29.09.2019

29.09.2019, ॴशिद (आश्विन) ज़ूनॖ पछॖ (शुक्ल पक्ष) ऒक्दॊह (प्रथम) आथवार (रविवार/एतवार), श्री सप्तर्षी सम्वत 5095, राश कन्या (चलान) ऋतु हरुद (शरद)(चलान)...नवरात्र गऺयि ॳज़्यकि प्यठॖ शुरु
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: च़लॖहऻ तॖ छुम नॖ वार रोज़ॖहऻ
          तॖ छुसय बार
   अ: रोज़नस नॖ वार तॖ न गछ़नस
       प्रथ तरफ़ॖ मुश्किलॖय मुश्किल
2. मु: च़म तॖ नम वऺसिथ रॊख्सथ
    अ: मॆहनत मशकथ कऺरिथ ति
          नॖ कॆंह हऻसिल युन
3. मु: च़लान तॖ लारान युन
    अ: दवान तॖ दोरान वातुन/
          जल-जल वातुन
4. मु: छ़लस तल छु हॊस ति बंद
    अ: छ़ॊम्बि सॗत्य ह्यॆकि कांह
         बॊड ताक़त ति वश गऺछ़िथ
5. मु: छ़ऺल्य न तॖ बऺल्य प्यॆठ्य न
         तॖ तऺल्य
    अ: कुनि न तॖ कुनि तऺरीकॖ कॆंह
          हऻसिल करुन
**************************
1. इतमिनान.....Confidence/
           Satisfaction/Calm-
           ness/Composure
2. इलहाम.... Revelation/
                    Inspiration
3. इतिबार.... Belief/Faith/
          Confidence/Esteem
          Credit/Credence
4. इल्ज़ाम.... Allegation/
           Accusation/Blame/
           Charge
5. इक़रार.....Promise/Con-
            tract/Admission/
            Declaration
6. इलतिमास......Request/
            Supplication/Pray-
            er/Petition
7. इलहाक्.....Joining of
            hands/Coming to-
            gether/Accession
8. इमतियाज़....Discrimina-
                tion/Distinction
9. इमदाद.....Help/Aid/Sub-
              sidy/Relief/Assis-
              tance/Support
10. इमला.....Script/Writing
              system/Dictation
              Orthography
**************************
          गीता ज्ञान  :अध्याय 17
हे भारत श्रदा सारिनॖय मनुशन,
यिहॖन्द्यव अन्त:कर्नव किन्य आसन, श्रदा म्यॆ प्वरुशस तिछ़ श्रदा आसान
वॊन भगवानन गीता ज्ञान
**************************
काम्बॖर्य पछ वोत अंद राथ तॖ ॳज़्यकि प्यठॖ छि ब्याख व्वसॖ-द्रोसॖ। स्व गऺयि नवरात्रा। अज़ छु ऒक्दॊह तॖ नवम ताम रोज़ि माजि दुर्गा हॖन्द्यन नवन रूपन हॖन्ज़ पूज़ा अर्चना सपदान तॖ माजि दीवी पनुन अनुग्रह रोज़व मंगान। यिमन नवन दोहन छि कऻशिर बटॖ कॆंह पूरॖ नवन दॊहन फाकॖ दरान, कॆंह छि सिरिफ़ कॆंह दुहॖय फाकॖ दरान, कॆंह छि नॖ दरानॖय, कॆंह छि सिरिफ ॴठम फाकॖ दरान। माने शास्त्रॖ दऺस्य छि छूट यॆमिस यिथॖ पऻठ्य मन वनि सु करि फाकॖ तमी हिसाबॖ। अगर त्वहि याद आसि ज़ि कऺशीरि मंज़ ॴस्य ॳस्य नावरात्रॖ-क्यन ग्वडॖनिक्यन च़्वन दॊहन मामस याने न्यॆनि-स्युन ख्यवान। पऻन्च़म प्यठॖ ॴठम ताम ॴस्य फाकॖ थवान सु ति यॆमिस यॆच़ द्वह ख्वश करहऻन। तॖ नवम द्वह ॴस्य ब्यॆयि न्यॆनि-स्युन ख्यवान। अमि द्वह ॴस्य तऺहर तॖ च़र्वन च़ऺक्रीश्वर खारान यथ ॳस्य वनान ॴस्य च़ॊट खारुन। यि शास्त्र कत्यन बदल्यव, क्याज़ि बदल्यव, कऺम्य बदलोव, कमि ह्वॊकमॖ बदलोवॖन, बटव क्याज़ि त्रोव कऺशीरि न्यबर नीरिथ न्यॆनि-स्युन ख्यॊन, च़ॊट नॖ खारुन, यि फल्सफॖ तॊर नॖ म्यॆ फिकिरि कॆंह। कॆंह बख़त छि नवदुर्गा ववान तॖ नवि दॊह पतॖ विसर्जन करान। ॴठम या नवम द्वह छि कन्यकॖ पूज़ा यिवान करनॖ। अथ पूज़ायि मंज़ ति छु आमुत कति कोर बदलाव तॖ लॖज्यमॖच़ मान मान या देखा देखी। अथ मुतलक करव कथ  ब्रौंहकुन।
हालस छुवॖ त्वहि सारिनी नवरात्राय हुन्द पोश्तॖ।
**************************
"लोलॖकि नारॖ ललि ल्वलि ललॖनोवुम
मरनय म्वयस तॖ रूज़ॖस नॖ ज़रय
रंग रच़िह ज़ऻच़ॖय क्या नॖ रंग होवुम
बॊ दपुन च़ॊलुम तॖ क्याह सना करे"
पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)