22.03.2021

22.03.2021 फाल्गुन (फाल्गुन) ज़ूनॖ पछॖ (शुक्ल पक्ष) ॴठम (देवादेव) (अष्टमी) (देवादेव) च़ऺन्दॖरवार (सोमवार) श्री सप्तर्षि सम्वत 5096, नक्षत्र आर्द्र, राश मिथुन (चलान) ऋतु बसंत (चलान)...अज़ छि तीलॖ ॴठम ति

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

      महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

             नुंदॖ रॆशॖन्य श्रुक्य

कऻव्य खॆयि गूज कान सतॖतिस

पंथस मुरुन कन्दे

ब्रारि हुन्द लोलऺर प्यव क्वकर पूतिस

उतनॖ बलाय तुतिस द्वन्दै

           अर्थात

पनॖनि लक्ष्य निश यॊद इन्सान डलि, तस सपदि ब्रम तॖ ह्यॆयि ओरॖ योर थपॖ दिन्य। यिथॖ काव खॆयि गोजि कान, सतॖथ्य पूतिस मुरन कलॖ तिथ छि ब्रऻर पनॖन्य यड बरनॖ खऻतरॖ क्वकर पूतिस मऻरिथ ख्यवान। उतनि बलाय तुत लगुन छु द्वन्द संसारुक

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

             **********

1. खापॖर (Skull)

2. खातॖ (Account/A Day Book/A register/A ledger)

3. खाद (Manure)

4. खार (Blacksmith)

5. खारॖबाय (Blacksmith's wife/Lady blacksmith)

              मुहावरॖ

1. मु: ल्यख छा थ्वख ज़ि लऻरिथ

         गछ़ि

    अ: ल्यॆकि क्या खॊच़ुन, या, 

         बद कामि छॆनॖ वज़नदार

        आसान

2. मु: ल्यॆकी तुलुन तॖ ल्यॆकी 

         बॆहनावुन

    अ: कऻन्सि प्रथ विज़ि बेज़ती

         करॖन्य

3. मु: ल्यॆजि ति च़ूरॖय गजि ति

         च़ूरॖय

    अ: यॆलि सऻरी बे-ईमान आसन

       (पनॖन्य शुर्य ह्यॆछॖनऻव्यूख)

**************************

पंचान्ग:- तीलॖ ॴठम छि अज़। 1990-तॖ प्यठॖ वुन्यखताम यिम ति शुर्य सान्यन गरन मंज़ पऻदॖ सपद्यॆयि म्यॆ छु नॖ बासान तिमन सारिनी शुर्यन आसि पताह ज़ि ॳज़्युक यि द्वह याने तीलॖ ॴठम किथॖ पऻठ्य ॴस्य कऻशिर्य बटॖ कऺशीरि मंज़ मनावान। हालांकि कॆंच़न शुर्यन मा आसि वॊनॖमुत तिहॖन्द्यव ज़िठ्यव यथ दॊहस मुतलक मगर यॊत ताम नॖ सु शुर पानॖ मनावि यि द्वह असली अंदाज़स मंज़ तॊत ताम तरि नॖ तऺमिस फिकिरी यि तीलॖ ॴठम क्याज़ि, किथॖ पऻठ्य तॖ कथ छि वनान। यॊदवय द्वयत्रॖह वऺरी त्रऻव्य असि पथ कुन मगर यान्य यि द्वह यिवान छु हेरच़ पतॖ, कऺशीर छि ॳछन ब्रोंहकनि नज़र यिवान। याद छि तिम द्वह प्यवान यॆलि ॳस्य ॴस्य यारॖबलन प्यठ जमाह गछ़ान कांगरि ख्वर ह्यॆय ह्यॆय, क्रॆंजलि ख्वर ह्यॆय ह्यॆय तॖ तिमन मंज़ ह्वख गासॖ बऺर्य बऺर्य। गासॖव ज़ीठ रज़ ॴस यिवान बनावनॖ यॆमुक अख अंद ॴस्य गन्डान कांगरि या क्रॆंजलि ख्वरस तॖ रज़ि हुन्द दॊयिम अंद ओस रोज़ान चलावन वऻल्य सॖन्दिस अथन मंज़। गंदख तुजि सॗत्य ओस यिवान छ़ॖख दिनॖ अथ गासस युस बरनॖ ओस आसान आमुत कांगरि या क्रॆन्जलि ख्वरन मंज़। नारॖ ब्रॆह ॴस याम न्यॆरान तॖ यि शखॖस ओस नच़ॖनावान यि रज़ि गऺन्डिथ कांगरि ख्वर या क्रॆन्जलि ख्वर पनॖनिस कलस ॳन्द्य ॳन्द्य तॖ यि शखॖस ओस क्रकॖनाद लायाना तॖ वनान रोज़ान जतॗं तॗं जतॗं तॗं तऺथ्य वाज़ि सॗत्य य्यॊस आवाज़ दज़वॖनि कांग्रि या क्रॆन्जलि ख्वरॖ मंज़ॖ नेरान ॴस। ब्यॆयि ॴस्य अज़ च़ऻन्ग्य यिवान ज़ालनॖ तॖ तिमय व्यतस्तायि याने व्यथि मंज़ यिवान त्रावनॖ।  हे भगवान! क्याह नज़ारॖ ओस आसान। व्यथ ॴस च़ऻन्ग्य गाशॖ सॗत्य शोलॖ मारान। यिहऻय याद छि वुनि ति असि अंदॖर्य अंदॖर्य गतॖ ग्यूर तुलान मनस तॖ कऺशीर छि याद प्यवान फीर्य फीर्य। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

जे के विचार मंच संस्थायि तरफॖ यी युहुस नवरेह व्वत्सवस प्यठ त्र्यन दोहन हुन्द अख ख़ास प्रोग्राम मनावनॖ यथ नाव छु *त्रिवेणी*

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव म्योन यि ॳज़्युक सबक़

podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)