18.09.2019

18.09.2019 ॴशिद (आश्विन) गटॖ पछॖ (कृष्ण पक्ष) च़ोरम(देवादेव)(चतुर्थी) ब्वदवार (बुधवार),श्री सप्तर्षी सम्वत 5095, राश मेष (चलान),ऋतु वर्षा (चलान),काम्बॖर्य पछ (पितृ पक्ष)(चलान)..अज़ यी नॖ कॖन्हॗय श्राद्ध
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: ज़ान छय जहान्
    अ: रॊसूखॖ वऻलिस छु प्रथ कांह
          फ़ऻयदॖ मेलान
2. मु: ज़ाथ कवो रऻवॖय ज़चॖलो
         वऻन्स कवो रऻवॖय छ़ॊचॖरो
    अ: ग़ऺरीबी छि ज़ाथ रावरावान
         तॖ छ़ॊट्यसॖन्ज़ वऻन्स छॆ नॖ
         पताह लगान
3. मु: ज़ायि नॖ प्यायि नाहकय
         रऺट छ़ायि
    अ: ब्यॆयिसॖन्ज़ च्यॆट्य मऺल्य
          ह्यॆन्य/नाहकॖ शाहमत
          नऻल्य गछ़ॖन्य
4. मु: ज़ॖ तॖ ज़ॖ गऺयि च़ोर
    अ: समुतस छु बजर/यितिफ़ा
          कस छु ताक़त
5. मु: ज़ऺट हय दॖनि मऺट यी बरनॖ
    अ: ॳमीर आसनुक यिज़िहार
          करुन
**************************
1. अतुर.....An error/Fault/
                 Negligence/An
                omission/A slip
2. अटस खसुन.... To should-
                er responsibility/
           To ride on the back
3. अथॖ गछ़ुन.... Abortion/
                       Miscarriage
4. अथॖ मूरुन.....To regret/To
              repent/To grieve/
              To rue
5. अथॖवास करुन....To shake
              hands/To express
              greetings/Have
              friendly contact
6. अथॖवास....Handshake/
                     Friendship
7. अथॖ वऺथॖर....Deed of inhe-
                     ritance
8. अथाह.....Very deep/Un-
                 limited/Bottom
                 less/Immeasur-
             able/Beyond limit
9. अथस अन्दर थवुन..To keep
            in hand/Be able to
            influence/Possess
10. अथस प्यठ.....On hand/
            Very soon/Quickly
**************************
        गीता ज्ञान  :अध्याय 16
पऻन्य पानस स्रेष्ठ मानन वऻल्य गुमंडी मनुश मानॖ मदॖ मतॖवऻल्य,
पाखंडी व्यज़ रॊस यऺगन्य करान
वॊन भगवानन गीता ज्ञान
**************************
स्वामी लक्ष्मण जी आश्रम, सरिता विहारॖ, दिल्लि मंज़ ओस राथ हवन तॖ महाव्वतसव। सुबॖ प्यठॖ शाम ताम आसॖ म्यानि ब्यॆनि लजिमच़ॖ ख्यावनस तॖ च्यावनस मंज़। गारि पूर्य, तऺलिथ ओलव नदॖर्य, ज़ामुत द्वद, चाय वगैरा वगैरा। म्यऻन बऻय ति लऺगिथ सीवायि मंज़। हवनस प्यठ ओस मखन लाल कुकिलू सऻब बिहित तॖ पवन ब्रह्मा जी ॴस्य मंत्र परनस मंज़ व्यस्त। गर्मॖ क्रायि मंज़ हवन करुन छु नॖ सऺहल कथा। वारियाह भक्त ॴस्य आमॖत्य पनॖन्य हऻज़िरी दिनि। भगवान कऺर्यनख पनुन अथॖरॊट। हवन गव सुबहस शुरु तॖ दुह्यकिस दॊहस चल्यव। पूर्ण आहूती आयि कऺरीबन श्यॆयि बजि शामन दिनॖ तॖ पतॖ आव प्रसाद बऻगरानॖ। बतॖ दमोलु, व्वपल-हाक, तॖ ब्यॆयि अख सब्ज़ी आव बऻगरावनॖ नवीद रूपस मंज़। अमि अलावॖ ओस आमुत खिर बनावॖनॖ युस नऺवीदस सॗत्य आव बऻगरावन। दुह्यकिस दॊहस रूज़ कीर्तन चलान तॖ भक्त ति रूद्य यिवान च़ेर तामथ। अथ व्वतसवस मंज़ आव म्यॆ नज़रि ज़ि पांच़तऻजी-पन्च़ाह वॖहॖर्य ह्यॊर ह्यॊरॖय ॴस्य भक्त आमॖत्य। ज़ॖ च़ोर नवजवान ति आयि नज़रि। मगर यिमन शुर्यॆन पज़ि हे युन तॖ प्वन्य कमावुन तॖ ॴशिर्वाद स्वामी लक्ष्मन जीयुन न्युन, तिम शुर्य आयि नॖ नज़रि कॆंह। असि पज़ि पनॖन्यन शुर्यॆन मॊकॖ द्युन तॖ यिथ्यन हवनन प्यठ शिरकथ करनावॖनॖ बापथ आमादॖ करॖन्य।
**************************
"प्राणस सॗतीय लय यॆलि कऺरॖम
ध्यानस थऺवनम नॖ रोज़नस शाय
कायस अन्दर सोरुय वुछुम
पायस पोवुम कऺडमस ग्राय"
पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)