20.03.2021

20.03.2021, फाल्गुन (फाल्गुन) ज़ूनॖ पछॖ (शुक्ल पक्ष) सतम (सप्तमी)  बटॖवार (शनिवार/शनिश्चरवार),श्री सप्तर्षि सम्वत 5096, नक्षत्र रोहि, राश वृष (चलान) ऋतु बसंत (चलान)..चूंकि सतम छि ज़ॖ गछ़ान ॳज़्युक वॊहरवोद यी पगाह याने 21 मार्च तॖ आथवारि द्वह

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

        महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

            नुंदॖ रॆशॖन्य श्रुक्य

बुगि च़्यॆति कल गऺयी म्यऻनी

गोसय बॖ गऺल्य गऺल्य च़ऺमिथ कथ

अवॖ व्वंन्य बॖ ति कल त्रावनॖ च्यऻनी

याम हऻन्कल गछ़्यम च़ऺमिथ कथ

             अर्थात

संशय सॗत्य गनेयि म्यऻनिस मनस म्यऻन्य कल। याने तस गव अहंबाव मगर हीनॖ बाव युथ फ्यूरुस बॖ दयस कुन। दय गन्डस तल रूज़िथ गनेयम तसॖन्ज़ कल तॖ कॊरुम तऺहिया तिहुन्द दामन रटनुक

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

           *********

1. कारुन (To boil)

2. कारतूस (Bullet)

3. कार्टून (Cartoon)

4. कारवान् (Company of travellers/Caravan)

5. कऻर्यगर (Craftsman/Artisan/Skilled labourer/Skillful/Expert)

                मुहावरॖ

1. मु: म्वगुल डींशिथ गछ़ि फ़ार्सी

         फोरुन

    अ: ज़ऻन्यकारस थी गछ़ि 

         तगॖन्य कथ करॖन्य

2. मु: मोल मऻज्य गऺयि कऻज़्य

         ॳकिस रऻज़्य तॖ ब्यॆयिस

         बऻज़्य

    अ: मोल मऻज्य छिनॖ ह्यकान 

         सारिनी शुर्यन अकी नज़रि

         वुछिथ

3. मु: मऻजी व्वरुद क्युथ, बेछनॖ

         ख्वतॖ स्यठाह रुत

    अ: कॆंह नॖ आसनॖ ख्वतॖ छु कॆंह

         आसुन जान

       (पनॖन्य शुर्य ह्यॆछॖनऻव्यूख)

**************************

पंचान्ग:- राथ वुछ्य असि पंचान्गॖ हिसाबॖ सतोवुह नक्षत्रण हॖन्द्य नाव। पांछ़ नक्षत्र छि यिमन नक्षत्रन मंज़ तिम यिमन द्वहन द्रठॖपऻन्च़ुक रोज़ान छु। तिमन नक्षत्रण हॖन्द्य नाव छि - 1. धनिष्ठा 2. शतभिषक 3. पूर्वाभाद्रपदा 4. उत्तराभाद्रपदा तॖ 5. रेवती - अमि अलावॖ छि कॆंह नक्षत्र सफ़रस प्यठ गछ़नॖ बापथ श्वब याने जान यिवान मानॖनॖ। तिमन हॖन्द्य नाव छि - अश्वनी, पुनर्वस, अनुराधा, तिष्या, मृगशिर, रेवती, हस्त तॖ धनिष्ठा - कॆंह नक्षत्र छि तिम यिम सफ़रस गछ़नॖ बापथ निषेध याने अश्वब याने नाकारॖ यिवान छि मानॖनॖ। तिमन हॖन्द्य नाव छि - भरनी, कृतिका, आर्द्रा, आश्लेशा, मघा, चित्रा, स्वाति तॖ विशाखा - पंचान्गॖ हिसाबॖ छि कॆंह तिम नक्षत्र ति यिम न श्वब  छि ज़्यादॖ तॖ न छि अश्वब ज़्यादॖ याने यिम नक्षत्र छि मध्यम स्थानॖक्य मानॖनॖ यिवान। यिमन हॖन्द्य नाव छि - रोहिनी, उत्तराफाल्गुनी, उत्तराषाढा, पूर्वाषाढा, उत्तरभाद्रपदा, ज्येष्ठा, मूला तॖ शतभिषक - यॊदवय कऻन्सि सफ़रस गछ़ुन छु आसान ज़रूरी तॖ नक्षत्र छु नॖ श्वब आसान, तथ सूरतस मंज़ छि अख विधि यॆमि मुतऻबिक प्रस्थान छु यिवान कडनॖ अख द्वह ब्रोंठ। तमि सॗत्य दपान ख़राब वखॖत छु टलान तॖ सफ़र छु सफलता पूर्वक मुक्कमल सपदान। महूर्त याने साथ वुछनॖ बापथ ति छु नक्षत्रणन प्यठ यिवान विश्वास करनॖ। सानि पंचान्गॖ हिसाबॖ छि कुल बाह रऻश आमॖच़ मानॖनॖ। प्रथ ॳकिस ज़ीवस छि अख राश रोज़ान ज़्यनॖ प्यठॖ मरनस ताम। यिमन बाहन राश्यन हॖन्द्य नाव छि यिथॖ पऻठ्य -  1. मेष (Aries) 2. वृष (Taurus)3. मिथुन (Gemini) 4. कर्कट (Cancer) 5. सिंह (Leo) 6. कन्या (Virgo)7. तुला  (Libra) 8. वृश्चिक (Scorpio) 9. धनु Sagittarius) 10. मकर  Capricorn) 11. कुम्भ (Aquarius) 12. मीन (Pisces) - यिमन राश्यन सॗत्य ब्रेक्यटस मंज़ छि अंग्रीज़ ज़बऻन्य मंज़ नाव आमॖत्य हावनॖ। सान्यन शुर्यन पज़ि यिमन राश्यन हॖन्ज़ ज़ऻन्यकऻरी थवॖन्य। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक यि म्योन सबक़

podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)