25.02.2021

25.02.2021,मागॖ (माघ) ज़ूनॖ पछॖ (शुक्ल पक्ष) त्रुवाह (देवादेव) (त्रयोदशी) (देवादेव) ब्रसवार (ब्रहस्पतिवार/गुरुवार/वीरवार) श्री सप्तर्षि सम्वत 5096, नक्षत्र तिष्य, राश कर्कट (चलान) ऋतु शिशर (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

    महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

            लल वाक्

       (पराग पुस्तक- 211)

ब्रोंठ कऻल्य आसन तिथिय केरन

टंग च़ूंठ्य पपन च़ेरन सॗत्य

माजि कोरि अथवास कऺरिथ तॖ नेरन

द्वह द्यन बरन गऻरन सॗत्य

           अर्थात

यह एक भविष्य वाणी की गई है कि आने वाले समय में सेब नाशपाती तथा खूबानी सब एक साथ ही पकेंगे और मां बेटी हाथ में हाथ डाल कर घर से निकलेंगी और सारा दिन दूसरों के साथ बिताएंगी।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

            **********

1. ग़ऻयलॖ (Accident/Betrayal/Misadventure)

2. ग़लीचॖ (Carpet)

3. ग़ब (Shoot/Sprouting leaf)

4. ग़बन (Embezzlement/Misappropriation)

5. ग़ुबार (Ill feeling/Heart burning/Full of revenge/Astrangement)

               मुहावरॖ

1. मु: यस वऺछ़ नऺर तऺम्य ख्यॆयि 

         लूकॖहॖन्ज़ लऺर

    अ: जिसमऻनी ताकतुक ज़ोर,

         या, ताकतुक बे-जा 

         इस्तिमाल

2. मु: यस यि करुन सु ति करान

         नाहकय मारान वुकुर पान

    अ: गाटॖल्य करान पनॖन्य कऻम

         बेकॖल मारान पान नाहकय

3. मु: यस लॊग करॖ करॖ सु करि

    अ: युस कॆंह करुन छु यछ़ान

          सु छु करान

        (पनॖन्य शुर्य ह्यॆछॖनऻव्यूख)

**************************

पंचान्ग:- कऺशीरि मंज़ छु वंदस मंज़ तापमान याने हरारत नफी याने सिफर डिग्री ख्वतॖ कम शुराह डिग्री ताम ति गछ़ान। तॗर छि यथ हदस ताम वातान ज़ि नलकन मंज़ पकवुन पोन्य छु शिठिथ गछ़ान तॖ पोन्य युन छु बंद गछ़ान। यि छुस बॖ तिमन शुर्यन ताम वातनावुन यछ़ान यिमव नॖ यि नज़ारॖ वुछमुत आसि। म्यॆ छु याद यिवान ज़ि अकि वऺरियि ओस कऺशीरि मंज़ जीलॖ डलुक पोन्य शिठ्यॊमुत, तुलॖकतुर ओस लॊगमुत तॖ यूत सख तुलॖकतुर ओस ज़ि जीलि डलस मंज़ आयि जीप चलावनॖ। कॆंह शुर्य मा गछ़न यिथ बूज़िथ हऻरान मगर यि छि अख हकीकत। गरन मंज़ नलकव मंज़ॖ पोन्य युन बंद गछ़नॖ म्वखॖ छि अनान च्यनॖ बापथ पोन्य सरकऻर्य नलकव प्यठॖ। यिम सरकऻर्य नलकॖ छि प्रथ मऺहल्लस मंज़ आमॖत्य थावनॖ। चूंकि तिमन नलकन हुन्द गॊल छु हना खॊल पाहन आसान तिमन नलकव मंज़ छि पानिच दार पकवॖन्य रोज़ान। म्यॆ छु याद यिवान ज़ि ॳस्य ॴस्य पनॖन्यन गरिक्यन नलकन हॊख गासॖ गन्डान तॖ दिवान ॴस्य तथ गासस च़ॖख तॖ तमि गासॖ दज़नॖ सॗत्य ओस शिठ्यॊमुत पोन्य कुम्हलान तॖ पॊन्य ओस पकान नलकॖ मंज़ॖ। यिमन गरन नलकॖ ॴस्य आसान त्रॆयमिस या च़ूर्यमिस पोरस प्यठ तिमन गरन ओस नॖ प्रशर कम आसनॖ म्वखॖ ह्यॊर ताम पोन्य वातानॖय। पोन्य ओस प्यवान सारुन दूर दूर जायि प्यठॖ। यि कऻम ॴस आसान मटि नवजवानन, ल्वकट्यन लऺडकन, कोर्यन, केंच़न गरन ॴस्य मुसलमान आसान पोन्य सारान। तस छि वनान पान्युर। तॆलि ॴस्य गरॖ आसान बऻच़व सॗत्य बऺरिथ। मान मऻनि मंज़ ॴस्य नॖ पतहॗय लगान ज़ि कुस क्वस कऻच़ाह कऻम ओस करान तॖ कामि अंद वातनावान। अज़कल छु अथ माहोलस ति कति कोर बदलाव आमुत। गरन मंज़ छि नॖ शुर्य नज़री यिवान, यिन ति किथॖ पऻठ्य नज़र। यॆलि नॖ शुर्य ज़्यवरावनुक रिवाजी रूद। अज़कल छि सऻन्य शुर्य त्रॖह दोयत्रॖह वुहिर्य वऻत्यमॖत्य मगर छि अनहॗरी। तिम कर करन खान्दर तॖ कर ज़्यनुक शुर्य तॖ कर बऺडरावनख यि छि सोंचनस लायक़ कथ। कऺशीरि न्यबर नीरिथ छि गरॖ ति व्वंय छ़ोकॆमॖत्य। अख बोय ॳकिस जायि रोज़ान, ब्याख बोय ब्यॆयिस जायि, मोल मऻज्य त्रेयिमि जायि। जायि हॖन्ज़ व्यछ़य। फ्लैट छि यि दप्यज़ि ति क्वकर मुर्य हि बासान। यिमनॖय मंज़ छि रोज़ान व्वंय च़ॖ तॖ बॖ तॖ लुतॖ बब। कशीरि हुन्द कठकॊश तॖ कठकऺशिस मंज़ कऻशिर्यन हॖन्द्य द्वह कडॖन्य ति ॴस अख अलगॖय नज़ारा आसान।कऺशीरि हॖन्दिस वंदस छि जऻनी ति खऻमी ति वारियाह। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक म्योन सबक़ podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)