11.02.2021

11.02.2021 मागॖ (माघ) गटॖ पछॖ (कृष्ण पक्ष) मावस (अमावस्या) ब्रसवार (ब्रहस्पति/ वीरवार/गुरुवार), श्री सप्तर्षि सम्वत 5096, नक्षत्र श्रवण, राश कुम्भ (रऻच़ हॖन्ज़ॖ 2.10 बजि प्यठॖ) ऋतु शिशर  (चलान)...ॳज़्यकि प्यठॖ छु द्रठॖपऻन्च़ुक (पंचक) शुरु

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

      महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

             लल वाक्

        (पराग पुस्तक- 197)

ऒमुय आद्य तय ऒमुय सॊरुम

ऒमुय ठहरुम पनुन पान

अन्यथ त्रऻविथ न्यथॖय बोसुम

तवय प्रोवुम परमसथान

              अर्थात

ओम ही आद्य है इस लिए ओम का ही स्मरण किया। ओम को अपना आप ही मान लिया। अनित्य को छोड कर नित्य अर्थात ईश्वर का ही आभास हो गया। इसी कारण ओम की उपासना से मैं ने परम स्थान पा लिया।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

           *********

1. ज़यीफ़ (Weak/Feeble/ Frail)

2. ज़िमॖनन (Incidentally/By the way/By implication)

3. ज़रूरी (Surely/Certainly/Definitely/Without fail)

4. ज़रूरथ (Need/Want/Necessary)

5. ज़रूरथमंद (Needy/Poor)

               मुहावरॖ

1. मु: यथ गामस नॖ गछ़ुन तमि 

         गामुक नाव क्या ह्यॊन

    अ: यॊसॖय कऻम ह्यकव नॖ 

         कऺरिथ तथ क्या अथय 

         लागुन

2. मु: यथ नम अच़ि तथ क्या छु

         शॆशतॖर लागुन

    अ: सहल कऻम क्याज़ि छि

         मुश्किल बनावॖन्य

3. मु: यथ लछस ति चरसॖय

    अ: खर्च कऺरिथ ब्यॆयिहऻन खर्च

         करनस नॖ खोच़ुन

       (पनॖन्य शुर्य ह्यॆछॖनऻव्यूख)

**************************

पंचान्ग:- ताराचन्द वोत गाम तॖ गव मशगूल पनॖनि कामि सॗत्य याने स्कूलचि कामि सॗत्य। शहरॖ न्यस्बतॖ ॴस गामन मंज़ चहल पहल स्यठहॗय कम आसान तिमन दॊहन। ख़ास कर युस ति कांह शहरुक नोकरी पेशॖ ओस गामस मंज़ नोकरी करान रोज़ान तम्यसुन्द वॊथुन बिहुन ओस आसान महदूद। डॆरॖ प्यठॖ दफ्तर तॖ दफ्तरॖ प्यठॖ डेरस प्यठ। दिल बऺहलऻयी हॖन्द्य सादन ति ॴस्य स्यठाह कम आसान यि दऺप्यज़ि ति न आसनस बराबर। तमि मऺज़ीद छु म्यॆ पनॖन्यव ॳछव वुछमुत तॖ कनव बूज़मुत ज़ि स्कूल मास्टर छु नॖ ज़्यादॖतर लगॖहार आसान फज़ूल खर्ची करनस मंज़। यि कथ छि अज़ ति सऺही ज़ि मास्टर जी छि ऒमूमन कॊंजूस आसान। ताराचन्द ति दपान ओस कम खर्चान तॖ कम फ़ेरान थोरान। न ज़ाने सिगरेट च्यॊन, न तास गिन्दुन तॖ न शराब च्यॊन। अमि रऺन्ग्य ओस मास्टर जी यिवान मानॖनॖ तहज़ीब तॖ तऺमीज़दार। अज़कलुक ह्यु माहोल ओस नॖ कऺशीरि मंज़ अज़ शेठ वऺरी ब्रोंठ। लऺडकन ओस हऻबथ आसान मास्टर जियुन। शर्मो हय्या ओस आसान लऺडकस या कोर्यि पनॖनिस मास्टर सुन्द।  तिमन दोहन ओस नॖ कऺशीरि मंज़ टी वी ति आसान।  गामस मंज़ ओस वैसे ति युन गछ़ुन स्यठाह कमॖय आसान। अंदाज़ ह्यॆकि कांह ति लगऻविथ ज़ि ज़िन्दगी कऻछ़ा स्यॊद सादॖ ॴस आसान, कॊफॆचि आसॖ नॖ आसान। खऻर। ताराचन्दस गव मऺशथॖय ज़ि अख ल्वकॖट केमिकॖल  बोतल छि रूज़मच़ गैरीय। द्वह गयि नेरान। हफ्तॖ, ऱयथ, ज़ॖ ऱयथ च़ोर ऱयथ शे ऱयथ। शहरॖ गरस मंज़ रूज़मॖच़ यि केमिकॖल बोतलि हुन्द ज़िकिर कॊर नॖ कऻन्सि। अल्बतॖ गर्यक्यव बऻच़व तुज यि बोतल तॖ थऺवॖख ताखचस प्यठ यि वऺनिथ ज़ि हय हे ताराचन्दस छि रूज़मॖच़ अख बोतल यॆती। यि बोतल रूज़ यिमन श्यन ऱयतन तऺथ्य ताखचस प्यठ यॆतिनस यि थावनॖ ॴस् आमॖच़ शॆ ऱयथ ब्रोंठ। हेरच़ हुन्द वख ओस। साफ सफऻयी करनस मंज़ ॴस्य गरिक्य बऻच़ लऺग्यमॖत्य। ताराचन्द ति छु आमुत बॊड द्वह मनावनि पनुन गरॖ। पनॖनिस कुठिस सफऻयी करान करान द्युत ताराचन्दन कुठ्युक छ़ॊठ दारि किन्य दऻरिथ। अथ छ़ॊटस सॗत्य प्यॆयि दारिकिन्य अनज़ऻनी मंज़ यि पऺत्यम्यव श्यन ऱयतन हॖन्ज़ ताखचस प्यठ थऻवमॖच़ कॆमिकॖल बोतल ति। सतरन्ड दॖनॖनॖ विज़ि आयि ताराचन्दस क्याहताम बोतल फॖटनॖच आवाज़ ति मगर आवाज़ कऺरॖन अनसुनी यि ज़ऻनिथ ज़ि क्याहताम गव छ़ॊटस सॗत्य। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)