14.02.2021

14.02.2021 मागॖ (माघ) ज़ूनॖ पछॖ (शुक्ल पक्ष) त्रय (तृतीया) आथवार (रविवार/ऐतवार) श्री सप्तर्षि सम्वत 5096, नक्षत्र पूभा, राश मीन (दुहचि 10.8 बजि प्यठॖ) ऋतु शिशर (चलान) द्रठॖपऻन्च़ुक (पंचक) (चलान)..अज़ छि गोरॖ त्रय याने गौरी तृतीया ति

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

      महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

            लल वाक्

       (पराग पुस्तक- 200)

नियम कर्योथ गरबा

च़्यतस करबा प्ययिय

मरनॖ ब्रोंठॖय मरबा

मऺरिथ मरतबॖ हॖरिय

        अर्थात

माता के गर्भ में आकर तू ने प्रण किया था (कि अब केवल आप का नाम ही जपूंगा)। तुम्हारे द्वारा किया गया वह प्रण तुझे कब याद आएगा। अपना शरीर छोडने से पहले ही अपने को पहचान ले तभी तेरा रुतबा बढेगा और तू ऊंचाई को पाएगा।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

             *********

1. तालेह (Luck/Fortune/Lot/Destiny/Fate)

2. तानॖ (Blame/Reproach/Censure/Taunt/A biting sarcasm)

3. तऻलिब (Seeker/Candidate)

4. तऻलिब ॳलिम (Student/Pupil/Scholar)

5. तास (Cards)

               मुहावरॖ

1. मु: यॆति ताफ तति शुहुल

    अ: ज़िन्दगी अकि डंजि न

         रोज़ॖन्य,या, द्वख तॖ स्वख

         सॗत्य सॗत्य

2. मु: यथ कॊर तोबॖ सु आव

         रोबॖ

   अ: यि नॖ ज़रुरथ आसि ती बुथि

        प्यॊन

3. मु: यथ तिलॖवऻन्य ज़चि यि 

         तीलॖ फ्यॊर ति

    अ: बऺडिस दाग़स तल छु नॖ 

         ल्वकुट दाग़ नॊन नेरान

      (पनॖन्य शुर्य ह्यॆछॖनऻव्यूख)

**************************

पंचान्ग:- हऺकीमस तॖ हऻक्यमस निश गछ़ि दय रछुन। थानुक नाव बूज़िथॖय छु इन्सान त्रहरान। ताराचन्दस ओस नॖ पलि प्यवान ज़ि सुहऻय करि तॖ क्याह करि। एस एच ओ छु बार बार प्रछ़ान ॳमिस यि बम्ब कति आव। कुस ओसुय आमुत च़्यॆ निश। कऻत्याह पौंसॖ रऺटिथ। वगैरा वगैरा। ताराचन्द गव सारिनी सवालन जवाब दिवान तॖ पनॖन्य बे-ग्वनऻही सऻबित करनॖच कूशिश करान। ताराचन्दक्यन गैरिक्यन ति ॴस्य ज़न होश हवास डऺल्यमॖत्य। हेरच़ हॖन्ज़ साफ सफऻयी रूज़ ॳती सऻरी बऻच़ लऺग्य मसलस हल छ़ान्डनि। थानदारन प्रुछ़ ताराचन्दस ज़ि याद पाव ज़ि ॴखॖर क्याह चीज़ ओसुय च्यऻनिस गरस मंज़ यथ यूत बडि टास द्राव ज़ि महलस मंज़ बास्यव ज़ि बम्ब फॊट। पनॖनिस द्यमागस ज़ोर दिवान रूद ताराचन्द तॖ प्योस याद सु कॆम्यकॖल युस अज़ शॆ ऱयथ ब्रोंठ तऺमिस मऺशिथ ओस गोमुत गरी। मगर तथ कॆम्यकॖलस यूत बडि टास नेरुन। यॆकीन ओस नॖ यिवान ताराचन्दस। स्यज़रॖ पऻठ्य वॊन तामराचन्दन एस एच ओ हस ज़ि शोठस प्यव याद ज़ि अख केम्यकॖल ओस रूदमुत गरी कॆंह वख ब्रोंठ तॖ मुम्किन छु ज़ि सुय आसि प्योमुत कुठिच सफऻयी करान करान यथ टास आसि द्रामुत। थानदारन वुछ ताराचन्दस कुन युस वुन्यखताम च़म्यॊमुत ओस तॖ प्रुछ़नस नाव तमि कॆमिकॖलुक। सोडियम किनॖ पोटैश नावॖ सॗत्य अख केम्यकॖल छु युस पोन्य मेलनॖ सॗत्य फटान छु। ताराचन्दनि कथि प्यठ यकीन कऺरिथ वॊन थानदारन ॳमिस ज़ि च्योन वनुन अगर पॊज़ छु त्यॆलि प्यॆयि च़्यॆ पगाह सुय केम्यकॖल अनुन तॖ फाटनावुन असि ब्रोंहकनि। अगर सु कॆम्यकॖल फटि  तॆलि म्वकलख च़ॖ यॆमि अज़ाबॖ तलॖ नतॖ वाती यि शेछ ह्यॊर ताम तॖ पान म्वकलावुन गछ़ी मुश्किल तॖ एक्सपोलिसिव ऐक्टस तहत मेली कम अज़ कम सथ वऺरी सज़ा। ताराचन्दस प्यव याद सु कॆम्यकॖल तॖ तम्युक नतीजि पऻनिस सॗत्य मीलिथ। थानदारन सूज़ ताराचन्द गरॖ अथ शरतस प्यठ ज़ि पगाह गछ़ि सु थानस प्यठ हऻज़िर सपदुन सु कॆम्यकॖल ह्यथ ताकि कुनि दूर जायि गऺछ़िथ यी सु फाटनावनॖ। ताराचन्द गव ख्वश यि बूज़िथ। शुक्रिया कॊरुन थानदारस तॖ च़ीर्य रऻच़ पऺहरन वोत गर पनुन। गरॖ वऻतिथ वऺनिन गेरिक्यन बऻच़न यि कथ तॖ ॳम्यसॖन्ज़ि बऻयकाकॖनि ति प्ययि याद स्व बोतल य्यॊस ताराचन्दस पथकुन रूज़मॖच़ ॴस य्यॊस ॳम्य स्कूलॖ बापथ ॳन्यमॖच़ ॴस। आ यि आसिहे तऺथ्य टास द्रामुत। खऻर। पगाह ननि व्वंय असलियथ। बशाशथ गऺयि सारिनी गरस मंज़ मगर तनाव रूद बरकरार। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)