01.03.2021

01.03.2021, फाल्गुन (फाल्गुन) गटॖ पछॖ (कृष्ण पक्ष) द्वय (देवादेव) (द्विती) (देवादेव) च़ऺन्दॖरवार (सोमवार), श्री सप्तर्षि सम्वत 5096, नक्षत्र उफा, राश कन्या (चलान), ऋतु शिशर (चलान)..अज़ छि हुर्य द्वय...चूंकि पगाह छि त्रय रावान, त्रॆयि हुन्द वॊहरवोद यी ॳज़्य याने द्वय द्वह

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

     महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वाहा स्वधा नमोस्तुते

**************************

            लल वाक्

      (पराग पुस्तक- 215)

शिव छुय थलि थलि रोज़ान

मव ज़ान ह्यॊन्द तॖ मुसलमान

त्रुकुय छुख तॖ पान प्रज़नाव

स्वय छय साहिबस सॗती ज़ान

            अर्थात

शिव हर स्थान पर रहता है, हिन्दू और मुसलमान का भेद मत करो। यदि समझदार हो तो अपने को पहचानो तो वही साहिब के साथ पहचान है।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

            ********

1. फऻतिर (Crack/Brainless/Foolish/Wild/Irrational/Stupid/Unwise)

2. फारेग (Free/At leisure/Unoccupied)

3. फारेग गछ़ुन (To be discharged/To be free)

4. फारेग करुन (To spare/To discharge)

5. फाश करुन (To disclose/To reveal/To divulge (a secret)

               मुहावरॖ

1. मु: वछि तलुक गछ़्या टोठ

         किनॖ बछि तलुक

    अ: परद्यन मुकाबलॖ पनुन शुर

          टोठ बासान

2. मु: वछस हय कुलुफ आसि 

          लछस पकि दक्कॖ दिथ

     अ: पनुन किरदार आसि नेक

           त्यॆलि क्याह करि लूकॖ 

           मॊत

3. मु:  वुछिथ ऒन तॖ बूज़िथ ज़ॊर

    अ: डीशिथ गॊश द्युन तॖ कनव

         बूज़िथ ज़ॊर लागुन

       (पनॖन्य शुर्य ह्यॆछॖनऻव्यूख)

**************************

पंचान्ग:- राथ वुछ असि ज़ि कऺशीरि मंज़ क्वस वॊसॖ द्र्वस ॴस वसान असि कऻशिर्य बटन हेरथ यिनॖ ब्रोंठ। लिविथ डुविथ, छऺलिथ छॊकिथ, नऻविथ सऻविथ पलव दलव, बानॖ बठॖ, पनुन पान पऻरऻविथ ॴस्य हेरच़ मुतलकॖय सोंचान रोज़ान ज़ि क्याह क्याह छु ब्यॆयि करुन। हुर्य ऒक्दॊह प्यठॖ हुर्य सतम ताम ॴस्य साफ सफऻयी करान रोज़ान। शुर्य ॴस्य लगान हारॖ सॊम्बरनस तॖ हारन गिन्दनस। गरिक्य सऻरी बऻच़ सऺमिथ शुर्य क्योहऻ बऺड्य, कोरि लऺडकॖ, मर्द ज़नानॖ ॴस्य पनॖनि पनॖनि हारॖ कडान तॖ ॴस्य गिन्दान रोज़ान पानॖवॖन्य। हारव मंज़ॖ ॴस्य अख हार कड़ान अलग यथ वनान ॴस्य बोतुल।  तिमन बोतुलन ॴस्य तिहॖन्दि आकारॖ मुतऻबिकअलग अलग नाव यिवान दिनॖ। मसलन क्रऺन्ड, मॊंजाटॖ, खॊर, ख्रॗन्च़, ॳछुल, दु-चॆशिम, ब्युल, कोन, क्रुहुन काव बेतरी। यिमव बोतुलव दऺस्य ॴस्य गिन्दान कॖसॖमवार गिन्द्य। हारन हॖन्ज़ ग्रन्द ॴस च़ाकन मंज़ करान   च़ाकन मंज़ करनॖ याने अख च़ाख, ज़ॖ च़ाख वगैरा। च़ाख याने च़ोर हारॖ। जुफतस ताकस ॴस्य गिन्दान। गिन्दनस मंज़ ॴस आसान कुन्य, ट्यकॖर, छॊत वगैरा। फ्यरन चन्दस, कपरॖव ग्वच़ॖरि, मॊज़ॖ ख्वरन मंज़ आसॖ यिवान हारॖ थावनॖ। मगर वारॖ वारॖ गऺयि कऺशीरि मंज़ हारॖ गऻबॖय। अवॖ म्वखॖ गव गिन्दुन यि दऺप्यज़ि ति बंदॖय, शुर्य ति ह्यॆतिन रसॖ रसॖ कम गछ़ॖन्य गरन मंज़। बॊरुत्य गरॖ ह्यॆतिन वारॖ वारॖ छ़ॊकॖन्य तॖ नॊवुय बदलावाह गव नज़र यिवान। हुर्य सतम द्वह आसॖ सानि न्वशि कोरि पनुन पनुन माल्युन गछ़ान ज़ंगि मूजूब तॖ कॆंह आसॖ दऺस्ती वापस यिवान तॖ कॆंह आसॖ ज़ॖ त्रॆ द्वह ठॖरिथ दुहुम द्वह पनुन वऻरिव याने गरॖ यिवान। क्रालस निशि ॴस्य अनान वटक सामानॖ याने कतरिव नॊट, च़ॊड, डुलॖज्य, टऻक्य, च़ऻन्ग्य, परवॖ, सॊन्य प्वतुल, दूपॖ ज़ूर वगैरा। यि सामानॖ ओस यिवान अनॖनॖ महूर्त वुछिथ। मगर वारॖ वारॖ रऺट स्टील बानव कतरिव बानन हॖन्ज़ जाय। हालांकि कॆंच़न गरन मंज़ छि वुनि ति कतर्युव बानय यिवान वर्तावनॖ। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक म्योन सबक़ podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)