28.02.2021

28.02.2021, फाल्गुन (फाल्गुन) गटॖ पछॖ (कृष्ण पक्ष) ऒक्दॊह (देवादेव) (प्रथमा) (देवादेव) आथवार (रविवार/ ऐतवार),श्री सप्तर्षि सम्वत 5096, नक्षत्र पूफा, राश कन्या (दुहचि 3.6 बजि प्यठॖ), ऋतु शिशर (चलान)..अज़ छु हुर्य ऒक्दॊह

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

    महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

              लल वाक्

        (पराग पुस्तक- 214)

श्रान तय ध्यान क्या सन करे

च़्यतस रठ त्रकरॖय वग

मनस तॖ पवनस मिलवन करॖय

सहज़स मंज़ कर तीर्थ स्नान

             अर्थात

स्नान, ध्यान से कुछ नहीं होता। प्राणायाम द्वारा अपने मन की डोर कस कर पकड के तब आत्म स्वरूप दिखेगा।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

            ********

1. ग़रीब नवाज़ (Gracious/Hospitable/ Courteous)

2. ग़ज़ॖल (Amatory/Verse/Poem)

3. ग़ज़लगो (Poet)

4. ग़ुसुल (Bath/An ablution)

5. ग़श (Unconscious)

              मुहावरॖ

1. मु: युसुय ज़हर ख्यॆयि सुय मरि

    अ: जुरुम करन वऻलिस छु 

          सज़ा ज़रूर तुलुन

2. मु: युसुय ज़ेनि सुय हारि युसुय

         हारि सुय ज़ेनि

    अ: यॆमिस हारनॖच त्वछ़ आसि

          सु छु ज़ेनान

3. मु: युसुय रॊछुम तस निश 

         रछतम ख्वदायो

    अ: बुथ्य फ्युर गछ़ुन, या, यस

          मदद कॊर सु वॖल्टॖ करुन

        (पनॖन्य शुर्य ह्यॆछॖनऻव्यूख)

**************************

पंचान्ग:- यिथॖ पऻठ्य ओस कऺशीरि मंज़ वंदॖ नेरान। कऺशीरि मंज़ छि वंदस त्रॆ हिसॖ गछ़ान याने चिल्लय कलान्, चिल्लय ख्वर्द तॖ चिल्लॖ बच्चॖ। चिल्लॖ कलान याने सख़ तॗर छि रोज़ान च़तजिह्यन दॊहन, चिल्लॖ ख्वर्द याने कम तॗर छि रोज़ान वुहन दॊहन तॖ चिल्लॖ बच्चॖ याने कम ख्वतॖ कम तॗर छि रोज़ान दऺहन दॊहन। मानॖनॖ छु यिवान ज़ि सख़ तॗरि हुन्द कुल मियाद छु रोज़ान सतथ द्वह तॖ तमि पतॖ छि तॗर ह्यवान हमॖन्य  याने कम गछ़ॖन्य। अकवुह दिसम्बर प्यठॖ मार्चॖ किस ग्वडनिकिस हफ्तस ताम छु तॗरि बॊहरान रोज़ान। वंदसॖय मंज़ छु असि कऻशिर बटन वऺर्युक बॊड द्वह ति आसान याने हेरथ। यि बॊड द्वह मनावनॖ बापथ ॴस असि कऻशर्यन तति कऺशीरि मंज़ बडॖ मॆहनत प्यवान करॖन्य। पनॖन्यन लर्यन ओस आसान ब्रांदॖ प्यठॖ कऻनी ताम लिवुन तॖ डुवुन। यि कथ वनॖन्य छि सहल मगर यॆम्यसॖय करुन ओस प्यवान सुय ज़ानि। वुज़स तॖ वुज़ॖचन लबन, ब्रांदस, द्वारस, हेरॖन याने त्र्यन च़्वन पोरक्यन हेरॖ पाव्यन तॖ हेरच्यन दॊश्यवॖन्य तरफक्यन लबन, वॊटिस, कुठ्यन, ठोकुर कुठिस, कऻनी तॖ ततिचन लबन ओस आसान लिवुन हॆरि प्यठॖ ब्वन ताम। पतॖ गऺयो चोकस तॖ चोकस मंज़ थऺव्यमॖत्य बानॖ छलॖन्य तॖ छॊकॖन्य। ठोकूर कुठिस मंज़ सारिनॖय दीवी दीवताहन नावुन तॖ सज्जावुन। सानि माजि, ब्यॆनि, न्वशि, कोरि आसॖ रोज़ान आवॖर्य यिमन काम्यन मंज़। कुनि कुनि गरस ओस मुसलमान मोहन्युव यिवान लागनॖ लिवनस डुवनस। यारबलन प्यठ ओस बटन हुन्द मेलॖ ज़न लगान छलान छॊकान तॖ साफ़ सफऻयी करान ॴस्य नज़र यिवान। शुर्य कऺट्य ॴस्य हारन रोज़ान गिन्दान। हालांकि हारन गिन्दुन ओस स्यठाह कम गोमुत ति क्याज़ि ग्वडॖ आसॖ हारय गऻब गऻमच़ॖ। दॊयिम ओस यि ज़ि शुर्यन हुन्द इम्तिहान ओस यिवान थावनॖ हेरच़ आस पास यॆमि किन्य तिम ॴस्य पतॖ तऺथ्य सॗत्य व्यस्त रोज़ान। हेरच़ पतॖय ॴस यिवान तीलॖ ॴठम ति तम्युक ज़िकिर करव अलग पऻठ्य। वंदॖ ओस म्वखसरॖ बडॖ क्रूठ आसान मगर असि कऻशर्यन ओस तोति सु वंदॖ म्यूठ बासान। कऺशीरि प्यठॖ आयि सऻरी ॳस्य च़ऺलिथ तॖ टनलि यपोर यिनॖ पतॖ आव यिमन सारिनी काम्यन बदलाव। लिवुन डुवुन, छलुन छॊकुन तॖ नावुन सावुन छु वॖनि ति बरकरार मगर अंदाज़ बदल्याव तॖ जाय छ़ॊकेयि। न छि तिम हेरय तॖ न तिम लबय। न सु वॊट तॖ न स्व कऻनी। कथ छि जऻरी। दय कऺरिन्य असि सारिनी पनॖन्य यऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक म्योन सबक़ podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)