18.02.2021

18.02.2021 मागॖ (माघ) ज़ूनॖ पछॖ (शुक्ल पक्ष) शॆयम (देवादेव) (षष्ठी)(देवादेव) ब्रसवार (वीरवार/ गुरुवार/ब्रहस्पतिवार),श्री सप्तर्षि सम्वत 5096, नक्षत्र भरण, राश मेष (चलान) ऋतु शिशर (चलान)

शॆयम हुन्द वॊहरवोद यी अज़

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

     महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

             लल वाक्

       (पराग पुस्तक-204)

नफसॖय म्योन छुय हॊसतुय

ॳम्य हऺस्य मॊन्गनम गरि गरि बल

लछॖ मंज़ॖ सासॖ मंज़ॖ अखा लॊसतुय

नतॖ ह्यत्यनम सऻरी तल

             अर्थात

मेरा मन एक हाथी के समान है जो सदा बलवान बनने की इच्छा करता रहता है। इस इच्छा रूपी हाथी को लाखों मनुष्यों में किसी एक ने वश में किया। शेष सब को इस ने कुचल दिया

भावार्थ:- अपनी इच्छाओं पर काबू पाना बलवीरों का ही काम है। यही इच्छा पूर्णब्रह्म और हमारे बीच की बाधा है।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

             ********

1. ॴश आराम (Comfort/Ease/Rest/Pleasure)

2. ॴश परस्त (Slothful/Idle/Pleasure seeking)

3. ॴरिफ (Mystic/Knowing/Wise/Pious/Devout)

4. ॴकिल (Intelligent/Prudent/Sensible)

5. ॴरख (Mixture/Distilled/Concoction)

               मुहावरॖ

1. मु: हऻन्ज़ मऻरिथ तॖ कऻन्ज़

         कऻरिथ

    अ: हऻन्ज़ छु चोब ख्यथ मानान

         तॖ कऻन्ज़ छु कऻरिथ ठीख

         गछ़ान

2. मु: हतॖ होनि ख्यतॖ ज़ंग

    अ: हंगॖ मंगॖच्यन काम्यन मंज़

         ज़ंग त्रावॖन्य,या, योरय 

         मुसीबतन पान पुशरुन

3. मु: हतस कथन कुनी कथ

    अ: म्वख्तसर कथन मंज़

         बावथ करॖन्य

        (पनॖन्य शुर्य ह्यॆछॖनऻव्यूख)

**************************

पंचान्ग :- यॆमि ब्रोंठ छु म्यॆ वारिहायि लटि पनॖनि समाजक्यन शुर्यन कट्यन हॖन्दि बापथ कऻशिर्य ज़बऻन्य मंज़ ब्यॊन ब्यॊन चीज़न हॖन्द्य नाव वऺन्यमॖत्य। तिमन चीज़न हॖन्द्य नाव ब्यॆयि अकि फिरि वनुन छु म्यॆ पनुन फर्ज़ बासान तॖ सॗती छुस बॖ व्वमेद करान ज़ि म्योन यि सबक़ परनवऻल्य वातनावन यि कथ पनॖन्यन शुर्यन कट्यन ताम तॖ कूशिश करन ज़ि तिम थावन याद यिमन चीज़न हॖन्द्य नाव कऻशिर्य ज़बऻन्य मंज़। खुली प्रभातन ॳछ यॆमि सामन परुनुय गछ़ि तमि सातन "हरि ओम् तत्सत" ।पनॖन्यन शुर्यन क्योहो बड्यन पज़ि यि मंत्र परुन तॖ सॗती न्यॆन्दरि वऺथितॖय पनॖन्य दॊश्यवॖन्य अथन बुथ वुछुन तॖ मनॖ मंज़्य परुन या बडि बडि यि मंत्र परुन -

"कराग्रे वसते लक्ष्मी: कर मध्ये सरस्वती। कर मूले स्थितो ब्रह्मा प्रभाते कर दर्शनम" 

यि मंत्र छु जंत्री मंज़ ति हऻविथ। यॆमि मंत्रुक मतलब छु ज़ि सानिस अथकिस ब्रूंठ्यमिस हिसस मंज़ छि लक्ष्मी वास कऺरिथ याने रूज़िथ, अथॖकिस मंज़्यमिस हिसस मंज़ छि सरस्वती रूज़िथ तॖ अथॖकिस मूल याने शुरुहस मंज़ छु पानॖ ब्रह्मा या गोविन्दा या कृष्ण भगवान वास कऺरिथ। यि मंत्र परनॖ सॗत्य छि दपान ज़ि परनवऻलिस मेलि बुद्धि, थन, विद्या, सतॖच वथ तॖ यथ यथ कामि मंज़ सु ज़ंग त्रावि तथ तथ कामि मंज़ मेल्यस सफलता। मानॖनॖ छु आमुत ज़ि अथस बुथ वुछनॖ सॗत्य छि नॖ बद-खयाल मनस मंज़ यिवान, कुनि नाकारॖ कामि कुन छु नॖ मन गछ़ान तॖ द्वह छु असान तॖ गिन्दान न्यॆरान। असि पज़ि पनॖन्यन शुर्यन यि मंत्र याद करनावुन तॖ दॊहय न्यॆन्दरि वुथनॖ विज़ि परनावॖन्य। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)