26.02.2021

26.02.2021,मागॖ (माघ) ज़ूनॖ पछॖ (शुक्ल पक्ष) च़्वदह (देवादेव) (चतुर्दशी) (देवादेव) शॊकुरवार (शुक्रवार/जुम्मा/भार्गवार) श्री सप्तर्षि सम्वत 5096, नक्षत्र आश्ले, राश सिंह (दुहचि 12.34 बजि प्यठॖ), ऋतु शिशर (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

     महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

            लल वाक्

      (पराग पुस्तक- 212)

कोसम बागस ह्यॊतमय अच़ुन

पच़ियय मन तॖ अच़ुन प्राव

स्वरूप दर्शन छु तॊतुय अच़ुन

कॊत छुय गछ़ुन पकुन त्राव

            अर्थात

मैं कुसुम वाटिका में प्रवेश करने लगी। तुम चाहो तो प्रवेश करो। वहां ही घुसने से स्वरूप का दर्शन होगा। इधर उधर जाना छोड दे। जहां आनन्द की प्राप्ति अर्थात स्वरूप दर्शन हो वहां प्रवेश करो। इस के लिए कहीं नहीं जाना है। यह सब अपने अंदर ही है।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

           ********

1. ग़प शप (Chit chat/Idle talk)

2. ग़दॖर (Mutiny/Revolt)

3. ग़दार (Mutineer/Treacherous)

4. ग़ॖज़ाह (Diet/Nourishment)

5. ग़रॖज़ (Selfishness/Interest/Motive/Purpose/Intention)

             मुहावरॖ

1. मु: यस लगि मरॖ मरॖ सु मरि

    अ: युस छु नॖ यछ़ान सु छु पथ

         रोज़ान

2. मु: यस वथ रावि तस हावन 

         दऺह, यस कथ रावि तस

         हावि नॖ कांह

    अ: प्रथ कांह छु वथ रावन 

         वऻलिस वथ हावान मगर

         कथ रावन वऻलिस ह्यॆकि नॖ

         कांह मदद कऺरिथ

3. मु: यस कोरि खान्दर स्व कूर

         ल्वबरन

    अ: दिलचस्पी बगऻर कऻम 

         करॖन्य,या, वखतस प्यठ

         नॖ कऻम करॖन्य

      (पनॖन्य शुर्य ह्यॆछॖनऻव्यूख)

**************************

प़चान्ग:-  शीना प्यतो प्यतो मामा यितो यितो। कऺशीरि मंज़ ओस यि मिस्रॖ प्रथ ॳकिस ज़्यॆवि प्यॆतिस प्यठ आसान। 1990-तॖ प्यठॖ युस ति कांह कऻशुर बच्चॖ या बच्ची ज़न्मस आव या आयि कऺशीरि न्यबर नीरिथ, दय ज़ानि यिमन त्रॖहन अकत्रॖहन वऺरियन मंज़ कऻत्याह बच्चव आसि शीन वुछमुत कऺशीरि मंज़ प्यवान या प्योमुत। युस ति कांह अथ मोकस कऺशीरि गोमुत आसि तॖ शीन आस्यन छोवमुत, सु ह्यॆकि म्यॆ फोनस प्यठ वऺनिथ या व्हाटसापस प्यठ लीखिथ पनुन तजरुबॖ क्युथ छुस रूदमुत कऺशीरि गऺछ़नॖ पतॖ। यिमव नॖ शीन कऺशीरि मंज़ प्यवान या प्योमुत वुछमुत छु तिहॖन्दि बापथ छु म्यॆ वनुन ज़ि कऺशीरि मंज़ शीन यॆलि प्यवान छु, स्यठाह मनोहर दृश्य छु आसान। मन छु करान शीनस मंज़ॖय रोज़हऻव नच़वुन। पशॖक्यन किनारन प्यठ छि शिशरगऻन्टॖ लगान। शीनॖ वोन्य छु क़तरॖ क़तरॖ समान गछ़ान तॖ शिठान सॗत्य सॗत्य तॖ तथ छि ज़ीठ ज़ीठ शिशरगऻन्ट बनान। शीनस छु कठकोश ति लगान तॖ कठकऺशिस प्यठॖ पकुन छु बडॖ मुश्किल आसान ति क्याज़ि रिकिन गछ़नुक छु खतरॖ रोज़ान। कॆंह शुर्य छि शीनॖ इन्सान बनावान रोज़ान,  कॆंह शुर्य छि गऺडवस मंज़ द्वद थऻविथ तथ मंज़ मऺदर्यैर तॖ मलऻय रलऻविथ द्वन त्र्यन गन्टन शीनस तल थवान तॖ यॆलि शीनॖ तलॖ कड़ान न्यबर तथ छि आसान मज़दार मलाय कुल्फी बन्यॆमॖच़। कॆंह छि शीनॖ थॊस्य अख ॳकिस लायान तॖ कॆंह छि शीनॖ जंग करान रोज़ान। कम कम तमाशॖ छि यिवान करनॖ शीनस मंज़। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

************************** 

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक म्योन सबक़ podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)