03.03.2021

03.03.2021, फाल्गुन (फाल्गुन) गटॖ पछॖ (कृष्ण पक्ष) पऻन्च़म (पऺचमी) ब्वदवार (बुद्धवार) श्री सप्तर्षि सम्वत 5096, नक्षत्र स्वाति, राश तुला (चलान), ऋतु शिशर (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

      महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वाहा स्वधा नमोस्तुते

**************************

            नुंदॖ रॆशॖन्य श्रुक्य

अल्लाह परनस दोरा फिर्यज़े

ज़गतॖच लादन स्वरिज़ि नॖ ज़ांह

यादस तिहॖन्दिस द्वह द्यन बऺर्यिज़े

ज़िन्दय ॴसिथ मऺर्यज़ि नॖ ज़ांह

              अर्थात

दय ज्ञान प्रावुन गव संसऻर्य कल मऺश्यरावॖन्य। दय सॖन्दिस यादस मंज़ कर अभ्यास। ख्यनॖ ख्यनॖ द्वह द्यन तिहॖन्दिस यादस मंज़ बरुन गव बे ख़ोफ़ सपदुन।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

              ********

1. फालतू (Extra/Spare/Surplus)

2. फान (Destruction/Waste)

3. फऻनी (Mortal/Transitory (world))

4. फऻयदॖ (Advantage/Benefit/Profit/Gain/Utility/Efficacy)

5. फतह (Victory/Conquest)

                 मुहावरॖ

1. मु: वऺरियस खऻरिथ वालनॖ 

         विज़ि दब

    अ: कॊरमुत क्रोवमुत रावरिथ

          छ़ुनुन

2. मु: वुरुन वुछतॖय गछ़ि ख्वर

         वाहरावुन

    अ: आमदनी मुतऻबिक गछ़ि 

          खर्च करुन

3. मु: विज़ि विज़ि छि पोश 

         फ्वलान

    अ: प्रथ कुनि छु पनुन वख

         आसान,या, वख्तॖच क़दॖर

       (पनॖन्य शुर्य ह्यॆछॖनऻव्यूख)

**************************

पंचान्ग:- कऻशिर्य बटॖ छि कम अज़ कम सऻरी शिव व्वपासक यिवान मानॖनॖ। शिव नाथन ति छि कऺशीरि मंज़ ब्यॊन ब्यॊन जायन पनॖन्य स्थापना कऺरमॖच़ याने अमरनाथ ग्वफाय मंज़, हरिश्वरॖ, सर्यश्वरॖ, द्येन्यश्वर, गंगॖ जटन, महादेवॖ, गंगबल, गंगोत्री, शंकराचार्य वगैरा वगैरा। मगर अथ सॗत्य सॗत्य छि ॳस्य मातायि हॖन्द्य ति व्वपासक। माता याने रऻज्ञन्या तुलॖमुलि याने क्षीर भवऻनी, शारिका च़ऺक्रीश्वरॖ याने पर्बतॖ, ज़्वाला जी ख्रॖवि, ज़िष्टा देवी ज़ीठ्यऻरॖ, भद्रकऻली वऺड्यपोरि वगैरा। अमि अलावॖ छि ॳस्य आमॖत्य पूज़ान लक्ष्मी, सरस्वती, पार्वती, महाकऻली वगैरा वगैरा। यॆत्यन छु यि वनुन म्यॆ ज़ि वऺरियस मंज़ प्रथ ज़ूनॖ पछॖ ॴठम ओस मातयि हुन्द दरबार लगान तुलॖमुलिस मंज़ तॖ च़क्रीश्वरॖ। लूख ॴस्य तुलमुल डूंगन मंज़ ति गछ़ान रोज़ान। हवन ओस यिवान करनॖ। ज़्यॆठॖ ॴठम  द्वह ओस ख़ास मेलॖ लगान तुलमुलिस मंज़। हालांकि ज्यॆमिस मंज़ ति छु मातायि हुन्द स्थान याने वैष्णव माता मगर अज़ छि ॳस्य वुनि कशीरि हॖन्ज़ कथ करान। ॳस्य छि अमि अलावॖ कृष्णॖ भगवानस ति पूज़ा अर्चना करान रोज़ान। ज़र्मॖसतम द्वह छु असि कऻशिर्य बटन हॗन्दि बापथ आसान बॊड द्वह। गणपत जियस छि ग्वडन्यथ पूज़ान यॆलि कुनि ति कामि ग्वड दिवान छि अदॖ छि ॳस्य बाक़ी दीवी दीवताहन पूज़ान रोज़ान। अगर वुछव तॖ कऻशुर बटॖ छु प्रथ जायि पनुन कलॖ नॊमरावान रोज़ान। सु पीर बाबा ॴस्यतन, म्वकदम सऻबुन ॴस्यतन या अजमीर शरीफ  ॴस्तन या च़्रारि शरीफ ॴस्यतन। गाह सु गुरुद्वार आसि या सु चऺर्च आसि ॳस्य छि प्रथ धर्मस मंज़ आस्था थवान। ॳस्य छि साधु संतन मंज़ ति यछ़ तॖ पछ़ बऺरिथ पकान। यि छि बटसॖन्ज़ यछ़ तॖ पछ़ॖय यॆमि ज़ोरॖ सॗत्य छु यि कऻशुर बटॖ कमव कमव ब्रकव तलॖ नीरिथ पनॖन्य ख्वरन प्यठॖ खड़ा रूज़िथ तॖ मस्तक पनुन थॊद थऺविथ पकान। म्यॆ छु बासान ज़ि सोनुय समाज छु वऻहिद अख समाज त्युथ युस प्रथ धर्मस आमुत छु थज़रस प्यठ थवान। हेरथ छि यिनॖ वाज्यन। न छु हारन गिन्दुन कुनि तॖ न छु तासस गिन्दुन कुनि मगर व्वतस्वुक वलवलॖ छु बरक़रार। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक यि म्योन सबक़ podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)