03.04.2021

03.04.2021, च़िथ्थॖर (चैत्र/चैत) गटॖ पछॖ (कृष्ण पक्ष) सतम (सप्तमी) बटॖवार (शनिवार/ शनिश्चरवार) श्री सप्तर्षि सम्वत 5096, नक्षत्र मूला, राश धनु (चलान) ऋतु बसंत (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

       महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

        नुंदॖ रॆशॖन्य श्रुक्य

यावनॖ म्याने गुलि अनारो

छी रंम्बॖल्य गुल्य शूबजि मछ़य

यिम यॆलि ज़ालनय दोज़खॖनि नारो

अदॖ क्या करॖ तॖ अदॖ कोर गछ़य

             अर्थात

यावुन छु दऻन पोशस ह्युव स्वंदर, यथ मंज़ ॳकिस इन्सानस छि रम्बॖवॖन्य गुल्य तॖ शूबिदार मछ़ॖ बल आसान मऺरिथ यॆलि दोज़खॖनि नारॖ यिमन सूर सपद्यस तमि विज़ि क्याह करि तॖ कोर कुन ह्यॆकि च़ऺलिथ। तमी पज़ि इन्सानस ल्वकचारॖ प्यठय दय वति पऺकिथ रॖच़ क्रॆय करॖन्य।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

            **********

1. गान्ठ (Kite)

2. गान्द (Bad smell)

3. गांगल (Disturbance)

4. गाव (Cow)

5. गाव चावॖन्य (To milk the cow)

               मुहावरॖ

1. मु: गूर्य वॊहवॖ छुनॖ गुपुन मरान

    अ: पनॖनि हॖन्दि नाकारॖ यछ़नॖ 

         सॗत्य छुनॖ परवाय आसान

2. मु: गॊबुर छा लॊबुर ज़ि गुपन

         गूरिस निशि अनि

    अ: न्यॆचुव छु स्यठाह मॊलुल

         आसान, या, पनुन शुर छु

         न्यामथ

3. मु: ग्वडॖन्युक सोदा गछ़ि नॖ 

         त्रावुन

    अ: यि ग्वडॖ बनि सु छु हमेशॖ

         जान आसान

     (पनॖन्य शुर्य ह्यॆछॖनऻव्यूख)

**************************

पंचान्ग:- अज़ वुछव ॳस्य कऺशीरि मंज़ सान्यन यानि कऻशिर्य बटॖ लर्यन यानि मकानन मंज़ कथ जायि क्याह ॴस्य वनान कऻशिर्य ज़बऻन्य मंज़। अच़वुनुय ओस आसान बॊड बर यानि बॊड दरवाज़ॖ। बरस अंदर ॳच़िथ ओस आसान आंगुन यानि खुलॖ डुलॖ ख़ाली जाय। अथ आंगनस मंज़ ॴस्य शुर्य गिन्दान लऺठ्यकिंज लऺठिस, सज़ॖ लंगिस, रटि रटि, रज़ि व्वटन, ॳन्य कतरि, गरमस, माहर्यैन माहराज़स, बतॖ रनॖनस, खॊ खॊ, क्रिक्यटस वगैरा। अथ आंगनस मंज़ ओस आसान ॳकिस अंदस कुन अख कन्ज़़। कन्युव कन्ज़़ यथ मंज़ मुहल्यॖ सॗत्य दगान ॴस्य व्वज़ॖल्य ह्वख्य मरच़ॖवांगन, मुनान ॴस्य दानि। यिम कामि आसॖ करान सानि माजि। आंगनस मंज़ ॴस्य त्वमुल छ़टान शुपि सॗत्य, त्वमुल च़ारान, त्वमुलस स्युर कडान, कन्नॖ च़ारान। आंगनस मंज़ ॴस्य ह्वखनावान मरच़ॖवांगन, अलॖ, वांगन, टमाटर, करेलॖ, ग्वगजि, फूल गोबी वगैरा। अथ आंगनस मंज़ ओस यिवान ज़्युन फालनावनॖ तॖ फालनऻविथ अथ ज़िनिस यिवान ॴस बनॖ करनॖ। बनॖ मतलब ज़िन्य हचि यिवान आसॖ वऺतीरॖ सान अख ॳकिस प्यठ वऺटिथ थवनॖ तॖ अख थॊद डेर ह्यु बनान ओस। अथ ॴस्य वनान ज़िनिस बनॖ करॖन्य। यि कऻम ॴस्य सऻरी गरिक्य बऻच़ करान रोज़ान। चूंकि कऻशिर्य बटॖ क्यो मुसलमान ॴस्य ग्वडॖ गवडॖ दानस प्यवान तॖ बतॖ स्युन रनान तमि बापथ ओस प्यवान ज़िन्युक हाजथ। वन्दॖ बापथ ति ओस प्यवान ऱयतॖकऻल्यसॖय मंज़ ज़्युन सॊमबरऻविथ थवुन। ॳथ्य आंगनस मंज़ ओस आसान अख नलकॖ तॖ तथ ॳन्द्य ॳन्द्य अख होज़। होज़ माने च़ॊश्यवऺय तरफव कॊठ्यन हॖन्द्य थज़रॖ देवारॖबऺन्दी करॖन्य। अथ होज़स मंज़ ॴस्य गरिक्य सऻरीय बऻच़ श्रान करान, अथॖ बुथ छलान, पलव छलान, बानॖ छलान वगैरा। कॆंच़न होज़न ॴस आसान हचिव पचन हॖन्ज़ गेराबऺदी ति कऺरिथ तॖ अथ ओस नाव प्यवान श्रानॖकुठ। अति आसॖ सानि माज़ि, ब्यॆनि, बऺयकाकॖनि बर बंद कऺरिथ श्रान करान रोज़ान। आंगनस मंज़ आसॖ यिवान यिम यिम कामि करनॖ। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव ॳज़्युक यि म्योन सबक़

podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)