॆमाज़ छि बा-मकसद। यश दिनॖ वाजॆन्य नॆमाज़ गयि पयस सॗत्य लय सपदुन

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

           **********

1. क़ऻबिज़ (Possessor/Occupant/Seizing)

2. कऻबिल (Capable/Qualified/Competent)

3. कऻबिलॖ येतिबार (Worthy/Deserving/Trust worthy/Credible)

4. कऻबिलॖ ऐतराज़ (Objectionable)

5. कऻबिलॖ तऻरीफ (Praise worthy)

              मुहावरॖ

1. मु: न रगि हुन्द न दगि हुन्द

    अ: कऻन्सि हॖन्ज़ बन्दनदऻरी न

         आसॖन्य

2. मु: न च़रि हुन्द न हारि हुन्द

    अ: कुनि वॊजूदस मंज़ न

         आसुन

3. मु: न यज़तुक न बेज़ती हुन्द

    अ: बे-मन्दछ

         (पनॖन्य शुर्य ह्यॆछॖनऻव्यूख)

**************************

पंचान्ग:- अज़ छ़ि गाडॖ काह। कहावत छि ज़ि यिथॖ पऻठ्य बतुख छु नॖ ज़ांह अकि क़रारॖ बिहान तॖ छु बडॖ चंचल आसान, तिथय पऻठ्य छि गाड पऻनिस मंज़ नच़ान आसान तॖ चंचल आसान। अम्यसॖन्ज़ चंचलता छि दपान आमॖच़ मानॖनॖ इन्सान  सॖन्ज़ि मनच चंचलतायि बराबर। अवॖ म्वखॖ छि ॳज़्यकि द्वह गाड यिवान रनॖनॖ यानि मनॖच चंचलता रोज़ि कोबुहस मंज़। ब्यॆयि ति आसन शायद कॆंह कहावच़ॖ यथ दॊहस मुतलक यॆमि मूजूब ॳज़्यकिस दॊहस नाव प्यॊमुत छु गाडॖ काह। सु ति ननि वारॖ वारॖ। अख प्रथा ॴसमॖच़ छि अल्बतॖ ज़ि ॳज़्यकि द्वह ॴस्य कऻशिर्य बटॖ कऺशीरि मंज़ गाडॖ रनान। यि कथ ति प्यॆयि मानॖन ज़ि कऻशुर बटॖ ओस नॖ सनान ज़्यादॖ यिमन कथन कऺशीरि मंज़ मगर यनॖ ॳस्य आयि च़ऺलिथ कऺशीरि प्यठॖ, असि बडेयि ज़्यादॖ ज़्यादॖ उत्सुकता यानि यछ़ा यि ज़ानॖनॖ बापथ ज़ि कथ दॊहस क्याह महिमा छु। यि ज़ानॖनॖच कूशिश छि नऺव पुय करान ज़ि कुस द्वह क्याज़ि छि मनावान। अमि तलॖ छु ननान ज़ि गरन मंज़ छि व्वंय ह्यॆछनावन वाल्यन हॖन्ज़ व्यछ़य। क्वल ब्रह्मण आसनॖच प्रथा गऺयि कर ताम ख़तम यिम बड्यंन दॊहन मुतलक यॆज़मन वनान रोज़ान ॴस्य। पठिथ ब्रह्मणन हॖन्ज़ कऺमी छि अज़कल स्यठाह बासान। नक़ली ब्रह्मणन अथि कर्मॖकाण्ड करनावुन छु अमापॊज़ अख थ्वकॖ जोदाह तॖ ब्यॆयि नॖ कॆंह। तस्लीह छु नॖ यिवान तिहॖन्दि क्रियायि सॗत्य मगर चारॖ ति छु नॖ कॆंह। अल्बतॖ ज़ड कडनॖ बापथ छु कऻफी। कति तिम थदि पायिक ब्रह्मण यिमन महऻरियत ॴस आसान शास्त्रातॖच। व्वंय रूद सु अख स्वपनाह। संस्कृत नॖ तगान परुन, ह्यॆन्दि नॖ तगान समजुन, कऻशुर नॖ तगान वनुन। व्वंय छि चलावान कैसटव सॗती कऻम। वीडियोहन वुछ वुछ कऻम, न्यटस प्यठ वुछ्य वुछ्य कऻम तॖ पकनावान छि दक्कॖ दी दी यि कऻशिर्य संस्कृति तॖ संस्कारन हॖन्ज़ तॖ धर्मॖच वासॖकाकॖन्य गासॖ नाव। पगाह छु वागुर सुबहस बरुन तॖ शामस छि पूजा करॖन्य। हालांकि बाह छि ॳज़्य शामन लगान तॖ तमि मूजूब ह्यॆकिव तॊह्य अज़ शामन बाह लगनॖ पतॖ ति वागुर बऺरिथ। यछ़ा छि त्वहि पनॖन्य ज़ि यिथॖ पऻठ्य त्वहि पानस व्यस्तार यीय। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी। 

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव म्योन ॳज़्युक सबक़ podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)