17.02.2021

17.02.2021 मागॖ (माघ) ज़ूनॖ पछॖ (शुक्ल पक्ष) शॆयम (षष्ठी) ब्वदवार (बुद्धवार),श्री सप्तर्षि सम्वत 5096, नक्षत्र अश्विन, राश मेष (चलान) ऋतु शिशर (चलान)...अज़ छि कुमार शॆयम (कुमार षष्ठी)...चूंकि शॆयम छि ज़ॖ गछ़ान ॳज़्युक वॊहरवोद यी पगाह याने 18.02.2021

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

      महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

              लल वाक्

        (पराग पुस्तक-203)

परस हा मालि पॊरुम तॖ पानस वुनुम

वनॖ कस ललि छुय म्यॆ पानस राह

वाय गोम दिलस म्यॆ क्याह कॊरुम

कुनुय ॴसिथ सॊरुम नॖ ज़ांह

               अर्थात

दूसरों को पढाया किंतु स्वयं समझा नहीं और यह मेरा अपना ही अपराध है। ऐसा मै ने क्यों किया यही दुख मुझे हुआ है। एक होकर कभी स्मरण नहीं किया।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

             ********

1. ॴबस वुरुन तुलुन (To malign/To criticize)

2. ॴदिल (Upright/Just/Sincere/Merciful/Kind hearted)

3. ॴदी (Habitual/Accustomed)

4. ॴरक (Sweat/Perspiration)

5. ॴश (Luxury/Pleasure/Happiness/Comfort/Delight)

               मुहावरॖ

1. मु: हारि नॖ सोदा बाज़रस 

         खलबली

    अ: लेन देन कम तॖ शोर ज़्यादॖ 

         तुलुन

2. मु: हारि तॖ तोतस वनुन

    अ: वनॖनस गछ़न बोज़नवऻल्य

         आसॖन्य,या, वनन वोल 

         वनान गछ़ान तॖ बोज़न

         वऻल्य नॖ ध्यान दिवान

3. मु: हालव गलन ना मगर 

         दान्यस दाह कऺरिथ

    अ: बद छु गलान मगर 

         न्वकसान वातॖनऻविथ

      (पनॖन्य शुर्य ह्यॆछॖनऻव्यूख)

**************************

पंचान्ग:- जे के विचार मंच संस्था छि प्रथ वऺरयि गाशॖ तारुख प्रोग्राम मनावान यथ मंज़ कऻशिर्य बटॖ लऺडकॖ तॖ कोरि पनुन हुन्नर तॖ कसॖब छि हावान रोज़ान ग्यवनस मंज़, नच़नस मंज़ या साज़ वायनस मंज़। अमि संस्थायि दऺस्य छु ब्याख अख प्रोग्राम ति यिवान प्रथ वऺरियि मनावनॖ हॆरच़ॖक्यन दॊहन आस पास यथ नाव छु शिवरात्रि महोत्सव। यथ प्रोग्रामस मंज़ छि वुछान ज़ि सऻन्य शुर्य किथॖ पऻठ्य छि पनॖन्य माजि ज़्यव रऺछ़रावनॖच कूशिश करान रोज़ान। सॗती छि शुर्यन हॖन्ज़ चित्रकारी मंज़ त्युहुन्द कसॖब वुछॖनॖ यिवान तॖ ब्यॆयि छि पनुन कऻशुर पोशाकॖच परम्परा बरकरार थावनॖच कूशिश यिवान करनॖ। यिमव दॊयव प्रोग्रामव दऺस्य छि अख कूशिश यिवान करनॖ ज़ि असि गछ़ि पनॖन्य प्रज़नथ मूजूद रोज़ॖन्य। सऻन्य संस्कार, सऻन्य सभ्यता गछ़ि नॖ लुतिछिति गछ़ॖन्य। वैकुण्ठमंडली संस्था फरीदाबादॖ प्यठॖ ति छि पऻर्यज़ान प्रोग्राम मंज़ॖ मंज़ॖ चलावान ताकि असि ह्यॆकि पानॖवुन्य ज़ान पहचान रूज़िथ। कऺशीरि प्यठॖ च़ऺलिथ आमॖत्य कऻशिर बटॖ छि टनलि यपोर छऺकॖरनॖ आमॖत्य। अख दार तॖ अख लार लॊगॖमुत। सान्यन शुर्यन युथ नॖ मऺशिथ गछ़ि ज़ि ॳस्य क्वस जाय त्रऻविथ कथ जायि लऺग्यमॖत्य छि, याद पावनॖच कूशिश छि जारी। ब्यॊन ब्यॊन प्रोग्राम विज़ि विज़ि करनुक छु यि ख़ास मुद्दा। बॖति छुस पनॖनि मोबाईलॖ दऺस्य यि कूशिश करान रोज़ान ज़ि पनुन कऻशुर बटॖ कल्चर गॊछ़ ज़िन्दॖ रोज़ुन। पनॖन्य माजि ज़्यव गऺछ़ ज़िन्दॖ रोज़ॖन्य यॆमि सॗत्य सऻन्य प्रज़नथ छि। यि कूशिश छि यिवान करनॖ ब्यॆयि ति वारिहाव जायव प्यठॖ। न्युज़ीलैंड प्यठॖ छि करुणा जी रैना, सिगापोर प्यठॖ छि शिवानी भान, मुम्बई प्यठॖ एम के रैना, बंगलोरॖ प्यठॖ राजेश कौल, ज्यॆमि प्यठॖ डा. रमेश राज़दान वगैरा वगैरा। म्यऻन अख व्यनती छि म्यान्यन ब्यॆन्यन तॖ बायन ज़ि सऻन्य यि मेहनत खसि रथि तॆलि यॆलि तॊह्य पनॖन्यन शुर्यन पनॖन्यन पनॖन्यन गरन मंज़ माजि ज़्यव ह्यॆछनावान रूज़िव तॖ असि होसला अफज़ऻयी कऺरिव। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)