05.04.2021

05.04.2021, च़िथ्थॖर (चैत्र/चैत) गटॖ पछॖ (कृष्ण पक्ष) नवम (नवमी) च़ऺन्दॖरवार (सोमवार) श्री सप्तर्षि सम्वत 5096, नक्षत्र उषा, राश मकर (दुहचि 8.1 बजि प्यठॖ) ऋतु बसंत (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

      महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

           नुंदॖ रॆशॖन्य श्रुक्य

शिव शिव करान शिव मो बोज़े

ग्यव कंदि करख मनॖनि बुज़े

ग्यव छु दिहस दिह दॊर रोज़े

दिखनय दिहस बॆयिस दिज़े

            अर्थात

यॊद बावॖ शिव नाव ज़पख नॖ तस निश कति वाति त्यॆलि आवाज़ च्यऻन्य। ग्यव तॖ कंद बावनॖ बदलॖ बरख पनॖनी यड। बेशक छु ग्यव ख्यनॖ सॗत्य पनुन शरीर मज़बूत बनान। मगर यॊद नॖ शऺरीरस ति ग्यव सॗत्य सग दिख तॆलि करुन पनॖनुय दय ख्वश युस च़्यॆति ख्वश थवि ब्रोंहकुन

*************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

            ********

1. लापता (Without address/Unknown)

2. लापरवाह (Careless/Negligent/Inattentive/Heedless)

3. लातेदाद (Countless/Innumerable)

4. लासऻनी (Unparallel/Matchless/Unique/Incomparable)

5. लाज (Shame/Shyness/Bashfulness/Honour)

                मुहावरॖ

1. मु: ख्यनॖ म्यूठ पॊज़ होरुन 

         ट्यॊठ

    अ: सु मज़ॖदार चीज़ युस ख्वश

         करि अमापॊज़ असर 

         नाकारॖ आस्यस

2. मु:  ख्यनॖ ख्यवान तॖ व्यनॖ 

          डऻल्य डऻल्य

    अ: न्यॆबॖर्य बे-मऻल लागुन मगर

         ख्यॊन बॆ-वाय

3. मु: ख्यनॖ च्यनुक यार

    अ: मतलबी इन्सान

     (पनॖन्य शुर्य ह्यॆछॖनऻव्यूख)

**************************

पंचान्ग:- ऊतरॖ वुछ असि ज़ि कऺशीरि मंज़ यिम आंगन ॴ्स्य आसान तिमन आंगन मंज़ कम कम कामि आसॖ यिवान करनॖ। तिमन काम्यन अलाव ओस आंगनस मंज़ वॖरॖ यिवान लागनॖ। वॖरॖ माने चूल्हॖ याने ज़ीठ अख च़्वल हिश यथ प्यठ खान्दरन मंज़ बतॖ स्युन ओस यिवान रनॖनॖ। आंगनॖचॖ ॳकिस लबि सॗत्य ओस वाज़ॖ सेर्यन हॖन्ज़ वॖरॖ बनावान तॖ तथ प्यठ ॴस्य ब्यॊन ब्यॊन कॖसमॖक्य स्यिन्य यिवान बनावनॖ, बतॖ यिवान बनावनॖ। यॊदवय कऻन्सि बटॖ गरस आंगुन ओस बॊड आसान, तथ आंगस मंज़ ओस शामियानॖ ति यिवान लागनॖ यथ तल खान्दरस मंज़ बरऻच़ बतॖ यिवान ओस दिनॖ। मगर तिम द्वह मोकलेयि व्वंय। यि कथ हरगाह स्यठाह प्रऻन्य छि मगर हकीकत छि यि ज़ि खान्दर व्वछ़ब ॴस्य बटॖ करान पनॖन्यन लर्यन मंज़ यिम लरि मंदोरि हिशॖ आसॖ आसान। हकन हमसायन हॖन्ज़ॖ लरि ति आसॖ यिवान बकार यिछ़न काम्यन बापथ। मगर तिम हालाथ बदलैयि, तिम खयाल बदलेयि, तिम जायि बदलेयि, तिम हक हमसायि बदलेयि।  आंगनॖ प्यठॖ खसव ॳस्य ब्रान्दस कुन। ब्रांद ओस बटॖ लर्यन मंज़ अलगॖ महत्वॖ थवान। सानि माजि आसॖ प्रभातन न्यॆन्दरि वऺथित ग्वडॖ ब्रांदॖ फश दिवान यानि ब्रांद छलान। मानॖनॖ छु यिवान ज़ि सुबहऻय ब्रांद छलनॖ सॗत्य ॴस्य सान्यन पॆतरन स्वर्गॖ दुकस मंज़ त्रेश वातान। दपान यिम ति कॆंह सऻन्य गरिक बऻच़ स्वर्गस गऻमॖत्य छि, तिम छि ब्रांदस तल आसान त्रेशि बापथ प्रारान आसान। अथ कथि मंज़ कोताह पज़र छु दय ज़ानि।  दय कऺरिन्य असि पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव ॳज़्युक यि म्योन सबक़

podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)