14.04.2021

14.04.2021,च़िथ्थॖर (चैत्र/चैत ज़ूनॖ पछॖ (शुक्ल पक्ष) द्वय(देवादेव) (द्विती) (देवादेव) ब्वदवार (बुद्धवार) श्री सप्तर्षि सम्वत 5097, नक्षत्र भरण, राश वृष (रऻच़ हॖन्ज़ॖ 12.10 बजि प्यठॖ), ऋतु बसंत (चलान), नवरात्र (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

     महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वाहा स्वधा नमोस्तुते

**************************

         नुंदॖ रॆशॖन्य श्रुक्य

नफसॖय मन मऺच़रावी

मेठि तॖ ज़ेठि पुछ़े

तवय उलग तॖ पुलग रावी

कुनि नतॖ कवॖ मालि पुछ़े

           अर्थात

हतो मालि कमि खऻतरॖ छुख नॖ यि नफ़स गंडॖ रटान। नफ़स तुलनावी व्वटॖ मनस, मेठि तॖ ज़ेठि ख्यनॖ बापथ। यॆमि सॗत्य बेमतलब यॆरिलूक्य तॖ परिलूकुक स्वख गछ़ी अथॖ।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

             *********

1. माखज़ (Source)

2. मादॖ (Female)

3. नर (Male)

4. मऻदियथ (Materialism)

5. मादॖपरस्त (Materialistic)

              मुहावरॖ

1. मु: कॖहरिस सॗत्य गरॖ किथॖ

         कऺन्य कॊरुथ, यी दॊपनम

         ती कॊरुम

    अ: वुल्टॖ शख़सस सॗत्य कऻम

          करनुक तऺरीकॖ छु यी ज़ि 

          तसुन्दुय बोज़ुन हमेशॖ

2. मु: कॊवोक कत्यु, मॆहरनि 

         मॊंडि पतॖ कनि

    अ: यस ज़्यव ख़राब आसि सु

          छु स्यठाह एहतियात पतॖ

          ति वुचापॖ कथॖ करान

3. मु: क्वकॖर करिहे मान मगर

          पूत्यन क्याह करि

     अ: बाज़े छु ज़्युठ शुर्यव हॖन्द्यव

           कारव सॗत्य तंग यिवान

        (पनॖन्य शुर्य ह्यॆछॖनऻव्यूख)

**************************

पंचान्ग:- राथ ओस नवरेह। यॆमिस ति कऻन्सि म्यॆ मुबारक कॊर तोरॖकिस जवाबॖ तलॖ बास्यव म्यॆ ज़ि सु ओस स्वपनस मंज़ बादामवारि मंज़ बिहिथ मस्त ततिचि पोशॖ फुलियि मंज़, या ओस ज़न निशात बागस मंज़ कुल्य छ़ायन तल बिहिथ फंवारन  थलि थलि वुछान, अखा वुछुम शालॖमऻरॖ बाग़स मंज़ बोनि शेहजारस तल बिहिथ, अखा वुछुम ओस हारी परबतॖ च़ऺक्रीश्वरॖक्यन हेरन खसान, कुस ताम वुछुम माजि शारिकायि ज़ारॖ पारॖ करान ज़ि अंसि सारीनी त्रावतॖ ज़ंगि तऺल्य, पाफ शाफ गालतॖ, महामीरी च़ऺलरावतॖ तॖ असि वापस कऺशीरि वातॖनावतॖ, अखा वुछुम ज़ि सु ओस चॆशमॖ शऻही वऻतिथ ततिकिस पऻनिस गलि गलि च्यवान, अखा वुछुम रामॖच़ऺन्दरुन वोतॖमुत बतॖ स्युन ह्यथ तॖ तति मसनन्दाह वाहरऻविथ ख्यनॖच तयऻरी करान। अखा ओस डूंगस मंज़ हऻरवन कुन पकान तॖ डलस मंज़ ख्यलॖवऺथरन सॗत्य गिन्दान। सऻरी ॴस्य स्वपनस मंज़ यिमन जायन वऻत्यमॖत्य। म्यॆति प्रुछ़ुख। म्यॆति वुछ स्वपना तॖ वॊनमख ज़ि सुबहऻय प्रबातन द्रास पर्बथ कुन, वापसी प्यठॖ बनोवुम मन ज़ि सऻरी गरिक्य बऻच़ ल्वकॖ़ट्य बऺड्य ज़िठ्य कॗन्स ह्यथ गछ़व नेहरू पार्कि, चार चिनारी, यानि रॊपॖ लऻंन्क तॖ स्वनॖ लऻन्क वुछव तॖ ब्यॆयि कोतर खानॖ। होवुसबोटस मंज़ ब्यॆहमव तॖ नवरैह मनावव। व्वंय लगऻयिव तॊह्य अंदाज़ यॆमिस स्वपॖनस मंज़ आसन यिम ख़याल वऺथिमॖत्य तऺमिस कोताह तमाह नेरिहे यॊदवय सु प्रॊखुट पऻठ्य यिमन जायन फीरिथ यीयहे। वाकऺई ॴस्य नवरेहॖकि द्वह कऺशीरि मंज़ कऻशिर्य बटॖ  यिमन जायन गऺछ़िथ गाह त्रावान। बटॖ ॴस्य मोथ  मऺशरिथ पोशॖ फुलिया छावान बादामवारि। बस अडॖ ओस लूकव सॗत्य बऺरिथ आसान। ड्राईवर ॴस क्रकॖ दिवान रोज़ान हऻरवन, शालॖमऻर, निशात, चॆशमाशऻही। क्याह द्वह ॴस्य तिम ति। बस रूद अगर याद कॆंह सु गव पनुन ल्वकॖचार। म्यॆ छु सख़ फ़ेरान ज़ि सान्यव शुर्यव वुछ्य नॖ यिम बऺड्य द्वह यिमन जायन। मंदरन मंज़ तॖ यारॖबलन प्यठ ॴस बीरॖ आसान। शुर्य ॴस्य नव्यन पलवन अंग दिवान। नवरॆह द्वह ॴस्य न्यॆनॖ बताह ख्यवान, कऺलियि, रोगनजोश, मछ़ वगैरा। न्यॆनि बतुक सिल्सिलॖ ओस रोज़ान कऻल्यक्यथ च़ोरम ताम। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी। 

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव ॳज़्युक म्योन यि सबक़

podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)