16.02.2021

16.02.2021 मागॖ (माघ) ज़ूनॖ पछॖ (शुक्ल पक्ष) पऻन्च़म (पऺचमी) बॊम्वार (मंगलवार) श्री सप्तर्षि सम्वत 5096, नक्षत्र रेव, राश मेष (रऻच़ हॖन्ज़ि 8.55 बजि प्यठॖ) ऋतु शिशर (चलान) द्रठॖपऻन्च़ुक (पंचक) म्वकलि अज़....अज़ छि बसंत पऻन्च़म (बसंत पंचमी) ति

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

      महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

             लल वाक्

        (पराग पुस्तक-202)

शहन हुन्द शिकार गऻन्ठ कवॖ ज़ाने

हऻन्ठ कवॖ ज़ाने पॊत्रय दोद

शमहुक सोज़ लऺश कवॖ ज़ाने

मऺछ कवॖ ज़ाने पोंपुर्य गथ

           अर्थात

शाहबाज़ की तरह शिकार करने का अनुभव चील को कैसे हो सकता है। चील मुर्दा ही खाती है। बाज़ ज़िन्दा को पकड कर खाता है। बांझ महिला पुत्र का दर्द कैसे जान सकती है। पुत्रवती ही पुत्र का दर्द जान सकती है। शमाह का प्रकाश तथा लकडी की रोशनी की समता नहीं। परवाना और मक्खी की समता नहीं है।

सार यह कि अध्यात्म का रास्ता वीरों का रास्ता है। वे अपने लक्ष्य के लिए आगे का पथ स्वयं निर्धारित करते हैं। यह रास्ता कायरों के लिए नहीं है जो दूसरे का सहारा पाने का प्रयत्न करते हैं

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

              *********

1. ज़रीफ (Witty/Wise/Irony/Humour)

2. ज़ुलुम (Oppression/Cruelty/Tyranny/Harm/Injustice)

3. ॴबिद (Worshipper/Devotee/Pious/Saint)

4. ॴजिज़ (Incapable/Frustrated/Helpless/Powerless/Humble/Meek)

5. ॴब (Sin/Blemish/Fault/Defect)

               मुहावरॖ

1. मु: हापथ यारज़

    अ: मुडॖ सॖन्ज़ यारज़,या,

         जऻहिल सॖन्ज़ दोस्ती

2. मु: हारॖच ग्वगॖज तॖ लारॖच

         गुनस गऺयि बराबर

    अ: हारॖच ग्वगॖज गऺयि ज़हरस

         बराबर

3. मु: हारि टंग तॖ ज़ॖलनय मॊहरि

         च़ूंठ तॖ ज़ॖलिथ

    अ: टंग छु द्यलॖ सान श्रपान

       (पनॖन्य शुर्य ह्यॆछॖनऻव्यूख)

**************************

पंचान्ग:- ताराचन्दस गऺयि वॊसॖराथ। सुबहऻय वॊथ श्रान ध्यान कॊरुन। चाय च्यॆयन तॖ द्राव अमराकऺदल कुन। दुकान ओस वुनि बंदॖय।  ताराचन्द  प्रार्यव तॊताम यॊतताम  दुकानदार आव तॖ मुच़ॖरोवुन वान। ग्राहक वुछुन खड़ा तॖ प्रुछ़नस वऺनिव बब क्याह गछ़ि। ताराचन्दन वॊनॖनस तमि केम्यकॖलुक नाव तॖ दुकानदारन द्युतनस पननि स्टोरॖ मंज़ॖ कऺडिथ। ताराचन्दन तुल यि कॆम्यकॖल तॖ कॊरुन ऱवख थानस कुन। थानॖदार गव ख्वश ताराचन्दस वुछिथ। वऺलिव बिहिव। ऒनवा त्वहि सु कॆम्यकॖल। प्रुछ़ थानदारन ताराचन्दस। आहन माहरा। बॊतल हावान हावान, यॆक्याह माहरा छु यि कॆम्यकॖल। ठीख छु बिहिव तॊह्य। एस पी सऻब ति आसि पकान। असि छु गछ़ुन चांद मारि। खुलॖ मऻदान छु तॖ तऺत्य प्यॆयिय च़्यॆ यि फाटॖनावुन। बॆहतर जिनाब यिथॖ पऻठ्य वऺनिव। गन्टॖ खन्ड प्रऻरिथ प्यव एस पी वऻतिथ तॖ तुलुख ताराचन्द सॗत्य तॖ द्रायि चांदमारि कुन। बुथि एस पी सॖन्ज़ जीप, तथ पतॖ एस एच ओ सॖन्ज़ जीप, तथ पतॖ ब्याख गऻड्य यथ मंज़ सिपाह च़ोर पांछ़ तॖ ताराचन्द। काफिलॖ वोत चांद मारि तॖ वॊनुख ताराचन्दस ज़ि हाव डिमोनसट्रेशन। ताराचन्दन थऻव दूर अकि तरफॖ यि बोतल तॖ अथ त्रोवुन दूरि प्यठॖ पोन्य। याम अथ बोतलि अंदर पोन्य च़ावॖय योत तॖ दडाम कऺरिथ द्राव बॊड बारॖ टास तॖ बास्यव ज़न ति बम्ब फॊट। ताराचन्द गव ख्वश ज़ि तऺम्यसुन्द तजरुबॖ गव कामयाब। एस एच ओ गव ख्वश ताराचन्दनॖ ईमानदऻरी वुछिथ। एस पी गव ख्वश यि वुछिथ ज़ि बाल बाल बच्याव यि बटॖ याने अथन फॊख दिवान। मुबारक द्युतुख ताराचन्दस। एस पी सऻबन वॊन एस एच ओ सऻबस ज़ि कर्यून ताराचन्द बऺरी तॖ कॆंह एफ आई आर वगैरा दर्ज करनुक छु नॖ ज़रूरथ। एस एच ओहन कऺर बाक़ी कागज़ी कारवऻही तॖ दॊहलि सूज़ुख ताराचन्द पनुन गरॖ तॖ सॗत्य दितिहऻस ज़ॖ सिपाह ति गरॖ ताम। ब्वकॖ फ्वजि ताराचन्दक्यन गैरिक्यन यि वुछिथ ज़ि सऺही सलामत वोत ताराचन्द पनुन गर। अहलक्यन मऺहलक्यन लूकन ज़न प्यव असली बम्ब यि वुछिथ ज़ि ताराचन्दस म्यूल नॖ कांह सज़ा तॖ सपुद बेग्वनाह सऻबित। तिमन तॊर नॖ वुनि ति फिकिरी ज़ि यि कॆम्यकॖल क्याह बलाय ॴस। ताराचन्द ओस बिचोर स्यॊद सादॖ, पनुन स्यज़र आस बकार। व्वश त्रोवुन तॖ वॊनुन पानस सॗत्य ज़ि स्यॆदिस हॊल करि क्याह। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)