30.03.2021

30.03.2021, च़िथ्थॖर (चैत्र) गटॖ पछॖ (कृष्ण पक्ष) द्वय (देवादेव) (द्विती) (देवादेव) बॊम्वार (मंगलवार) श्री सप्तर्षि सम्वत 5096, नक्षत्र चित्र, राश तुला (चलान),ऋतु बसंत (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

      महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

           नुंदॖ रॆशॖन्य श्रुक्य

शिव छुय ज़ऻव्युल ज़ाल वऻहरिथ

तिय छुय मरुन तिर्थ कथ

ज़िंदॖ नय मरख अदॖ कवॖ ज़ि मऺरिथ

पानॖ मंज़ॖ पान कड व्यच़ऻरिथ कथ

               अर्थात

शिव छुनॖ बोज़नॖ यिनॖवोल, मगर ॳस्य सऻरी छि तऺस्य मंज़ बऺसिथ। यॊद च़ॖ च़ेनख तॆलि छुय नॖ कुनि तीर्थस प्यठ गछ़नुय। च़िह च़िह सु पानस सॗत्य बासनऻविथ मरख ज़िन्दय। तिक्याज़ि यॊद सु पानस सॗत्य थवॖहन, च्यानि दऺस्य गछ़ि नॖ ग़लत किहिन्य मगर यिछ़ अमल छि स्यठा मुश्किल। वारॖ वारॖ छु आदत गछ़ान तॖ इन्सान छु प्वख्तॖ बनान। अथ प्यठ व्यच़ार कऺरिथ ह्यकख पनुन पान प्रज़नऻविथ पानसॖय मंज़ दय लऺबिथ।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

            **********

1. गाठ (River bank/Bathing place)

2. गाड (Fish)

3. गार्ड (Guard/Security man)

4. गाडॖ बत्तॖ (Fish and rice)

5. गाडॖ तील (Cod liver oil)

                  मुहावरॖ

1. मु: ग्यवस तॖ कनहऻपिनि रॖश

    अ: पानॖवॖन्य सख वऻर

2. मु: ग्यवहऻ तॖ ग्यव ख्यव ब्रार्यव

    अ: बहानॖ बऻज़ी कऺरिथ कामि

         च़ूर बनुन

3. मु: ग्यव ख्यवान तॖ गर्दनि कुन

         अथॖ लागान

    अ: वुतावली हावॖन्य, या, कूनि

         तर न्यॆरनस ति गछ़ि वखॖथ

         द्युन

       (पनॖन्य शुर्य ह्यॆछॖनऻव्यूख)

**************************

पंचान्ग:- वुनि गऺयि कॆंह दुहुय जे के विचार मंच संस्थायि कऺर ब्यॆयि अख पहल यि वछनॖ बापथ ज़ि सानि समाजिक शुर्य कथ हदस ताम छि ह्यकान पनॖनि माजि ज़्यॆवि मंज़ कथ बाथ कऺरिथ। असि कऺर वुछनॖच यि कूशिश ति ज़ि वुछव यिमन शुर्यन कोताह छु पताह कॆंच़न चीजन हुन्द नाव कऻशिर्य ज़बऻन्य मंज़। यि वऺनिथ छुस बॖ ख्वश गछ़ान ज़ि सऻन्य शुर्य यिम व्यलायतस मंज़ बिहिथ छि तिम ति छि कऻशिर ज़बऻन्य मंज़ कथ करान रोज़ान मगर व्यछ़य अगर छि तॖ सॊ छि ह्यॆछनावन वाल्यन हॖन्ज़। याने मोल मऻज्य या नान्य बुड्यबब छुनॖ कॆंच़न जायन यि व्यछ़य दूर करनॖच कूशिश करान। नतीजि छु नेरान यि ज़ि शुर यॊदवय यछ़ान ति छु मगर छुनॖ ह्यकान पनॖनि यछ़ायि मंज़ पूरॖ वुतॖरिथ। बॖ छुसुय छुस पनॖन्यन शुर्यन यि कऺमी पूर करनॖच कूशिश करान पनॖनि मोबाईलॖ दऺस्य या ब्यॆयि कुनि वऺतीरॖ, म्यॆ सॖत्य सॗत्य छि कॆंह म्यऻन बऻय या म्यानि ब्यॆनि वतनॖक्यन कॆंच़न जायव प्यठॖ तॖ वतनॖ न्यबर ति कॆंच़व जायव प्यठॖ यि कूशिश जऻरी थविथ मगर अशद ज़रूरत छि मऻलिस माजि, नानि बुड्यबब सॖन्ज़ भाग्यदऻरी। तिम ज़ऻनिन यि पनॖन्य ख़ास ज़िम्वऻरी पनॖन्यन शुर्यन पनॖनि माजि ज़्यॆवि सॗत्य जुडिथ थवनॖच। पनॖन्यन बदनॖक्यन ॳगन हॖन्द्य नाव कऻशिर्य पऻठ्य, गरस मंज़ रोज़मराक्यन चीज़न हॖन्द्य नाव कऻशिर्य ज़बऻन्य मंज़, पलवन दलवन हॗन्द्य नाव, बानन बठन हॖन्द्य नाव वगैरा वगैरा। सॗती छि यि ज़िम्वारी ति तिमन प्यठ ॴयिद सपदान ज़ि तिम ह्यॆछनाविन परुन तॖ लेखुन देवनागिरीयस मंज़ कऻशुर ताकि सऻनिस अदबस याने साहित्यस मेलि कांह रऺछ़रावनवोल। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

*त्रिवेणी* सम्पर्क कऺरिव मो्नo 9419110310/9419137163  प्रोग्रामस मंज़ शिरकत करनॖ बापथ

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव ॳज़्युक यि म्योन सबक़

podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठ ति)