06.04.2021

06.04.2021,च़िथ्थॖर (चैत्र/चैत) गटॖ पछॖ (कृष्ण पक्ष) दऺहम (दशमी) बॊम्वार (मंगलवार),श्री सप्तर्षि सम्वत 5096, नक्षत्र श्रव, राश मकर (चलान) ऋतु बसंत (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

      महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वाहा स्वधा नमोस्तुते

**************************

            नुंदॖ रॆशॖन्य श्रुक्य

शुर्यपानॖ ज़न ओसुस गूर गुपनन पतॖ

सूर यावुन कस कत्युक आव अतय गथ

सूर यावुन लोरनम हंग हागर तॖ

सूर यावुन यन गछ़न ज़न अतय गथ

              अर्थात

इन्सान छु ल्वकॖचारस वॆशय बूगनॖ पतॖ दोरान। जवऻनी सूरिथ कस क्या आव बागि छु तम्यकुय नतीजि। हंग हंगर छॆतिथ छुस फिकरि तरान ज़ि यि दुनिया छु युन तॖ गछ़नुक च़ऺक्र यथ मंज़ ॳस्य ह्यनॖ छि आमॖत्य।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

                *******

1. लाजवाब (Speechless/Matchless/Silent)

2. लाचार (Helpless/Destitute/Miserable/Compelled)

3. लाखऻर (Ungratefulness)Gratitude)

4. लादवा (Incurable)

5. लादीन (Atheist)

                 मुहावरॖ

1. मु: ख्यनॖ बुलबुल पकनॖ पऻज़ 

         तॖ गन्डनॖ ग्वसऻन्य

    अ: सु शखॖस युस कम ख्यवान

          आसि, या, पलवन दलवन 

          लोर आसि नॖ तॖ कऻम

          करनस मंज़ तेज़ आसि

2. मु: ख्यथ च्यथ श्वॊंगुन तॖ शांद

         दिथ ल्वॊंगुन

    अ: यॆलि नॖ ख्यनॖ च्यनॖ वरऻय 

         कांह कऻम आसि

3. मु: ख्यथ ति बारव न ख्यथ ति

         बारव

    अ: कुनि पऻठ्य नॖ रऻज़्य गछ़ुन

        (पनॖन्य शुर्य ह्यॆछॖनऻव्यूख)

**************************

पंचान्ग:- कथ छि चलान कऺशीरि मंज़ बटॖ लर्यन मंज़ कथ जायि क्याह नाव ओस आसान कऻशिर्य ज़बऻन्य मंज़ तॖ तिमन जायन हॖन्ज़ क्याह क्याह खॊसूसियत ॴस आसान। ब्रांदस मुतलिख वॊन म्यॆ राथ ज़ि ब्रांदॖ फश ओस यिवान दिनॖ प्रबातनॖय। यॆलि कुनि सातन कऺशीरि मंज़ बुन्युल ओस यिवान गरिक्य सऻरी बऻच़ ॴस्य पनॖन्यव गरव मंज़ॖ न्यबर नीरिथ आंगनस मंज़ वातान या ॴस्य  वुज़न मंज़ व्वदॖन्य रोज़ान नतॖ ॴस ब्रांदस प्यठ व्वॊदॖन्य रूज़िथ ओम् नम: शिवाय मंत्र परान रोज़ान यॊत ताम बुन्युल दक्कॖ यिन्य बंद गछ़ॖहऻन। अख कथ वनॖन्य छि म्यॆ ज़रूरी बासान स्व गऺयि यि ज़ि याम बुनिल्य दक्कॖ यिन्य ॴस बंद गछ़ान सऻनि माजि आसॖ पोन्य छकान ब्रांदस। अख मानुन ओस लूकन हुन्द ज़ि स्वर्गॖलूकॖ प्यठॖ ॴस्य म्वर्दन हॖन्द्य आत्मा  ब्रांदस तल यिवान बुन्यलॖ पतॖ तॖ त्रेश मंगान रोज़ान। तिमन शऻन्ती मेलनॖ बापथ तॖ तिमन त्रेशि हॖन्ज़  तृप्ति मेलनॖ मूजूब ॴस्य ॳस्य बुन्यलि पतॖ ब्रांदस पोन्य छऺकान रोज़ान। दॊयिम कथ छि यि ज़ि दपान ब्रांदॖ कऺन्य यॊदवय समतल आसि तथ गरस मंज़ छि स्वख तॖ शऻन्ती रोज़ान। यॊदवय भगवान रऺछिन ह्यॊर ब्वन ओस आसान गरस मंज़ दपान ॴस्य ब्रांदॖ कऺन्य आसिहे हऺज्य तवय छु गरस मंज़ तनाव। कुनि गरस यॊदवय न्वश ॴस आसान वुटुकॖर पाहन दपान ॴस्य ब्रांद कऺन्य छि ॴसमॖच़ हऺज्य तॖ यॊदवय न्वश ॴस आसान सहज़ तॖ संस्कारव बऺरिथ दपान ॴस्य ब्रांदॖ कऺन्य छि स्यॆज़ तॖ शिहॖज। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव म्योन यि ॳज़्युक सबक़

podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)