01.10.2019

01.10.2019, ॴशिद (आश्विन) ज़ूनॖ पछॖ (शुक्ल पक्ष) त्रय (देवादेव) (तृतीय) बॊम्वार (मंगलवार) श्री सप्तर्षी सम्वत 5095, राश तुला (चलान), ऋतु हरुद (शरद) (चलान), नवरात्र (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: च़ॊट गऺयि क्वलि तॖ राहि
         ख्वदा
    अ: रोवमुत चीज़ खऻरात करुन
2. मु: च़ूंठ छु च़ूंठिस वुछिथ रंग
          रटान
    अ: इन्सानस छु ब्यॆयिसुन्द
         असर प्यवान
3. मु: च़ूरस तॖ रऻछिस बऻज-वठ
    अ: यॆति प्रथ कांह बे-ईमान
         आसि
4. मु: च़ूरस फुट ख्वर तॖ पीरस
         मोरुख मुरीद
    अ: बे-ग्वनाहन सज़ा प्यॊन/
         बे-बूज हालथ
5. मु: छ़ॊकस छु फॊख वसान
    अ: दज़ॖबुज़ लदस छि ॴखॖरस
          रुसवऻयी गछ़ान
**************************
1. इशारॖ.....Hint/Indication/
               Suggestion/Clue
               Sign
2. इशारॖ हावुन.....To give a
               hint/To show the
               direction
3. इशारॖ करुन.....To hint/
               Signal/Suggest/
               Indicate
4. इशारॖ द्युन....To give a hint
              To indicate/To
               suggest
5. इसॖम.......Name
6.  इसतिकलाल...Perseve-
           rance/Patience/
       Fortitude/Firmness/
       Constancy
7. इस्तिमाल......Use/Usage
8. इसतिकॖबाल.....Welcome/
                           Reception
9. इसतऺरी.....Iron
10. इसतिदा....Request/Pra-
                 yer/Petition/En-
              treaty/Solicitation
**************************
          गीता ज्ञान अध्याय 17
यिम मनुश शास्त्र विदी त्रावान
मनचि कल्पनायि सख़ तपस्या करान। मखर अबिमान तॖ कामना थावान
वॊन भगवानन गीता ज्ञान
**************************
दछुन खॊवुर यॆलि म्यॆ नज़र प्यवान छि तॖ बॖ छुस हऻरान सपदान यि वुछिथ ज़ि सऻनिस समाजस मंज़ छि वारियाह कोरि तॖ लऺडकॖ यिहॖन्ज़ वऻन्स पज़नॖ प्यॆठ द्रामॖच़ छि तॖ वुनि छि अनहॖरीय। च़्वयत्रॖह तॖ शॆयत्रॖह वऺरी लडकॖ तॖ लऺडकी छि छ़ान्डान वर वधु अख ॳक्यसॖन्दि बापथ। मऻज्य मोल छु परेशान ज़ि तान छु नॖ सऺही या मुनऻसिब मेलान तॖ मजबूर सपदिथ छु प्रारान ज़ि ज़ऻच़ न्यबरय ति अगर बनि तॖ ॳछ वऺटिथ करि सु पनॖनिस शुरिस
खान्दर। यि छु अख संजीदॖ मसलॖ यथ प्यठ सानि समाजिक्यन ज़िम्मवार शखॖसन पज़ि सारेय कामि त्रऻविथ ग्वडॖ यथ मसलस हल छ़ान्डुन। सानि कोरि छि लड़कन न्यसबतॖ ज़्यादॖ परिमच़ॖ ल्यॆछमच़ॖ बासान तॖ तिमन छु नॖ पानस बराबर लऺडकॖ कांह टारि खसान तॖ प्रारान प्रारान छि स्व कूर ॴखरस अथ नतीजस प्यठ वातान ज़ि पनॖनि ज़ऻच़ न्यबर नीरिथ छि पनुन जीवन सऻथी हऻसिल करनॖ बापथ कदम तुलान चाहे मजबूरी मंज़ॖय सऺही। मोल मऻज्य ति छि शायद ग़नीमथ ज़ऻनिथ ॳछन पऺ़ट गऺन्डिथ तॗ ॴसस त्रॊप दिथ शुर्यसुन्द यि फ़ऻसलॖ मानान। यि मसलॖ ह्यॊतुन   द्वह पतॖ द्वह संजीदॖ मसलॖ  बनुन। सान्यन ज़िठ्यन पज़ि गोल मेज़ कान्फ्रन्स बुलावॖन्य यूत जलॖद पिलि तॖ त्यूत तॖ अमि मसलुक  कांह वऻहिद हल छ़ान्डुन। युवा पीडी ति छि बुलावन्य तॖ त्युहुन्द तर्क बोज़ुन संजीदगी सान तॖ वुछव ज़ि ॳस्य कम क़दम  ह्यकव  तुलिथ अथ ज़ऻच़ न्यबर खान्दरन थख दिनॖ बापथ तॖ ब्यॆयि खान्दरॖच वऻन्स कम करनॖ बापथ।लऺडकस तॖ लऺडकी हॖन्ज़ माहानॖ कमायि हुन्द छु अख बॊड बारॖ मसलॖ यथ कथि प्यठॖ छु असि फ़र्ज़ बनान ज़ि ॳस्य वुछव किथॖ पऻठ्य ह्यकव अथ मसलस वाठ दिथ। कॆंह न तॖ कॆंह समजोतॖ छु करुन ज़रूरी तॖ कम ज़्यादॖ व्यॆपरावुन ति छु स्यठाह ज़रूरी। अगर असि वाकय पननि समाजुक दिली च़ुक छु तॖ पनुन समाज ज़िन्दॖ थावुन छु, पनॖन्य संस्कार तॖ पनॖन्य सभ्यता बचावॖन्य छि, यिमन कथन प्यठ सोच विचार करुन छु ज़रूरी। यि छि म्यऻन्य पनॖन्य राय। तुहॖन्ज़ राय गछ़ि नॖ ब्यॊन आसॖन्य म्यऻनि रायि निशि म्यॆ छु विश्वास।
**************************
"सऺच़सस नॖ सातस पऺच़सस नॖ रुमस
सुह मस म्यॆ ललि च्यव पनुनॖय वाख
अंदरिम गटॖकाह रटिथ तॖ वोलुम
च़ऺटिथ तॖ द्युतमस तती चाख"
  पऺरिव यि लल वाख ति
**************************
 नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)