21.02.2021

21.02.2021 मागॖ (माघ) ज़ूनॖ पछॖ (शुक्ल पक्ष) नवम (देवादेव) (नवमी) (देवादेव) आथवार (रविवार/ऐतवार), श्री सप्तर्षि सम्वत 5096, नक्षत्र रोहिन, राश मिथुन (रऻच़ हॖन्ज़ॖ 9.54 बजि प्यठॖ) ऋतु शिशर (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

      महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

              लल वाक्

        (पराग पुस्तक-207)

स्वन द्राव वहनि तॖ मल गव वऺथित

यॆलि म्यॆ अनलॖह द्युतमस ताव

कतुर ज़न गऺयस लोलॖ व्यगलिथ

यॆलि कठॖकॊश च़ॊल निशि रव द्राव

लल बॊ रूज़ॖस त्यॆलि शीहलिथ

यॆलि च़्यतस प्यव बॊ तस नाव

              अर्थात

जिस प्रकार तपाने से सोने की मैल हट जाती है और शुद्ध सोना प्राप्त होता है। उसी तरह अपने हृदय की मैल को तप द्वारा तपा कर दूर किया और अविद्या रूपी बर्फ भी पिघल गई और जब मुझे याद आया कि मेरा नाम उसी का नाम है अर्थात मैं और वह एक ही हैं तो मुझे परम शांति का अनुभव हो गया।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

               ********

1. आलमगीर (Worldwide/Universal)

2. आम (Common/General/Usual/Known)

3. आमतोर (Generally/Usually/Commonly)

4. आम फहम (Simple and easy/Intelligible to the common man)

5. अबस (Useless/Vain)

                मुहावरॖ

1. मु: हटि गव तॖ मटि गव

    अ: ज़िम्वऻरी खारॖन्य,या,यॆस्य 

         कऻम मटि खसि तऺस्य 

         सऻलिम ज़िम्वऻरी ति 

         आसॖन्य

2. मु: हट्युक वंदय रथ तॖ नटिच

         दिमय नॖ त्रेश

    अ: फऻयदॖ नॖ वातॖनावुन मगर

         कथव सॗती बराबरी अनॖन्य

         या, वुठ माज़रथ

3. मु: हजि कुजि ड्यकॖ बजि

    अ: स्यज़राह पज़राह छु बख्तॖ

         बजराह, या, सादॖ कोर्यन

         छु बख्तॖ बजर बागि यिवान

       (पनॖन्य शुर्य ह्यॆछॖनऻव्यूख)

**************************

पंचान्ग:- वलिव अज़ वुछव ॳस्य पनॖन्यन गरन मंज़ बानन हॖन्द्य नाव कऻशिर्य ज़बऻन्य मंज़ - लॊयुव खोस, कॆन्ज़ि ख़ोस, लॊयुव थाल,

लॊयुव बॊहगुन, बॊड बॊहगुन, मंजोल बॊहगुन, दीगचि, देग, सरतलिव पऺहरात, बऻट्य, टब, समावार, क्रऺछ़, क्रॊछ़, काशवॖ, चोंचॖ, ल्यॆज, डुल, डूलिज, डकनॖ, नॊट, गागॖर, सरतलिव थाल, कलाय कऺरिथ बॊहगुन, क्रॊंड कऺरिथ बोहगुन, तऻव, क्राय, गऺडवॖ,  कवॖल्य, मरतबानॖ, मुरादाबऻदी थाल, रिकऻब्य, चिलमची, बऺड चिलमची, ल्वकॖट चिलमची, मुजिकॊन्ड, चुमटॖ, बालटीन, डोल, तुम्बॖ, जग, गिलासॖ, कटोरॖ, रऺम्ब्य, न्यऻम्य, छ़ोटॖ, व्वखुल, काजवठ, ॴलॖ व्वखुल, ॴलॖ काजवठ, च़ालन या पल्टी, स्टील बोहगुन, स्टील थाल, स्टील क्राय। यिम ॴस्य चोकस मंज़ ग्वडॖ बानॖ आसान। ग्वडॖ ॴस्य लॊयिव बानॖ पतॖ आयि स्टील बानॖ तॖ सॗत्य सॗत्य आयि बिजली सॗत्य चलन वऻल्य कॆंह नऺव्य नऺव्य चीज़ यिम अज़ ति छि ॳस्य वरतावान रोज़ान मगर कॆंह चीज़ गयि गऻबॖय यिम नॖ सानि नवि पुयि ब्रूंठ्य आयि। खास्यव बदलॖ आयि कप, मग, थालव बदलॖ आयि प्लेटॖ वगैरा। दानॖच जाय रऺट गैस चूलन तॖ क्रोछ़ यॆमि सॗत्य दानॖ मंज़ नार ॴस्य गडान तॖ कांग्रि बरान गव गऻबॖय। हालांकि बदलाव आव मगर चोकस मंज़ छि वुनि ति कॆंह बानॖ यिमन ॳस्य कऻशिर्य ज़बऻन्य मंज़ तिमवॖय नावॖ सॗत्य छि ज़ानान। अमि अलावॖ ओस कऺशीरि चोकस मंज़ आसान ज़्युन, बॊठ, च़ॖनि, दमचूलॖ, कॊश, सूर यॆमि सॗत्य बानॖ ॴस्य यिवान सुरनावनॖ याने साफ़ करनॖ। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)