01.04.2021

01.04.2021 च़िथ्थॖर (चैत्र/चैत) गटॖ पछॖ (कृष्ण पक्ष) च़ोरम (देवादेव) (चतुर्थी) (देवादेव) ब्रसवार (ब्रहस्पतिवार/गुरुवार/वीरवार),श्री सप्तर्षि सम्वत 5096, नक्षत्र विशा, राश वृश्चिक (चलान) ऋतु बसंत (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

*************************

       महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

           नुंदॖ रॆशॖन्य श्रुक्य

नफॖस छुय वनुक अगॖ ज़ोलो

नेरॆस नॖ पॆंट कुट मंज़ोंलो

यॆम्य च़ॊट ॳनिथ गजि ज़ोलो

तमी शरह मुहम्मद पोलो

            अर्थात

नफॖस छु वनचि लऺकरि हुन्द अग। न यियि चीरनॖ न नेरॆस कांह लागिकार पॆंट, कूट नॖ मंज़ुल मगर यॆम्य ब्वज़ॖवानन यि च़ऺटिथ ऒन तॖ ज़ॊलुन गजि तिम छि हज़रत मुहम्मद सऻबुन शरह पऻलिथ ब्रोंहकुन पकान। तिथय पऻठ्य युस नफसस ततॖ गन्ड कऺरिथ पनुन अज्ञान ज्ञानॖ नारस मंज़ ज़ालि तस मेलि ज़िन्दगी ज़ुवॖनॖय आसान वथ।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

            *********

1. गासॖ बनॖ (Heap of grass)

2. गाश (Light/Lustre/Sunshine)

3. गाशॖ रॊस (Blind/Dark)

4. गाश युन (To be dawn)

5. गाशॖर (Lovely/Elegant)

               मुहावरॖ

1. मु: ग्वसऻन्य गऺडवॖ

    अ: बेछॖवुन

2. मु: ग्वसऻन्य त्वमुल

    अ: वारियाह कॖसमॖक्यन 

         चीज़न हुन्द रल

3. मु: गोंछ़ि ॴस पतॖ ख़ोस

    अ: प्रथ कांह चीज़ छु पनॖनि

         अनॖवारि सपदान

      (पनॖन्य शुर्य ह्यॆछॖनऻव्यूख)

**************************

पंचान्ग:- राथ वुछ्य असि पनॖनि शरीरक्यन कॆंच़न अंगन हॖन्द्य नाव कऻशिर्य ज़बऻन्य मंज़। अज़ पकव तमि ब्रोंहकुन - नऺर (बाज़ू) ख्वनॖवठ (कोहनी) हॏच़ (कलाई) अथॖ (हाथ) न्यॊठ (अंगूठा) ऒंंगजि (उंगलियां) किस (छोटी उंगली) नम (नाखून) सीनॖ (छाती) यड (पेट) तून (नाभी) हॊल (कमर) थर (पीठ) लंग (जांघ) ज़ंग (टांग) रोंख (नितंब) कॊठ (घुटना) ग्वड (टखना) खूर (एडी) ख्वर (पैर) तलपॊत (पैर का तलवा) ख्वर ऒंगजि (पांव का पंजा)- म्यऻन्य व्यनती छि त्वहि सारिनी ज़ि पनॖन्यन शुर्यन करनऻविव ज़ान यिमन अंगन सॗत्य कऻशिर्य ज़बऻन्य मंज़। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

*************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

    नऺविव तॖ फॊलिव

  भूषण कौल "दीप"

(बूज़िव ॳज़्युक यि म्योन सबक़

podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)