14.09.2019

14.09.2019 भऻद्रप्यथ (भाद्र) ज़ूनॖ पछॖ (शुक्ल पक्ष) पुनिम (पूर्णमा) बटॖवार (शनिवार/ शनिश्चरवार),श्री सप्तर्षी सम्वत 5095, राश मीन ( दुहचि 4.11 बजि प्यठॖ)ऋतु वर्षा (चलान),द्रठॖपऻन्च़ुक (पंचक) (चलान)...काम्बॖर्यपछ छु ॳज़्यकि प्यठॖ शुरु...पगाह ऒक्दुहुक श्रा‌द्ध यी अज़
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: दहि वुहिर्य दशहार
    अ: स्व खुशी य्वस वारिहाय
         कऻल्य मेलि
2. मु: दऺहन दऺह मन छॊनन नॖ
         कुनिस मनुट पोशि नॖ
    अ: वारिहान बऻच़न छि बरकथ
          कुन छु न पोशान
3. मु: दय हय दी तॖ पोशख नॖ
         रटनस
   अ: यॆलि दय मॆहरबऻनी करि
         तॆलि छु फिर्य फिर्य छ़ॖनान
4. मु: द्वयव अथव छॆ नॖ च़ऺर
         वज़ान
    अ: कुन ज़ॊन छु नॖ कामि
         पोशान
5. मु: द्वह यिवान तॖ छ़ॊ द्यावान
       द्वह यिवान तॖ गॊह ख़यावान
    अ: यॆलि रॖत्य द्वह यिवान छि
         तॆलि छि अथ वथ यिवान
**************************
1. अडॖ ख़ाम....Not fully ripe
2. अडॖ फॊल ...Unbloomed/
                     Half opened
3. अडॖ फॊट.... Uncooked/
                Unbashed/Raw
4. अड फलि गाशॖ....At dawn/
                Early morning/
                Early enough
5. अडॖ पॊप....Raw/Half ripe
6. अडॖ प्रोन....Not fresh/
               Second class/
               Used dress
7. अडॖ प्रॊन....Half white/
                     Half fair
8. अडॖ बुज़.....Unroasted/
                      Half fried
9. अडॖ ओम....Half boiled/
                      Half cooked
10. अदम.....Ill mannered
              person/Mean/In-
              ferior/Evil
**************************
          गीता ज्ञान :अध्याय 16
सिरिफ़ सौंचान करॖ कूत हऻसिल,
बाकय मनोरथ ति पूरॖ करॖ बिल्कुल, दौलथ किथॖ कऺन्य छि ज़्यादॖ बडान
वॊन भगवानन गीता ज्ञान
**************************
डॆजहोर छु यिवान लगावन दिवॖगोनस प्यठॖय कोरि य्वस व्वंय माहरॖनि रूपस मंज़ छि अच़ान।
असि कऻशिर्य बटन मंज़ छु डॆजहोर यिवान मंगल सूत्रस बराबर मानॖनॖ। यि छु अख स्वनॖसुन्द ज़ेवर। अम्युक वज़न छु दारोमदार करान ज़ि कऺमिस मऻलिस माजि कऻछ़ा पौंसॖच सहूलियत छि। यि प्रथा छि वारियाहाव सऺदियव प्यठॖ आमॖच़ चलान। मंगल सूत्र छु हॆन्द्य समाजस मंज़ हऺटिस मंज़ नऻल्य त्रावनॖ यिवान मगर डॆजहोर छु कऻशिर्य ज़नानि कनन मंज़ यिवान लगावनॖ। अमि बापथ छि कोर्यॆन ल्वकचारसॖय मंज़ कन यिवान च़्वम्बनॖ यानि कनन मंज़ ज़ॊद यिवान करनॖ। डॆजहोर गछ़ि ज़नानि हॖन्दिस सीनस ताम ज़्यूठ आसुन। कऻशिर्य ज़नानि हॖन्ज़ प्रज़नथ छि ॳम्यसुन्द यि डॆजहोर।खान्दर कऺरिमच़ि ज़नानि पज़ि हर हमेशि डॆजहोर कनन मंज़ लऻगिथ आसुन। चूंकि दिवॖगोनस प्यठ छु ज़ेवरातन मंत्रॖव दऺस्य यिवान शक्ति प्रदान करनॖ, डॆजहोर छु ॳकिस विवाहित ज़नानि रक्षा सूत्रॖच कऻम ति करान रोज़ान। अमि डेजिहारॖच बनावट छि आसान दॊयव तरफव नुकीलि बऺनिथ तॖ मंज़स छु आसान चपटॖ ति या अर्ध गोलऻयी आकारॖस मंज़। दॊयव तरफॖ ज़ॖ प्यॆत्य छि आसान शिव तॖ शक्ति प्रतीक तॖ मंज़िम हिसॖ छु मानॖनॖ यिवान गृहस्थ आश्रमुक प्रऺतीक। यि कथ छि जऻरी
**************************
"त्यमबॖर प्यॆयस कवॖ नो च़ऻजिन
मस रस कवॖ ऒहनऻजन गोस
शांतन हॖन्ज़ क्रय तुलमुल वऻजिन
अन्दरिम गाह यॆलि न्यबर प्योस"
   पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)