17.09.2019

17.09.2019 ॴशिद (आश्विन) गटॖ पछॖ (कृष्ण पक्ष)त्रय(देवादेव)(तृतीय)बॊम्वार (मंगलवार) श्री सप्तर्षी सम्वत 5095, राश मेष (चलान), ऋतु वर्षा (चलान)काम्बॖर्य पछ (पितृ पक्ष)
(चलान)..च़ोरम हुन्द श्राद्ध यी ॳज़्य, अज़ छि संकट च़ॊरम (संकट निवार्ण चतुर्थी) ति
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: रज़ दऺज़ मगर वर द्रास नॖ
    अ: हून्य लऺटिस छु नॖ वर नेरान
         यस मूलुय हॊल आसि तस
         छॆनॖ पनॖन्यहऻन च़लान
2. मु:रस मीनिथ तॖ नाटॖ गऺन्ज़रिथ
    अ: तूलिथ तॖ मीनिथ/कमॖय
3. मु: रहदार गुरिस छि पनॖनी
         कॊठ्य फुटान
    अ: युस शख़ॖस कऻम करनस
         मंज़ मऻहिर आसि तऺस्य छि
         ज़्यादॖ कऻम मटि खसान
4. मु: ज़ामतुर गव पामतुर
    अ: ज़ामतॖरिस यिथय ह्यॊर
          ब्वन गछ़ि तस छु रोज़ान
          कानि तल
5. मु: ज़ाम हय आसि गाम तति
         प्यठॖ सोज़ि पाम
    अ: ज़ाम यॊदवय दूरि ति आसि
         तोति छॆ नॖ थफ़ तुलान
**************************
1. अथॖ अनुन....To get/To
                        obtain
2. अथॖ आमुत....Come to
                hand/Be gained/
                Be obtained
3. अथि आमुत....In hand
4. अथि फॊल....An offering/
              An oblation/Offe-
          ings made in sacred
          fire of yajna
5. अथॖ लगुन.......Come to
              hand/Be touched
            Fall into the hands
            of
6. अथि लूर तॖ बॆबि खोस...Very
                   poor/A stick in
                  hand and a cup
              inside the clothes
7. अथि नॖ हार अंदॖकार... False
              pride/False vanity
8. अथॖ युन....To earn/To
                   gain/To obtain
9. अथुक...Which is in hand
10. ॳतीथ....Poor person/
              Stranger/Traveler
              Unknown
**************************
         गीता ज्ञान  :अध्याय 16
 अज्ञानॖ सॗत्य सोंचान रोज़ान, विशय बूगन मंज़ फऺसिथ रोज़ान,यिथ्य मनुश क्रूठ नरख बूगान, वॊन भगवानन गीता ज्ञान
**************************
सान्यन शुर्यन मंज़ छि अज़कल कॆंच़न चीज़न हॖन्ज़ कऺमी नज़र यिवान। अगर ॳस्य हना सन्यरॖ सान वुछव तॖ पनॖन्यन शुर्यन हॖन्द्य ग्वन पनॖनिस ल्वकचारस सॗत्य तोलव तॖ असि यिन तिम कऺमियि नज़र मगर ॳस्य छि तिमन कऺमियन नज़र अन्दाज़ करान हालान्कि तिमन कऺमियन हुन्द फल छि बुगतान ॳसी मगर ॳछ वऺटिथ या कनॖ डोल दिथ छि पकान रोज़ान। सानि समाजिक्यन खान्दर कऺरिथ ज़नानन छि नॖ डॆजहऻर्य लऻगिथ नज़र यिवान। अगर कऻन्सि डॆजहोर लऻगिथ ति छु सु छु नॖ शास्त्रॖ विधि हिसाबॖ यिवान न बनावनॖ तॖ न लगावनॖ। लऻग्यमॖत्य डॆज्यहार्यन हुन्द ज़्यॆछर युस आसुन गॊछ़ सु छु नॖ बिल्कुल नज़र यिवान। माने गव यि ज़ि अमि डॆज्यहारिच शक्ति छि गऻब या यिथ पऻठ्य वनव ज़ि माजि हन्दिस द्वदस मंज़ छॆ नॖ व्वंय स्व दैव-शक्ति यॆमुक असर तऺम्यसॖन्दिस शुर्यन हॖन्द्यन ग्वनन प्यठ प्यॆयिहे। कऻशुर बटॖ शुर छु तिमन ग्वनन तॖ संस्कारन निशि
स्यठाह दूर अज़कल बोज़नॖ यिवान। परुन ल्यॆखनुय योत छु नॖ सान्यन शुर्यॆन ज़रुरत, बाकय संस्कारन हॖन्द आसुन ति छु स्यठाह माने थवान।  म्यॆ छु बासान ज़ि अज़कलक्यन शुर्यन हॖन्ज़न माज्यन पज़ि डॆजहोर तमी आयि तॖ त्रायि लागुन यॆमि आयि सऻन्य शास्त्र वनान छि। ज़रूरी छु नॖ ज़ि अठ गछ़ि स्वनॖसॖन्ज़ि आसॖन्य, डॆज्यहार्युक ज़्यॆछर यी पनॖ दावि सॗत्य ति पूरॖ सपदिथ। बॖ छुस मऻनिथ ज़ि स्वन लागनस छु  ख़तरॖ थपि थॊसि निनुक मगर मॊट पन लागनस क्याह हर्जॖ छु। म्यॆ अगर सऺही याद छु सान्यन माज्यन ओस पनॖव रज़ॖय या अट आसान ग्वडॖ ग्वडॖ। स्वनॖच प्रथा आयि मंज़ॖ प्यठय। यिमन ज़नानन डॆज्यहोर लऻगिथ छु नॖ तिमन पज़ि मानुन ज़ि यि छु अपशॊगुन आसान। सुहागॖच निशऻनी कनस मंज़ न थावुन छु वॊहव। तिथय पऻठ्य यिथ पऻठ्य ज़नानि हॖन्दिस ड्यकस प्यठ ट्यॊक न लागुन छु अपशॊगुन यिवान मानॖनॖ। डॆज्यहोर नाप तोल मुतऻबिक न आसुन छु माजि हॖन्दिस शुर्यसन्दि बापथ अपशोगुन। यि मऻनिथ पज़ि सान्यन ब्यॆन्यन यिम खान्दर कऺरिथ छि पनॖन्य संस्कार बचऻविथ तॖ रऺछ़रिथ थवॖन्य युस तिहन्द्यन शुर्यन बुथि बकार यी।
**************************
"पवन तॖ प्राण सॊमॖय ड्यूठुम
मीलिथ रूदुम शेर ख्वर ताम
दीह यॆलि मॊठुम अदॖ क्याह मॊतुम
न कुनि पवन तॖ न कुनि प्राण"
पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)