12.02.2021

12.02.2021 मागॖ (माघ) ज़ूनॖ पछॖ (शुक्ल पक्ष) ऒक्दॊह (प्रथमा) शॊकुरवार (शुक्रवार जुम्मा भार्गवार) श्री सप्तर्षि सम्वत 5096, नक्षत्र धनि, राश कुम्भ (चलान) ऋतु शिशर (चलान)...द्रठॖपऻन्च़ुक (पंचक) (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

       महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

               लल वाक्

        (पराग पुस्तक- 198)

दमी डींठॖम नद वहवनी

दमी ड्यूंठुम सुम न तॖ तार

दमी डींठॖम थऺर फ्वलवॖनी

दमी ड्यूंठुम गुल न तॖ खार

              अर्थात

अपने जन्मों के बारे में कुछ जानकारी देते यह वाक्य कहा गया है। एक समय पर मैं ने देखी एक नदी कम पानी वाली फिर इस नदी को गरजते हुए पाया अर्थात पानी से इतना लबालब भरा पाया कि उस पर न पुल या पार जाने की जगह ही या कोई घाट ही था। एक बार मैं ने देखी फूलों की एक झाडी खिली हुई थी कभी मैं ने देखी कि इस में न पुष्प ही थे न कांटे ही। इस वाक् में संसार की अस्थिरता प्रतिपादित होती है।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

              ********

1. ज़रूरी (Necessary/Expedient/Important/Obligatory)

2. ज़रूरियात (Necessities/Requisites)

3. ज़रूरियात ज़िन्दगी (Necessities of life)

4. ज़ियाफ़त (Feast/Banquet treat/Entertainment)

5. ज़रूरथ प्यॆन्य (To have the need of)

                  मुहावरॖ

1. मु: युथ कॊर तऺम्य त्युथ करस

         बॖ ति

    अ: नखॖ वालुन,या, बदलॖ ह्यॊन

2. मु: युथ वुछख त्युथ वुछय

    अ: अमलि मुतऻबिक सज़ा तॖ

          जज़ा,या, वरताव हिशर

3. मु:  युथ व्वसतादॖ त्युथ च़ाठ

    अ: ह्यिविस ह्यु आसुन

       (पनॖन्य शुर्य ह्यॆछॖनऻव्यूख)

**************************

प़चान्ग:- ताराचन्दन कऺर पनॖनि कुठिच सफऻयी तॖ लॊग कथताम ब्यॆयि कामि सॗत्य। अमि ब्रोंह ज़ि ताराचन्द निपटाविहे ब्याख कऻम दडाम आवाज़ आयि तपऻर्य किन्य यपऻर्य ताराचन्दन कुठिच सतरऺन्ड दॖन्यमॖच़ ॴस। आवाज़ गऺयि यीच़ बडि ज़ि ॳन्द्य पऺख्य गरव मंज़ द्रायि क्रख ज़ोरॖ या ख्वदायो, बम्ब हा फॊट। अमि क्रॆकि सॗत्य आयि सऻरी मुसलमान पनॖन्यव पनॖन्यव गरव मंज़ नीरिथ तॖ गयि जमा गछ़ान ताराचन्द सॖन्दिस मकानचि  तमि तरफॖ यॆमि तरफॖ ताराचन्दन सतरऺन्ड दॖन्यमॖच़ ॴस। ताराचन्द तॖ तऺम्यसॖन्द्य गरक्य बऻच़ ति द्रायि न्यबर यि वुछनि ज़ि यि शोर क्युथ तॖ कपऻर्य आव। जमा गऻमॖत्य लूकव यिम तकरीबन सऻरीय मुसलमान ॴस अमि मऺहल्लॖक्य मंज़ॖ दिच़ बडि क्रख ज़ि  बटव हा फाटनोव बम्ब यॆति। ब्यॆयि कऺम्य ताम दिच़ आवाज़ हयॊ वुछान क्या छिवॖ पुलसस कऺर्यवुह इतिलाह। यूत माय महोब्बत मऺहलक्यन मुसलमानन ताराचन्दक्यन गरिक्यन बऻच़न सॗत्य ओस, वुछान वुछान गऺयि तिम माय महोब्बतचि नज़रॖ फीरिथ तॖ सऻरी लऺग्य ताराचन्दस तॖ तऺम्यसॖन्द्यन गरिक्यन बऻच़न कुन शकावर नज़रि वुछनि। सवालन प्यठ सवाल आयि करनॖ यिमव लूकव दऺस्य ताराचन्दस तॖ बिचोर ताराचन्द रॊटुख ज़न च़ूरॖ हान्च़ि। ॳम्य दोर मोन। यि गव रॊबूदॖ ह्यु खडा। पलि प्यव नॖ ॳमिस ति ॴखॖर यि टास हय यूत बॊड द्राव, यि क्याज़ि तॖ किथॖ पऻठ्य द्राव। हयो बायि म्यॆ कथ छिवॖ प्रॖछ़ान। बॖ क्याज़ॖ लायहऻ बम्ब। म्यॆ क्याह दुशमनी ॴसा कऻन्सि सॗत्य। ताराचन्द गव पनॖनि तरफॖ सफऻयी दिवान मगर लूकॖ मॊत गव अनिगॊट। कऻन्सि बूज़ नॖ ताराचन्दुन यॊत ताम पुलीस प्यव वऻतिथ। यि तॊर नॖ फिकिरी ज़ि पुलिस आव कपऻर्य। या आसि अमि टासॖच आवा्ज़ पुलसॖ थानस ताम वऻच़मॖच़, नतॖ छु यिमवॖय जमा सपद्येमॖत्य लूकव मंज़्य कांह गोमुत तॖ पुलीसस इतिलाह कॊरमुत। लॊग पुलिस तफ्तीश करनि पनॖनि आयि। जायि वऻर्यदातस प्यठ वऻतिथ ब्यूठ हवालदार सऻब प्रॖछ़गऻर करनि तॖ फीर्य फीर्य छु ॳमिस इशारॖ मेलान ज़ि यि बम्ब छु फाटॖनोवमुत ताराचन्दन। कऺम्यताम वॊन यि बटॖ छु नॖ यछ़ान मुसलमान गछ़न यॆति बसॖन्य। ब्यॊन ब्यॊन लूकव दित्य अलग अलग तरक यि सऻबित करनॖ बापथ ज़ि ताराचन्दन फाटॖनोव बम्ब। ताराचन्द गव हयबुन्गॖ ह्यु सोंचान छु ज़ि ॴखॖर गव हय तॖ गव क्याह। ताराचन्दन्य गरिक्य गऺयि हालि हऻरान तॖ ज़न गऺल्य गऺल्य। कऺशीरि मंज़ ओस नॖ बटॖ गरस पुलसॖ सॖन्ज़ छ़ाय ति प्यवान तॖ व्वनॖज़ांह तिनॖज़ांह कुनि सातन यॊदवय स्व नोबथ यिवान ॴस, सु बटॖ गरॖ ओस दारि बर त्रॊपरिथ बिहान अंदर तॖ ॳहलस तॖ मऺहलस ॴस पारय लगान ज़ि फलऻन्य बटॖ गरस आव पुलीस। म्वखसरॖ यीर पीर आया तॖ पकडो लंगूर को। ताराचन्दस कुन कॊर सारिवॖय इशारॖ तॖ पुलीसन न्यू ताराचन्द पुलीस थानस प्यठ ब्रोंहकुन कारवऻही करनि बापथ। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)