10.02.2021

10.02.2021 मागॖ (माघ) गटॖ पछॖ (कृष्ण पक्ष) च़्वदह (चतुर्दशी) ब्वदवार (बुद्धवार) श्री सप्तर्षि सम्वत 5096, नक्षत्र उषा, राश मकर (चलान) ऋतु शिशर (चलान)...अज़ छि शिव चतुर्दशी ति 

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

    महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

             लल वाक्

        (पराग पुस्तक- 196)

च़ालुन छु वुज़मलॖह तॖ त्रटय

च़ालुन छु मन्द्यन्यन गटॖकार

च़ालुन छु पान पनुन कडुन ग्रटय

ह्यतॖ मालि संतोष वाति पानय

             अर्थात

ललेश्वरी कहती है कि अध्यात्म को पाने के लिए कडक तथा बिजिलियां तथा दोपहर को गहन अंधकार सहन करने पडते हैं। ऐसा समझो कि चक्की के दोनों पाटों के बीच में पिसे जाने की पीडा को सहना है। जब संतोष तथा सहनशीलता प्राप्त होगी तो संतोष रखो कि लक्ष्य स्वंय ही पास आ पहुंचेगा।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

            *********

1. ज़िद (Stubbornness/Opposition)

2. ज़िद आसुन (To have anmity)

3. ज़िद्दी (Willful/Stubborn/Adamant)

4. ज़मीर (Conscience/Sense of right or wrong)

5. ज़मानथ (Security/Bail/Guarantee)

                  मुहावरॖ

1. मु: युपिस शुप डखॖ

    अ: खरॖच ज़्यादॖ आमदनी कम

2. मु: यथ वावॖ हालि च़ोंग कुस

         ज़ालि

    अ: मुसीबतस मंज़ जुर्रतॖच 

         कऻम अन्जाम दिन्य

3. मु: यथ कुलिस नॖ ग़ऻरथ स्व

         गयि अल

    अ: इन्सानस पज़ि ग़ऻरथ

         आसुन

      (पनॖन्य शुर्य ह्यॆछॖनऻव्यूख)

**************************

पंचान्ग:- हालांकि यिम पांच़वय बऻय ॴस्य अख ॳक्यसॖन्दि ख्वतॖ शरीफ तॖ स्यॆद्य, मगर यिथॖ पऻठ्य अथॖचि ओंगजि पांछ़ छॆ नॖ हिशय आसान तिथय पऻठ्य ओस नॖ यिमन बायन ति अख ॳकिस सॗत्य स्वभाव मेलान। यि छि प्रथ गरॖच कथा। ॳक्यसॖय माजि हॖन्द्य शुर्य मगर ॴब, आदत तॖ स्वबाव छु आसान ब्यॊन ब्यॊन। यि छु क्वदर्यतुक अख कऺरिष्मॖ। ताराचन्द  ओस साईनस ग्रेजिवेट तॖ बी एड ति ओसुन कॊरमुत। ॳमिस ॴस मीज्यमॖच़ सरकऻर्य स्कूलस मंज़ नोकरी तॖ ओस साईनस मास्टर बऺनिथ पनॖन्य कऻम सरअन्जाम दिवान।  दपान ताराचन्द ओसमुत ओस कऻबिल मास्टर तॖ ॳमिस ॴस्य अक्सर सोज़ान रोज़ान दूर दूर गामन तॖ गुठन। मगर ताराचन्दन छु नॖ ज़ांह ति नकार कॊरमुत या कांह शिकायत कऺरमॖच़। ज़्यादॖ स्यॊद आसुन ति छु नॖ जान रोज़ान। युथ स्यज़र छु कुनि कुनि सातन हदॖ नीरिथ अज़ाब तॖ न्वक्सान वातनावान। ताराचन्द ति बन्याव शिकार पनॖनि स्यज़रॖ बावॖ किन्य। चूंकि ताराचन्द ओस साईनस मास्टर, ॳमिस ओस प्यवान मंगनावुन स्कूलचि साईनस लैबोट्री खऻतरॖ कॆंह कॆंह सामान स्कूलक्यन लडकन तरबियत दिनॖ बापथ। चूंंकि यिमन गामन मंज़ ताराचन्द आव नोकरी करान तिमन गामन मंज़ ओस नॖ लड़कन हॖन्दि बापथ तिहॖन्दि ज़रुरत मुतऻबिक सामानॖ मेलान अवॖ म्वखॖ ओस ताराचन्द वखतॖ वखतॖ शहरॖ प्यठॖ साईनस लैबोट्री खऻतरॖ सामान मंगॖनऻविथ पतॖ लड़कन प्रक्टिकॖल वगैरा करनावान रोज़ान। स्यॊद शरीफ आसनॖ अलावॖ ओस यि ताराचन्द स्यठाह ईमानदार ति। द्वह अकि दपान प्यव ताराचन्दस पानय गामॖ प्यठॖ शहर युन तॖ स्कूल लैबोर्ट्री खऻतरॖ कॆंह कॆमॖकॖल सामानॖ मंगनावुन। यॆलि यॆलि ताराचन्द शहर यिवान ओस यि ओस पनॖनि गरि ति राथ खण्ड थख दिवान। येमि लटि ति हिसबॖ मामूल आव ताराचन्द पनुन गरॖ स्कूलुक सामानॖ मऺल्य ह्यथ तॖ कॊरुन गरिक्यन बऻच़न सॗत्य समाह गमाह। दॊयिमि द्वह यॆलि ताराचन्द तयऻरी ओस करान गाम गछ़नॖच, दपान ॳम्य तुल यि मऺल्य ओनुमुत स्कूलुक सामानॖ तॖ थॊवुन पनॖनिस बैगस मंज़। मगर दपान ग़लती सान रूद ताराचन्दस अख केमॖकॖल पथ कुन यॆमुक नॖ ॳमिस ज़्वन रूद तॖ द्राव गामकुन बाकय सामान ह्यथ। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)