26.09.2019

26.09.2019, ॴशिद (आश्विन) गटॖ पछॖ (कृष्ण पक्ष) बाह (देवादेव) (द्वादऺशी) ब्रसवार (वीरवार/ब्रहस्पथवार),श्री सप्तर्षी सम्वत 5095, राश सिंह (सुबहॖचि  6.18 बजि प्यठॖ), ऋतु वर्षा (चलान), त्रुवुश हुन्द श्राद्ध यी ॳज़्य
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता   मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: छ़ॊटि बरॖ व्वटॖ बोर
    अ: सऺहल वथ छ़ान्डॖन्य
2. मु: च़्वन पऺहरन कस दॊद च़ोंग
    अ: दौलथ छॆ नॖ पोशवॖन्य
3. मु: च़्यथ रछय तॖ वऻन्लिज
         तछय
    अ: ज़बऻन्य तसला द्युन तॖ
         अन्दॖर्य ज़ख वातनावुन
4. मु: च़्यॆगि ना यंगॖ लॊग तस
    अ: कऻन्सि हुन्द आसुन बासुन
          नॖ ख्वश युन
5. मु: च़्यॆ हिशि गबि छा न्यूर
         खसान
    अ: नऻतवान इन्सान छु नॖ कुन
          वातान/कमज़ोर शख्स
          क्या करि
**************************
1. अप्यर करुन.....To boast/
              To brag/To hector
               To bounce
2. अप्यर...Boasting/Words
            used in self praise
3. अपऻर्य.....From that side/
                   On that side
4. अपऻर्य मुनन दानि यपऻर्य गऺयि
     अथन हठ
     To show sensitiveness
     To show delicacy
5. अपऻरिम.....Outsider
6. अपारि यपोर....From all
             sides/Entire/
              Whole/Entirely
7. अपारि.....On the other
                    side/Across
8. अपार.........Unlimited
9. अपान........Emission of
                      wind
10. अप्रसन्न.... Unhappy
**************************
         गीता ज्ञान  :अध्याय 17
            अर्ज़न दीव वनान       
अर्ज़न दीव श्री भगवानस पृछ़ान
यिम मनुश शास्त्र विदी त्रावान
श्रदायि सान दीव आदि दीवस बजान, वॊन भगवानन गीता ज्ञान
**************************
अख मान्यता छि यि ज़ि व्यूग छु ब्रंहाडुक आकार। माहराज़ॖ छु खान्दरॖ ब्रौंठ ॳकिस ब्रह्मचारि रूपस मंज़ आसान नच़ान फेरान। व्यूग छु ॳमिस च़्यॆनवॖन्य दिवान ज़ि च्योन यि ब्रह्मचऻरी रूपॖ समाप्त सपदिथ यी च़्यॆ गृहस्थ आश्रमुक द्वार मुच़रावान। च़्येवुन्य छुस दिवान ज़ि वुन्युखताम ओसुख च़ॖ सऻर्यसॖय ब्रह्माडस कुनु ज़ॊन मगर व्वंय यी च़्यॆ मंज़ नारी शक्ति प्रदान करनॖ यॆमि सॖन्दि मद्दतॖ सॗत्य च़ॖ ह्यकख गृहस्थ आश्रम सम्बऻलिथ तॖ पनुन वंशज ब्रौंह कुन पकनऻविथ। मोहन्जोदाडा तॖ हडपा प्यठॖ दपान  वीगिच प्रथा छि पकान आमॖच़। गरिकिस आंगनस मंज़ छु यि माहराज़ॖ पूरॖ वीगिस प्यठ खडा रोज़ान मगर होवुर वऻतिथ छि अथ वीगिस प्यठ न्यस्फस माहराज़स तॖ न्यस्फस माहर्यॆन  सॗत्य खड़ा रोज़ान ॳकिस शक्ति रूपस मंज़ ॳमिस अनज़ान मर्दस  पनुन राज़दार बनावनुक क़सम करान ताकि यिम द्वनवय मीलिथ अख ॳकिस सॗत्य चलावन गृहस्तॖच नाव तॖ सॗत्य सॗत्य बऺडरावन पनुन वंश ब्रौंहकुन। लऺगनस प्यठ मंत्रव दऺस्य छि स्व रसॖम यिवान पूरॖ करनॖ। आधार छु मगर व्यूग यॆति प्यठॖ यिमन द्वन बऻच़न पनॖन्य जीवन यात्रा शुरु सपदान छि। यि व्यूग छु च़्यॆनॖवुन्य दिवान ॳमिस मनुशस ज़ि च़ॖ छुख नॖ कुनुय ज़ॊन बल्कि च्यऻन्य अर्धान्गनी छय च़्यॆ सॗत्य शक्ति रूपस मंज़ य्वस च़्यॆ विज़ि विज़ि वथ रोज़ी हावान।अमि म्वखॖ छु व्यूग स्यठाह थॊद महत्व थवान सऻनिस कऻशिर समाजस मंज़। अथ वीगिस छि न्यॆबरॖम्य गोलऻयि चूनॖ सॗत्य यिवान बनावनॖ ति क्याज़ि चूनस छु नॖ कांह भूत प्रॗत पोरान। वीगिस अन्दर छि ब्यॊन ब्यॊन रऺग बऺरिथ यिहन्दिस गृहस्थ आश्रमस मंज़ बहार छावनॖच कामना करान।
**************************
"यस नॖ कॆंह कान तय छॊनुय यस तरुय
सु कुस शूरवीर य्वदस नेरे
अन्दरी नय गलि तस वॆहनुय ब्यॊलुय
शैय नय आसि तय क्रय कति व्यपे"
पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot ति वुछिव)