15.02.2021

15.02.2021 मागॖ (माघ) ज़ूनॖ पछॖ (शुक्ल पक्ष) च़ोरम (चतुर्थी) च़ऺन्दॖरवार (सोमवार) श्री सप्तर्षि सम्वत 5096, नक्षत्र उभा, राश मीन (चलान), ऋतु शिशर (चलान) द्रठॖपऻन्च़ुक (पंचक) (चलान)...अज़ छि तिक्य च़ोरम (याने त्रिपुरा चतुर्थी)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

      महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

              लल वाक्

        (पराग पुस्तक-201)

तिम छि नॖ मनुष्य तिम छि ऋष

यिमन दिह मनॖ निशि गव

बऺडिथ तॖ बुडिथ ब्याख क्या रछिय

फुट्यमॖतिस बानस प्यॆयिय ग्यव

               अर्थात

वे मनुष्य ऋषि हैं जिन्होंने बचपन से ही मन को शरीर से अलग रखा अर्थात मन को काबू कर लिया बड़ा होकर जंजाल बढने और बुढापे में शरीर टूट जाने से मन काबू नहीं रह कर इधर उधर उसी प्रकार भटकता है जिस प्रकार टूटे बर्तन में से घी रिस कर निकल जाता है।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

           *********

1. ज़ऻलिम (Cruel/Tyrant/Unjust)

2. ज़ऻहिर (Obvious/Evident/Clear/Plain/Visible/Explicit)

3. ज़ऻहिर सपदुन (To appear/To come to light/To be disclosed/To become manifest)

4. ज़ऻहिर करुन (To reveal/To disclose/To pretend)

5. ज़राफत (Wit/Irony/Humour/Wisdom)

             मुहावरॖ

1. मु: यथ छ़ॖन चोंचा हुथ छ़ॖन

         बलाय

   अ: ख्वदगर्ज़ी, या, सिरिफ

        पनुनुय फऻयदॖ छ़ारुन

2. मु: यिथॖ ज़ानख तिथॖ

    अ: कुनिपऻठ्य कऻम अंद 

         वातॖनावॖन्य

3. मु: युथ पीर त्युथ मुरीद

    अ: ह्यिविस ह्यु आसुन

      (पनॖन्य शुर्य ह्यॆछॖनऻव्यूख)

**************************

पंचान्ग:- बेक़रऻरी बडेयि च़ुपासे। मऺहलॖवऻल्य गयि बेकरार यि ज़ानॖनॖ बापथ ज़ि ताराचन्दस क्याह सज़ा मेलि। तिम सऻरी मुसलमान ॴस्य ॳन्दॖर्य ॳन्दॖर्य ख्वश ज़ि तिमव रटनोव अख बटॖ बम्ब फाटनावान। दॊयिमि तरफॖ ओस ताराचन्द बेक़रार पनुन पान बेग्वनाह सऻबित करनॖ बापथ। ताराचन्दन गैरिक्य ॴस्य बेकरार ताराचन्दस अमि आवलनि मंज़ॖ कडनॖ बापथ। हुपऻर्य ओस थानुक एस एच ओ बेकरार यि ज़ानॖनॖ बापथ ज़ि ॴखॖर क्याह सना चीज़ आसिहे सु युस यूत थदि फॊट ज़ि मऺहलस गऺयि दॖनन। ताराचन्द वोत गर ति सऺही मगर राथ द्रायस ॳछन मंज़ॖय। न्यॆन्दॖर कथ तपालि मंज़ यीहेस। सोंचनि लॊग ज़ि अमा यि कुस ह्यु कॆम्यकॖल ओस रूदमुत पथकुन तॖ म्यॆ क्याज़ि प्यव नॖ याद अज़ताम। बाज़ेह ख्वॊत शरारथ ताराचन्दस पनॖन्यन गैरिक्यन प्यठ ति ज़ि तिमव क्याज़ि वॊन नॖ म्यॆ अथ बोतलि मुतलक यिमन श्यन ऱयतन मंज़ अकि फिरि ति। यॊदवय तिमव आसिहे वॊनुमुत यूत मसलॖह द्यवॖ बडहेनॖ। राथ गऺयि नेरान, ब्यॊन ब्यॊन ख़यालन मंज़ गव गीर ताराचन्द मगर करिहे क्याह। ह्यनॖ आस तॖ म्यॆ नॖ राह। यि मशरबॖ ति कोताह न्वकसान छु वातनावान इन्सानस कुनि कुनि सातन। यूत स्यॊद ति गछ़ि नॖ कांह आसुन युथ बाकय लूख तऺमिस गुर करन। यिम मुसलमान ति कऻत्याह बुथ च़ऺट्य द्रायि ज़ि अख ति मुसलमान आव नॖ म्यऻनिस बचावस।सूंच ताराचन्दन मनस मंज़। सारिवॖय मुसलमानव कऺर कुनी कथ ज़ि बम्ब फाटनोव यॆमी बटन। ब्रिंज़िस मंज़ बदल्यव माहोल, त्युहुन्द माय महोब्बत, त्युहुन्द युन गछ़ुन, तिहॖन्ज़ स्व दुआ सलाम। तिहुन्द लिहाज़ॖ।तिहॖन्ज़ हमसायगऺरी ति आयि नॖ बकार कुनि। ताराचन्दन च़्यून ज़ि ब्यॆबॊरुसॖ क़ोम छु यि मुसलमान। यिथॖ तिथॖ द्रायि राथ। गाश फॊल तॖ ताराचन्द छु प्रारान नव बजनस ताकि सु गछ़ि ॳमराकऺदल सु कॆम्यकॖल अनॖनॖ बापथ तॖ तपऻरी ओस तऺमिस थानस प्यठॖ वातुन। दुकान ओस प्लेडियम टाकी हॖन्ज़ि गली मंज़ युस यिम कॆम्यकॖल थवान ओस।वख गव नेरान तॖ बेकरऻरी तॖ बॆतऻबी ति गऺयि बडान। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप" 

(बूज़िव म्योन ॳज़्युक सबक़ podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)