24.02.2021

24.02.2021,मागॖ (माघ) ज़ूनॖ पछॖ (शुक्ल पक्ष) बाह (देवादेव) (द्वादशी) (देवादेव) ब्वदवार (बुद्धवार) श्री सप्तर्षि सम्वत 5096, नक्षत्र पुनर्वस, राश कर्कट (सुबहॖचॖ 7.9 बजि प्यठॖ)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

      महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

               लल वाक्

         (पराग पुस्तक- 210)

सबूर छुय ज़्युर मरॖच़ तॖ नूनॖय

ख्यनॖ छु ट्यॊठ तॖ ख्यॆयस कुस

सबूर छुय स्वनॖ सुन्द दूरॖय

म्वल छुय थॊद तॖ ह्यॆयस कुस

            अर्थात

धैर्य एक ऐसा कडवा पदार्थ है कि इसे ग्रहण करना कठिन है। यह सोने की तरह अत्यन्त मूल्यवान है। इस को खरीदना भी कठिन है। अर्थात धैर्य एवं सहनशीलता कोई विरला ही पा सकता है।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

             ********

1. ग़ऻरथ (Bravery/Venture/Boldness/Courage)

2. ग़ार (Den/Cave/Pit)

3. ग़ऻफिल (Inattentive/Unmindful/Negligent)

4. ग़ऻलिब (Predominant/Name of a poet)

5. ग़ऻल्यबन (Nearly/Approximately/Probably)

               मुहावरॖ

1. मु: यज़थ छु पनॖन्यन अथन 

         मंज़

    अ: पनॖनिस दसतारस पानॖ 

         थफ करॖन्य

2. मु: यज़तॖच हार बेज़ती हॖन्ज़

         खार छॆ नॖ बराबर

    अ: इन्सान छु यज़तॖ ब्वछ,या,

         यज़तस छु क़दॖर

3. मु: यॆच़ गऺयि म्यॆच़

    अ: ज़यादॖ आसनस छु नॖ क़दॖर

         या, ज़्यादती छि बेक़दरी

        (पनॖन्य शुर्य ह्यॆछॖनऻव्यूख)

**************************

पंचान्ग:- राथ वुछ असि ज़ि कऺशीरि मंज़ कम कम पलव ॴस्य यिवान लागनॖ वंदस मंज़। हालांकि मोसमस मंज़ छु ज़बर्दस्त बदलाव आमुत अज़कल मगर म्यॆ यॆलि पनुन ल्वकचार याद प्यवान छु ज़ि किथॖ पऻठ्य ॴस्य ॳस्य द्वह कड़ान वंदस मंज़, तॗरि कऺन्ड्य छि वुनि ति फटान यान्य तिम द्वह ॳछन तल यिवान छि। बॖ छुस यछ़ान ज़ि असि पज़ि पनॖन्यन शुर्यन पनुन प्वतकाल बावुन मंज़्य मंज़्य तिथय पऻठ्य यिथॖ पऻठ्य सानि नानि आसॖ असि पऺरियन हॖन्ज़ॖ कथॖ बोज़नावान। ख़बर सऻन्य शुर्य गछ़ना वापस कऺशीरि मगर तिमन ज़ानुन छु ज़रूरी ज़ि तिहॖन्द्यव ज़िठ्यव किथॖ पऻठ्य छि पनॖन्य वऻन्स कऺडमॖच़ कऺशीरि मंज़। वन्दॖ यिनॖ ब्रोंठॖय ॴस्य वंदॖच तयऻरी प्यवान करॖन्य। ज़्युन ॴस्य अनान मनॖवादॖ, वीरि ज़्युन, कायुर ज़्युन, हतबॖ ज़्युन, बॊठ, च़ॖनि, स्यॊद च़ॖनि, पन्नॖ च़ॖनि बॊहरि, कॊश। ज़्युन ओस यिवान फालनावनॖ तॖ फालनऻविथ ॴस्य करान ज़िनिस बनॖ। ज़िन्य बनॖ ॴस्य बनावान आंगनस मंज़ तथ कूनस मंज़ यॊत नॖ रूद या शीन वातिहे। अक्सर ॴस्य वंदस मंज़ ज़्युन थवान गानस मंज़ या ब्रऻर्यकऻनी मंज़। बॊठ च़ॖनि ति ॴस्य थवान गानस या ब्रऻर्यकऻनी मंज़ ताकि शीनुक या रूदुक असर प्यॆयि नॖ। दानॖच जाय रऺट गैस-चूलन। ज़्युन ज़ालनॖच प्रथा गऺयि ख़तम। सॗती छु नॖ व्वंय बॊठ ति यिवान अनॖनॖ। च़ॖनि छि वंद्य वंदस प्यवान ज़रूरथ। तमि बापथ छि कांगॖर इस्तिमाल सपदान। कांगरि मंज़ च़ॖनि बरान तॖ प्यठ त्यॊंगुल बनाविथ कांगॖर बनावान वहवॖन्य। गरस मंज़ यीत्य बऻच़ ॴस्य आसान तीच़ॖ कांगरि ति आसॖ आसान। हालांकि ल्वकट्य शुर्य ॴस्य कांगॖर कमॖय पाहन तपान रोज़ान मगर बऺड्य ॴस्य सऻरी कांगरि लऻर्य। नारॖ कांगर ॴस आसान बऺरिथ य्यॊस दुहकिस दॊहस पोशान ॴस। कॆंह लूख ॴस्य रातस ति कांगॖर ह्यथ श्वॊंगान। वारियाह हऻदिसॖ ॴस्य सपदान ख़ास कर यॆलि कांगॖर फ़ेरान ॴस। कांगॖर फ़ेरॖन्य मतलब ओस ज़ि कांगॖर ॴस दुबॖ गछ़ान, या हऺज्य गछ़िथ कांगरि हुन्द  नार बिस्तरस प्यठ प्यवान तॖ बिस्तरॖ दज़ान। पलव दज़ान। वखॖतस पनुन पान ति दज़ान। कांगरि हॖन्द्य कारनामॖ छि रूद्यमॖत्य ग्रॆन्दि रॊस मगर कांगॖर गऺयि नॖ अलग ज़ांह। गरन मंज़ ॴस कांगॖर तपान मगर दफतरन मंज़ आसॖ बुखारि आसान। यिम बुखारि छि अज़कल ति दफतरन मंज़ चलान। बुखार्यन मंज़ छु ज़्युन यिवान ज़ालनॖ। म्यॆ छु याद प्यवान ज़ि ॳस्य ॴस्य मंज़्य मंज़्य कांगरि मंज़ नारॖ क्रॊछ़ त्रावनावान कान्दर सॖन्दि दऺस्य। सु ओस तॊंदरु मंज़ नारॖ क्रॊछ़ कड़ान तॖ कांगर्यन त्रावान रोज़ान। कांगॖर ॴस्य फ्यरनस तल तपान। कॆंच़न लूकन ॴस जोश तॖ ज़्यादॖ कांगॖर तपनॖ सॗत्य ज़ंगन नारॖ तऺत्य गछ़ान। यिम नारॖ तऺत्य ॴस्य ज़्यादतर नज़र यिवान वृद ज़नानन। गैस चूलॖ आसनॖ सॗत्य छु नॖ व्वंय ज़्युन यिवान ज़ालनॖ तॖ न छु बठ्युक प्यवान ज़रूरथ। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक म्यॊन यि सबक़ podcast दऺस्य ति)ं

https://anchor.fm/bldeep 

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)