22.02.2021

22.02.2021,मागॖ (माघ) ज़ूनॖ पछॖ (शुक्ल पक्ष) दऺहम (देवादेव) (दशमी) (देवादेव) च़ऺन्दॖरवार (सोमवार) श्री सप्तर्षि सम्वत 5096, नक्षत्र मृग, राश मिथुन (चलान) ऋतु शिशर (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

     महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

              लल वाक्

        (पराग पुस्तक-208)

वुछान तॖ बो छस सऻर्यसॖय अंदर

वुछुम प्रज़लान सऻर्यसॖय मंज़

बूज़िथ तॖ रूज़िथ वुछ हरस

गरॖ छुय तसुन्दुय बो क्वस लल

            अर्थात

जब मैं ने सब में झांका तो उसी को पाया। अपने शरीर में भी उसी को देखा। फिर यह लल नाम किस का है। 

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

              *******

1. गऻब (Absent/Invisible/Vanished/Concealed)

2. गऻब करुन (To hide/To make something disappear)

3. गऻबथ (Back biting/Speak ill of others)

4. गऻर (Outsider/Water chestnuts)

5. गऻर जऻनिबदार (Neutral)

               मुहावरॖ

1. मु: यॆड दग गऺयि बऺड दग

    अ: रिशवत दिथ कऻम कडॖन्य,

         या, ख्यऻविथ च्यऻविथ कऻम

         करॖनावॖन्य

2. मु: यॆड निशि छु कॊठ दूर

    अ: पनुन गव पनुन व्वपर गव

          व्वपरॖय

3. मु: यॆड खॊखॖज्य

    अ: नमिथ पऺकिथ कऻम अंद

         वातॖनावॖन्य

      (पनॖन्य शुर्य ह्यॆछॖनऻव्यूख)

**************************

पंचान्ग:- ॳस्य आयि वुन्युखताम कऺशीरि मंज़ पनॖन्यन गरन मंज़ यिम बानॖ ॴस आसान तिमन हॖन्द्य कऻशिर नाव ज़ानॖनॖच कूशिश करान। बानन सॗत्य सॗत्य ॴस्य ब्यॆयि ति कॆंह चीज़ आसान यिम ॳस्य तति इस्तिमाल ॴस्य करान रोज़ान। छोम्फ, पर्युन, शुप, लछ़ुल, क्रेन्जुल, टूकॖर, ज़ऻन, फुक्यन, कन्ज़, मुहुल। फर्शस मंज़ ओस आसान वगुव, पतॖज्य, सतरऺन्ड, मसनन्दॖ, नमदॖ, कऻलीनॖ, तऺक्ययि, शांदगॊन्ड, च़ऻन्गिज, यारि कऻम कऺरिथ गब्बॖ। कऺशीरि मंज़ ओस नॖ अक्सर गरन मंज़ ब्यड आसान तॖ न ॴस सोफॖ आसान। मगर यिम तति कॆंह नऺवि लरि आसॖ बनॆमॖच़ॖ नव्यन नव्यन जायन तति ॴस यि व्यवस्था शुरु गऻमॖच़ याने ब्यड, सोफॖ, कुरसी बेतरि। कन्ज़स मंज़ ॴस्य दानि मुनान, व्वज़ॖल्य मर्च़वांगन दगान,परिनि सॗत्य ॴस ओट छानान, शुपि सॗत्य ॴस्य त्वमुल छ़टान, तत्वमुलस स्युर कड़ान, त्वमुल च़ारान, कन्नॖ कडान।यिम सारॆय कामि आसॖ सानि माजि, ब्यॆनि, न्वशि कोरि पानय करान रोज़ान। कुनि कुनि सातन ॴस्य सिर्य बत्तॖ  बनावान तॖ ख्यवान। मगर व्वंय आव सऻर्यसॖय बदलाव। तयार शुद्दा छु सोरुय मेलान। छ़टुन छु नॖ, च़ारुन छु नॖ, छानुन छु नॖ, दगुन छु नॖ, मुनुन छु नॖ, बानॖ छि नॖ पानॖ सुरनावॖन्य या छलॖन्य। अज़कल छि नॖ डुवान ति पानॖ ॳस्य। नज़ाकत वनव अथ या पनॖन्य मजबूरी या असि बासान व्वंय यी ज़रूरी। यि कॆंछ़ा म्यॆ वॊन अज़ यि छु तिमन शुर्यन हॖन्दि बापथ यिम कऺशीरि न्यबर लऺग्य तॖ यिम सान्यन प्रान्यन चीज़न सॗत्य नावऺकॖफ रूद्यमॖत्य छि।  कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)