23.02.2021

23.02.2021 मागॖ (माघ) ज़ूनॖ पछॖ (शुक्ल पक्ष) काह (देवादेव) (एकादशी) (देवादेव) बॊम्वार (मंगलवार),श्री सप्तर्षि सम्वत 5096, नक्षत्र ॴर्द्र, राश मिथुन (चलान) ऋतु शिशर (चलान)...अज़ छि बुम्सिंह काह याने भीमसेन एकादशी

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

      महामऻरी नाश -मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

            लल वाक्

       (पराग पुस्तक-209)

केंच़न रऺन्य छय शिहिज बूनी

नेरव न्यबर शुहुल करव

केंच़न रऺन्य छय बरॖ प्यठॖ हूनी

नेरव न्यबर तॖ ज़ंग ख्यॆयिवॖ

          अर्थात

किसी की पत्नी ठंडे मिज़ाज की होकर चिनार के पेड की भांति ठंडा साया प्रदान करके सब को सुख देती है। कोई स्त्री घर के बरामदे पर बैठी कुत्तिया की तरह अर्थात कर्कशा होती है जो बात  बात पर झगडा करती है आपितु ठंडी स्वभाव की गृहणी घर को प्यार से स्वर्ग बनाती है और झगडालू पत्नी घर को नरक बनाती है।

**************************

पांछ़ कऻशिय लफज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

              ********

1. गऻर हऻज़िर (Absent)

2. गऻर ज़िमॖदार (Irresponsible)

3. गऻर ज़ान (Unfamiliar/Unknown/Unacquainted/Stranger)

4. गऻर सरकऻरी (Private)

5. गऻर ज़रूरी (Unimportant)

               मुहावरॖ

1. मु: यॆड छु नॖ वुछान कांह थर 

          छि वुछान सऻरी

    अ: ख्यन च्यन छु नॖ कांह 

          वुछान पलव छि वुछान

          सऻरी

2. मु: येडॖल छु बे-ईमान

    अ: रशवॖ खॊरस छि बे-ईमऻनी

          सॗत्य

3. मु: यॆड बापथ दीन बदलुन

    अ: तमाह बापथ ईमान

          रावरावुन

        (पनॖन्य शुर्य ह्यॆछॖनऻव्यूख)

**************************

पंचान्ग:- तिम शुर्य यिम 1990-तॖ प्यठॖ कऺशीरि न्यबर ज़्यवान आयि तॖ यिमन कऺशीरि मंज़ वंदॖ छावनुक  तजरुबॖ छु नॖ हऻसिल सपदुमुत तिमन शुर्यन करनावव अज़ कऺशीरि हुन्द सऻर म्यानि यॆमि मोबाईलॖ दऺस्य। वंदॖ याने तॗर या शिशर या ठंड या सर्दी हुन्द मोसुम ओस कऺशीरि मंज़ व्यॊख्तुय आसान। ख्यनॖ रऺन्ग्य, च्यनॖ रऺन्ग्य, व्वथनॖ रऺन्ग्य, बॆहनॖ रऺन्ग्य, पलवव दलवव रऺन्गय, नच़नॖ फेरनॖ रऺन्ग्य यि दऺप्यज़ि ति प्रथ रऺन्ग्य ओस कोशुर बटॖ क्योहऻ मुसलमान अलगॖय ज़िन्दगी बसर करान रोज़ान। चूंकि सऻन्य शुर्य छि बिज़ऻती कऻशिर। युहुन्द माजि वतन छि कऺशीर, यिहॖन्ज़ माजि ज़्यव छि कऻशिर तॖ यिहॖन्ज़ मऻज्य छि कऻशिर। यि छि दॊयिम कथ ज़ि हालातव किन्य छि सऻन्य शुर्य महरूम रूद्यमॖत्य यिमन चीज़व निशि या कऺशीरि हुन्द मोसुम छावनॖ निशि ऱयतकोल या वंदॖ। दॊश्यवऺन्य मोसमन छि पनॖन्य पनॖन्य खऻस्यथ। अज़ करव ॳस्य वंदॖ मोसमॖ प्यठॖ शुरु तॖ पतॖ वातव ऱयतकऻलिस ताम। ग्वडॖ वुछव ॳस्य वंदस मंज़ पलव क्याह क्याह ॴस्य यिवान लागनॖ। तिमन पलवन हॖन्द्य नाव छि - येरुव जॊराबॖ याने येरुव मोज़ॖ, पऻशनॖ, येरुव अथपंजॖ या दालुव अथपंजॖ, दराज़ॖ, इन्नर,पऻतव (ज़्यादॖतर गामन मंज़), फलालऻनुक पऻजामॖ, गर्म पैंट, अंदरिम बऺन्यान याने अंडरशऻर्ट, कछॖ याने अंडरवियर, कमीज़, येरॖव बऺन्यान, सदॖर्य या वास्कट, कोठ, ऒवरकोठ, फ्यरन पट्युव या फलालऻनुक, पोछ़ (फ्यरनस तलॖ), गॖलोबन्द, कनटूप्य, पिक टूप्य, कराकुली टूप्य, रफल सऻड्य, रफल दूत्य, पशमीन दुत्य, रफल शाल, पशमीन शाल, पूरॖ नर्य ब्लौज़, स्कार्फ़, डक बैक बूठ, फ़र बूठ, ल्वांग बूठ, दालुव बूठ। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी

*************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)