02.04.2021

02.04.2021 च़िथ्थॖर (चैत्र/चैत) गटॖ पछॖ (कृष्ण पक्ष) पऻन्च़म (देवादेव) (पऺचमी) (देवादेव) शॊकुरवार (शुक्रवार/जुम्मा/ भार्गवार),श्री सप्तर्षि सम्वत 5096, नक्षत्र ज्येष्ठ, राश धनु (रऻच़ हॖन्ज़ॖ 3.43 बजि प्यठॖ)ऋतु बसंत (चलान)...चूंकि पगाह छि शॆयम (षष्ठी) रावान पगहुक वॊहरवोद यी ॳज़्य याने पऻन्च़म (पऺचमी) दुहुय

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

      महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वाहा स्वधा नमोस्तुते

**************************

            नुंदॖ रॆशॖन्य श्रुक्य

कऻल्य बुथि वसनम नालॖमॊत ह्यनम

ग्रशन अमलॖ तॖ क्या चॊन नाव

छ़टि तॖ गटे ॳशदर वसनम

क्वस म्येन्य अमल तॖ क्या म्योन नाव

            अर्थात

ॴखरतस प्यठ यॆलि हिसाब लगि, मलख रटनम ग्वडॖ नालॖ पतॖ प्रॖछ़नम नाव तॖ करनम प्रॖछ़गऻर अमलि मुतलिख। अमिपतॖ तूर्य तथ वावहालि अनिगटि कूठरि मंज़ वसनम अशदर। यिम वुछिथॖय अमलि तॖ नावस कुनी गॆड कऺरिथ करनम टकसूर

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

            *********

1. गागॖर (Metallic pitcher)

2. गालुन (To dissolve/To melt/To kill)

3. गाम (Village)

4. गऻमी (Villager)

5. गान (Cowshed)

               मुहावरॖ

1. मु: गोंछ़ि मथुन सॊम्ब

    अ: स्यठाह कम

2. मु: गोलि लायक़

    अ: बे-आर

3. मु: गूर्य हखुर

    अ: चोर, या, बेवकूफ, या, 

          नादान

   (पनॖन्य शुर्य ह्यॆछॖनऻव्यूख)

**************************

पंचान्ग:- राथ वुछ्य असि पनॖनि शरीरक्यन अंगन हॖन्द्य नाव कऻशिर्य ज़बऻन्य मंज़। यिम शुर्य कऺशीरि न्यबर आयि ज़न्मस 1990-तॖ प्यठॖ वुन्युखताम तिहॖन्ज़ वऻन्स वऻच़ वारॖकार त्रॖहि वुहॖर्य ह्यॊर मगर तिमव शुर्यब  मंज़ॖ आसन वारियाह तिम शुर्य यिमन नॖ मोकॖ आसि म्यूलमुत कऺशीरि गछ़नुक तॖ तति पनॖन्य जाय वुछनुक। तिमन शायद आसि नॖ यिति ख़बर ज़ि कऺशीरि मंज़ आसॖ बजि बजि लरि आसान यिमन मंज़ तिहॖन्द्य मोल मऻज्य, नान्य बुड्यबब रोज़ान ॴस्य। यिम शुर्य आयि यॆति यानि कऺशीरि न्यबर कुनि ति जायि सिरिफ फ्लैटन मंज़ॖय रोज़ान। हालांकि ज्यॆमिस मंज़ छि कॆंच़व लूकव लरि बनाविमच़ॖ मगर तिम लरि करन नॖ मान मान कऺशीरि मंज़क्यन लर्यन सॗत्य। ज्यॆमि योर कुन  ति छु कॆंच़व लूकव मकानॖ बनऻव्यमॖत्य यिम फ्लैटन निशि स्यठाह ब्यॊन छि मगर तिमन मकानन हुन्द आकार ति छु नॖ मेल ख्यवान कऺशीरिक्यन मकानन सॗत्य। यिमन शुर्यन छि पताह ज़ि यिम फ्लैट छि अंग्रीज़ नावॖ सॗती ज़ानॖन या परज़ॖनावनॖ यिवान। मसलन टू ब्यडरूम या टू बी एस के, या थ्री बी एच के, या स्यूट वगैरा वगैरा। टु या थ्री बी एच के फ्लैटन मंज़ छि आसान ज़ॖ या त्रॆ ब्यड रूम, अख हाल तॖ किचन। अमि अलावॖ छु आसान बाथ रूम, बालकऻनी तॖ गैलैरी। ब्यॆयि छु आसान कुनुय कोरीडार यथ प्यठ कॆंच़न फ्लैटन  हॖन्द्य दरवाज़ॖ छि खुलान। यिमन फ्लैटन मंज़ छु आसान ब्यड रूम तॖ किचन अलावॖ ड्राईंग रूम, स्टडी रूम, सऺरवन्ट रुम, किड्स रूम, ल्वाबी, मास्टर ब्यड रूम, ग्यस्ट रूम। यिम सऻरी नाव छि अंग्रीज़ ज़बऻन्य मंज़ॖय ज़ानॖनॖ यिवान। मगर कऺशीरि मंज़क्यन मकानन मंज़ क्या क्या छु आसान पगाह वुछव वारॖकारॖ। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

  भूषण कौल "दीप"

(बूज़िव ॳज़्युक यि म्योन सबक़

podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)