29.03.2021

29.03.2021, च़िथ्थॖर (चैत्र) गटॖ पछॖ (कृष्ण पक्ष) ऒक्दॊह (प्रथमा) च़ऺन्दॖरवार (सोमवार), श्री सप्तर्षि सम्वत 5096, नक्षत्र हस्त, राश तुला (रऻच़ हॖन्ज़ॖ 1.41 बजि प्यठॖ) ऋतु बसंत (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

      महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

       नुंदॖ रॆशॖन्य श्रुक्य

ज़िकरि सॗती रटुन माले

फिकरी सॗती तारुस पुन

नफ़स गन्ड मालि हाले हाले

ज़न तोरुथ म्वख्तॖ माले पन

            अर्थात

ज़िकरि हॖन्ज़ ज़ितिन्य ज़ॆवरिथ गछ़ि फिकरी हॖन्दि चिलॖ सॗत्य प्वख्तॖ कऺरिथ पनुन ध्यान यादि दयस कुन पूरॖ लागुन। अमलि मंज़ अनान अनान गछ़न नफसी खऻहिशि वारॖ वारॖ तिथॖ पऻठ्य गन्डॖ रटॖन्य, यिथकऺन्य म्वख्तस पन तऻरिथ मालॖ छि बनावान। याने शाह रूप थावन गछ़न ज़िकरि तॖ फिकरि रूप म्वख्तॖ मालॖ दयस नऻल्य त्रावनि।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

            ***********

1. गाटॖ (Deficit/Deficiency/Damage)

2. गाटॖ आसुन (To be at loss)

3. गाटॖजार (Wisdom/Intelligence/Wit/Knowledge)

4. गाटॖ द्युन (To advice/To instruct/To guide/To educate)

5. गाटुल (Intelligent/Wise/Talented)

               मुहावरॖ

1. मु: गऺह्यर्यून्ज़

    अ: सु शखॖस युस बऺल्य वऺथ्य

          वऺथ्य आसि गछ़ान, या,

          लॊत शखॖस

2. मु: ग्यव ख्यवानॖय छॆ नॖ गर्दन

         म्वटान

    अ: कांह कऻम कऺरिथ छु 

          तम्युक नऺतीजि नेरनस वख

          लगान

3. मु: ग्यॆलि ग्यॆलि छि कांह ग्यल

         स्यॆज़ गछ़ान

    अ: लगातार कूशिश करनॖ 

         सॗत्य छु स्यज़र गछ़ान

      (पनॖन्य शुर्य ह्यॆछॖनऻव्यूख)

**************************

पंचान्ग:- विजयेश्वर पंचान्ग याने जंत्री मंज़ ओस होल्य हुन्द त्योहार राथ हावनॖ आमुत मगर यॆमिस ति म्यॆ मुबारक कॊर तऺम्य वॊन म्यॆ ज़ि हूल्य छि पगाह याने अज़। म्यॆ तॊर नॖ फिकरि ज़ि अगर हूल्य पगाह छि त्यॆलि किथॖ पऻठ्य छि सानि जंत्री मंज़ राथ हऻवमॖच़ हुल्य। अगर जंत्री मूजूब राथ ॴसमॖच़ छि हूल्य त्यॆलि क्याज़ि छि म्यानि बरादऺरी हॖन्द्य लूख दपान ज़ि अज़ छि हूल्य। ओरॖ योर प्रॖछ़गऻर करनॖ पतॖ नन्योम ज़ि राथ ॴस न हूल्य बऺल्कि होलिका दहन याने ल्वकॖट हूल्य। म्यॆ छु याद प्यवान ज़ि यॆलि बॖ कानपुरॖ ऒसुस ततिक लूख आस्य मनावान यि होलि हुन्द त्योहार करीबन सतन दॊहन लगातार तॖ पऺत्यमि द्वह ओस आसान तिमन गंगा गाठस प्यठ होली मिलन तॖ अदॖ ओस वातान यथ त्योहारस अंद। मगर यॊताम म्यॆ ज़्वन छु ज़ि कऻशिर बटॖ ॴस्य कऺशीरि मंज़ अकी द्वह हूल्य मनावान। मगर 1990-तॖ पतॖ ह्यॆतिन ॳस्य रलन बाकी जायन मंज़ रोज़न वाल्यन लुकन सॗत्य तॖ ह्यॊत असि ति ती करुन यि तिम रूद्य करान। गाह सु करवा चौथ छु, या भाई दूज छु, या सु धन तेरस छु या तीज त्योहार छु। ॶसि ह्यॊत वैलनटायन द्वह ति मनावुन तॖ क्रॖसमॖस द्वह ति मनावुन। अगर त्वहि याद आसि यिमन सारिनॖय त्योहारन हॖन्ज़ ब्वयी ॴस नॖ असि कऻशर्यन कऺशीरि मंज़ रूज़िथ। यिमन त्योहारन वॊल असि नाल बालॖ यपोर तरनॖ पतय। लॊहरी ति छि ॳस्य व्वंय मनावान। मगर तऻज्यबॖच कथ छि यि ज़ि सान्यव पनॖन्यव त्योहारव मंज़ॗ छु नॖ कांह अख ति त्योहार बाक़ी ज़ऻच़ हॖन्द्यव लूकव पानॖनोवमुत। न गाडॖ बतॖय, न ख्यॆच़ि मावसॖय। ज़ानि दय क्याह कऺशिश छि तिहॖन्द्यन त्योहारन यीच़ ज़ि ॳस्य गऺयि तूर्य कुन तॖ पनॖन्य थऺव्य यूर्यकुन। असि गव यि हाल ज़ि पनॖनि माजि ज़्यवि मंज़ कथ करनस छि गछ़ान असि गाल। पनॖन्य त्योहार ह्यॆत्य असि लबि ताकस थवॖन्य तॖ पर-ज़ऻच़ त्योहारन ह्यॊत असि ल्वलॖमतॖलाय करुन। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

12,13 तॖ 14 अप्रैल 2021 छु *त्रिवेणी* प्रोग्राम जे के विचार मंच संस्थायि तरफॖ। तॊह्य ति कऺरिव शिरकत

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव ॳज़्युक यि म्योन सबक़

podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)