27.02.2021

27.02.2021, मागॖ (माघ) ज़ूनॖ पछॖ (शुक्ल पक्ष) पुनिम (देवादेव) (पूर्णिमा) (देवादॆव) बटॖवार (शनिश्चरवार/शनिवार),श्री सप्तर्षि सम्वत 5096, नक्षत्र मघा, राश सिंह (चलान) ऋतु शिशर (चलान)....अज़ छि काव पुनिम ति

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

      महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

               लल वाक्

         (पराग पुस्तक-213)

दॊद क्या ज़ानि यस नो बने

गमॖक जामॖ हा वऺलिथ तने

गरॖ गरॖ फीरॖस प्यॆयम कने

ड्यूंठुम नॖ कांह पनॖनि कने

             अर्थात

जो स्वयं न जले वह जले हुए की पीडा को कैसे जान सकता है। ग़म अर्थात प्रियतम की चिंता के कपडे पहने तथा घर घर मैं गई परन्तु मुझे दुत्कार ही सुननी पडी और मेरा समर्थन किसी ने नहीं किया अर्थात मेरी बात को कोई समझ न सका। 

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

           **********

1. ग़रूर (Pride/Vanity)

2. ग़रूर गछ़ुन (To be proud of)

3. ग़रीब (Poor/Miserable)

4. ग़रीब परवर (Gracious/God)

5. ग़रीबी (Poverty/Misery)

               मुहावरॖ

1. मु: यस दय दी तस कुस नी

    अ: दय सॖन्दिस दिनस छु नॖ 

         कांह शऺरीक

2. मु: युस सर्पन बुछ सु छु गासॖ 

         रज़न खोच़ान

    अ: यस ख्वरस तल त्यॊंगुल 

         गव सु छु त्यम्बर्यन खोच़ान

3. मु: युस हदॖ डॊल सु रोव

    अ: हदॖ न्यबर नेरुन गव रावनस

         बराबर

      (पनॖन्य शुर्य ह्यॆछॖनऻव्यूख)

**************************

पंचान्ग:- शीनुक मोसुम कऺशीरि मंज़ छु बेहतरीन मोसुम आसान। तॗर छि सख आसान मगर फ्यरनस तल कांगॖर आसि तॖ तॗर छॆ नॖ बासान। यॆलि ग्वडन्युक शीन प्यवान छु, यथ गरस मंज़ नऺव्य न्वश आसि या यॆमिस शुर आसि ज़ामुत हालॖ हालय तस छि नव शीन खारान याने नऺविस शीनस सॗत्य ज़ऻन्यकऻरी करनावान। गुलमर्गॖ छि शीनस मंज़ स्केटिंग करान तॖ शीनुक लुत्फ तुलान रोज़ान। कॆंच़न लर्यन प्यठ छु शीन समान तॖ पॊहुल याने मॊज़ूर छु पशॖ प्यठॖ शीन वालान। यिमन लर्यन टीनॖ पश छि आसान, तिमन पशन छु नॖ शीन ज़्यादॖ कालस ठऺहरान मगर यिमन लर्यन म्यॆच़ि पश छु आसान तिमन पशन छु ज़्यादॖ कालस शीन समनॖ सॗत्य न्वकसान वातान। सब्ज़ी छि शीनस तल दबिथ गछ़ान। कऺशीरि मंज़ ॴस अख प्रथा आसान ज़ि ऱयतॖकऻलिस मंज़ ॴस्य वंदॖ बापथ कॆंह सब्ज़ी ह्वखनावनॖ यिवान तॖ वंदस मंज़ ॴस्य लूख ह्वछि सब्ज़ी ख्यवान रोज़ान। मसलन अलॖ, वांगन, टमाटर, करेलॖ, ग्वगजि बेतरी। ह्वॊखिथ ओस यिमन सब्ज़ियन नाव बदलान। अलॖ ह्वखनऻविथ ॴस्य अथ वनान अलॖ हचि। यिथय पऻठ्य ओस ह्वखनऻव्यमॖत्य वांगनन वनान वांगन हचि। टमाटरन ॴस्य वनान ह्वखॖ रुवांगन या ह्वखॖ टमाटर। मुसलमान छि कऺशीरि मंज़ टमाटरन वनान रुवांगन। बटॖ छि वनान टमाटर। यिथय पऻठ्य छि गाडॖ, गुरन ति यिवान ऱयतॖकऻलिस मंज़ ह्वखनावन यिमन नाव ह्वखिथ प्यवान छु हॊगाडॖ तॖ रज़ॖ-हॊगाडॖ या ह्वख्य गुरन। यिम ह्वछि सब्ज़ी छि वंदस मंज़ यसलॖ ख्यवान। ऱयतॖकऻलिस मंज़ ति छि यिम ह्वछि सब्ज़ी ख्यवान रोज़ान। हालांकि वंदस मंज़ छि कऺशीरि मंज़ न्यबरॖ जायव प्यठॖ सब्ज़ी वातान मगर कुनि कुनि सातन यॆलि वथ बंद गछ़ान छि शीनॖ म्वखॖ तॖ सब्ज़ी छॆ नॖ ह्यकान वऻतिथ कऺशीरि। ह्वछि सब्ज़ी छि बकार यिवान। स्कूल कालेज्य छि वंदस द्वन डायन ऱयतन बंद रोज़ान मगर बाक़ी अदारॖ छि हिसबि मऻमूल कऻम करान रोज़ान। सान्यन शुर्यन पज़ि कम अज़ कम अकि फिरि कऺशीरि गऺछ़िथ शीन छावुन। शीनस मंज़ आसनॖ सॗत्य छु बासान ज़न छु यिवान नॊव यावुन। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक म्योन सबक़ podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)