11.09.2019

11.09.2019 भऻद्रप्यथ (भाद्र) ज़ूनॖ पछॖ (शुक्ल पक्ष) त्रुवाह (त्रॆयॊदश)ब्वदवार(बुधवार)श्री सप्तर्षी सम्वत 5095, राश कुम्भ (रऻच़ हॖन्ज़ि 3.27 बजि प्यठॖ)ऋतु वर्षा (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: दऺग्य दऺग्य स्वन
    अ: मुकमल गोमुत चीज़/नारॖ
         द्राव स्वन/यि परखोवमुत
         आसि
2. मु: दमस सॗती नमस्कार
    अ: आसनस बासनस छु यज़थ
3. मु: दिल छु शीशि युथ वुछॖहऻस
         त्युथ वुछीय
  अ: युथ कऻन्सि योरॖ करव त्युथुय
        करि ओरॖ ति
4. मु: दिल लॊग हिलि प्यठ दब
         लॊग रबि प्यठ
    अ: मोजथ छु ऒन/पनॖन्य
         पसंद
5. मु: दुशमन नय तु शेंकुन क्याह
    अ: दुशमनदऻरी हॖन्ज़ अलामथ
**************************
1. अच़्यॊत.... Stupid/Silly/
             Foolish/Unwise/
             Ignorant
2. अरवन्ज़ाह.....Fiftyeight
3. अरहऻठ.........Sixtyeight
4. अर्थ.......Meaning/Pur-
             pose/Signification
             Intention/Sense/
             Import/Wealth/
             Properly/ Import
5. अरॖसरॖ....... Uneasiness
6. अरॖ...... Fulcrum
7. अर्पण....An offer in res-
                 pect/Delivering/
                An offering/En-
                trusting
8. ॳर्थी.....Funeral proces-
                sion
9. अरज़ुन..To earn/To work
                 To perform/To
                 gain/To get
10. अरदाह....Eighteen
**************************
         गीता ज्ञान  :अध्याय 16
 मऺखॖर फ़रेब गुमन्ड वोल इन्सान
न पूरॖ गछ़ॖवुन्य कामना थावान, अपॖज़्य चालॖ हमेशि पानॖनावान
वॊन भगवानन गीता ज्ञान
**************************
अख अवसर आव ब्यॆयि यॆलि ॳस्य बटॖ दुच़्यॆतिस मंज़ गऺयि ज़ि करव हय तॖ करव क्याह। द्वन जंत्रियन हुन्द वाद विवाद। विजयेश्वर पन्चांग छि द्वनवय मगर अख छि ओंकार नाथ जीयिन तॖ ब्याख छि पुनीत जियिन यानि स्व. डा.मनमोहन जीयिन। द्रठॖपऻन्च़ुक छु लगान मगर कर छु लगान यि छु नॖ सऺही सऺही ननान। अख छु ल्यॆखान अज़ रऻच़ हॖन्ज़ि 3.27 बजि प्यठॖ यानि ॳज़्यकि प्यठय तॖ दॊयिम छि ल्येखान 11/12 राथक्युथ 3.28 बजि प्यठॖ। द्रठपऻन्च़ुक म्वकलुनुक तिथि छु अख हावान 16-हऻमि तॖ दॊयिम छु हावान 16/17 राथक्युथ। अगर ॳज़्यकि प्यठॖ मानव  तॆलि गछ़ि म्वकलुन द्रठपऻन्च़ुक पान्च़ि द्वह पतॖ यानि आथवारि या 15-हऻमि मगर हावान छु पंचक समाप्त 16-हऻमि यानि अमि हिसाबॖ छि यिवान शॆ द्वह न कि पांछ़। दॊयिमा जंत्री छु हावान समाप्ति 16/17 तमि हिसाबॖ छि पांछ़ द्वह यिवान। चूंकि द्रठॖपऻन्च़ुक छु लगान धनिष्ठ नक्षत्र प्यठॖ रेवती नक्षत्रस ताम, धनिष्ठ नक्षत्र छु ग्वडन्युक जंत्रीवोल ब्वदवारि दुहुय यानि ॳज़्यकि प्यठय हावान तॖ द्वनवुनी जंत्रीयन हॖन्ज़ ग़लती छि ॴखरस बुगतॖन्य असि। ल्यॆखनवोल छु छ़ॊपॖ कऺरिथ। म्यॆ आव ॳकिस मित्रॖ सुन्द फ़ोन अथ मुतलक तॖ म्यॆ द्युत तऺमिस जवाब ग्वडनिचि जंत्री हिसाबॖ। मगर बॖ यॆलि सन्योस थोड़ा तॖ म्यॆ बासेयि क्याताम फरख। म्यॆ कॊर फ़ोन ॳकिस ज़ऻन्यकार गुरु जियस तऺम्य वॊन ॳज़्यकि प्यठय छु मगर ब्यॆयिस ॳकिस व्यद्वानसुन्द फ़ोन आव तॖ दॊयिमि जंत्रीहुन्द फोटू सूज़ुन तॖ म्योन तर्क दॊपुन छु ग़लत। येमिस मित्रॖसुन्द द्रठपऻन्च़कस मुतलक ग्वडॖ फ़ोन ओस आमुत म्यॆ ह्यॆच़्यो तऺमिस पनुन तर्क साफ़ करुन मगर जवाब वॊनॖनम ज़ि दॊयिम जंत्री छि ठीख तिक्याज़ि तऺम्य ओस ओंकारनाथ जियस ति फ़ोन कॊरमुत। म्वखसरॖ कथ छि असि छि वाकयी रऻवमॖच़ काहन गाव।धर्म गुरु प्यठॖ परम गुरुहस ताम।
ख़बर कऻत्यहान सान्यन बायन ब्यॆन्यन डलि द्रठपऻन्च़कॖच ग्रन्दॖय अज़। तवय ल्यूख नॖ म्यॆ हॆरि कनि  द्रठपऻन्च़कस मुतलक कॆंह
**************************
"ज़न्म प्रऻविथ कर्म सोवुम
धर्म पोलुम सॊय छम सथ
न्यत्रन अन्दर प्रेयम दोरुम
च़ोरुम तॖ मोनुम यिहोय अख"
पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)