19.09.2019

19.09.2019 ॴशिद (आश्विन) गटॖ पछॖ (कृष्ण पक्ष) पऻन्च़म (पन्चमी) ब्रसवार (वीरवार/ ब्रहस्पथवार)श्री सप्तर्षी सम्वत 5095,राश वृष (दुहचि 3.10 बजि प्यठॖ), ऋतु वर्षा (चलान), काम्बॖर्य पछ (पितृ पक्ष) (चलान)..पऻन्च़म हुन्द श्राद्ध यी ॳज़्य...
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: ज़चि पुर नॊन गछ़ुन
    अ: तिम सिर नऺन्य गछ़ॖन्य
         यिमव सॗत्य इन्सान मन्दॖछनॖ
         यी
2. मु: ज़चि ज़ऺट तॖ पचि पऺट
    अ: हिविस ह्यु मेलुन/पानस
         ह्युवुय रिश्तॖ मेलुन
3. मु: ज़च्यन नॖ नाल अथि यिन्य
   अ: सख़ बाम्बॖर प्यॆन्य/वुतावली
        मंज़ न्येरुन प्यॊन
4. मु: ज़्यादॖ असुन गव ख़रस
         खसुन
   अ: नाहकॖ असुन गऺयि बेवॖकूफी
        ज़्यादॖ असनस छु नॖ व्यकार
5. मु: ज़ुर तॖ ब्रोर ख्यथ ति म्यव
    अ: कोरि हुन्द शुर तॖ ब्रोर छु
         ख्यॆय ख्यॆय ति नाशुकुर
         करान
**************************
1. अथस ज़ॊद आसुन....Spend
              thrift/Extravagant
              person/Prodigal
2.अथस क्यथ थवुन....To put
                              in hand
3. अथस मंज़........In hand
4. अथोल.....A tree with full
                   of branches
5. अथॖ ख्यावुन....Black mail
6. अथॖ ख्वर ......Hands and   
                         feet
7. अथॖ ख्वर वाहरॖन्य....To
              move freely/To
              extent the range
             of work/Complete
             rest
8. अथॖ ख्वर लगुन....To stand
             on his own feet/
          To work/To engage/
          To start earning
          something/To begin
          earning
9. अथॖ शॆहलावुन....To help at
            the time of difficul-
            ty/To help/To give
            relief/To support/
            To assist
10. अथॖ शलक....Beating
             some one/To beat
             some one with
             hands
**************************
         गीता ज्ञान  :अध्याय 16
यिम अहंकार बलॖ तॖ क्रूदॖ बऺरिथ
पनॖन्यन तॖ दॊयिम्यन देह मंज़ दऺरिथ म्यॆ अंतरयऻमियस सॗत्य दॖय थावान
वॊन भगवानन गीता ज्ञान
**************************
डॆजहोर अकिस कऻशिर्य ज़नानि हॖन्दि बापथ कोताह महत्वपूर्ण छु आसान अथ प्यठ वोत म्यॆ पऺतिम्यव दॊयव त्रॆयव दॊहव प्यठॖ वनान। ज़नानि हॖन्दि पनॖनि बापथ, पनॖनिस रॗन्यसॖन्दि बापथ, पनॖन्यन शुर्यन हॖन्दि बापथ तॖ अथ मंज़ कऻछ़ा दैव्य-शक्ति छि यि वोत म्यॆ व्यस्तारॖ सान वनान। म्यॆ आयि कॆंह प्रतिक्रियायि ति तॖ कॆंह फ़ोन ति अथ मुतलक। म्यॆ आव वनॖनॖ ज़ि माहरा वारियाह ज़नानॖ यिम नोकरी पेशॖ छि छॆ नॖ डॆजहोर लागान ज़ऻनिथ मऻनिथ ति क्याज़ि वारियाह हऻदिसॖ आयि सपॖदान यॆलि थप्पलव नी ज़नानन हॖन्द्य कनॖय च़ऺट्य च़ऺट्य यि डॆजहोर स्वनॖसुन्द आसनॖ म्वखॖ। कॆंच़व ज़नानव छु ज़ऻनिथ मऻनिथ डॆज- होर न लागनुक मन बनोवमुत ति क्याज़ि तिहन्दिस वर्धनस या ड्रसस सॗत्य छु नॖ डॆजहोर मेल ख्यवान शायद।फऻशनस मंज़ छु आमुत कति कूत बदलाव तॖ  ज़नानॖ छि व्वंय जीन तॖ टी शऻर्टि मंज़ॖय नच़ान फॆरान तिमन छु यि ज़ेवर लागुन खरान ति क्याज़ि डॆजहोर छु अलोंद रोज़ान युस नॖ तिमन ख्वश छु करान। वारिहाव दित्य वारियाह तर्क डॆजहोर कनन मंज़ न लागनुक। कॆंच़न ज़नानन यिमन लऻगिथ छु तिमव छॆ नॖ अथ स्व ज़ीठ अट बनावनऻमॖच़ बऺल्कि तिमव छु कम वज़नुक तॖ ल्वकुट म्वकुट डॆजहोर असली आकारॖ रॊस बनावनोमुत तॖ कनन मंज़ॖय कनॖ दूरॖक्य पऻठ्य लगावनुक तऺरीकॖ पानॖनोवमुत। सवाल छु व्वंय असि ब्रौंहकनि ज़ि असि पज़्याह डॆजहोर लगावुन किनॖ न। अगर लागुन छु तॆलि कमि आयि त्रायि गछ़ि आसुन तॖ अगर नॖ लागुन छु तॖ अम्युक विकल्प क्याह छु। अमि बदलॖ क्याह पज़ि लागुन त्युथ यॆमि सॗत्य सोन संस्कार ति बरकरार रोज़ि, धर्मॖच लाज ति रोज़ि तॖ पनॖन्य सभ्यता ति मरि नॖ। असि पज़्याह मऺशरावुन दिवगोनुक महत्व सान्यन कॊर्यन हॖन्द्यन ज़ेवरातन युस यिवान छु मंत्र दऺस्य  प्रदान करनॖ। यि छु अख संजीदॖ सवाल यथ प्यठ असि सोंचुन पज़ि
**************************
"मनस सॗतिय मनॖय गॊन्डुम
च़्यतस रऺटॖम च़्वपऻर्य वग
प्रकृच़ सॗतिय प्वरुश नो वॊलुम
सरॖह म्यॆ कॊरुम लऺबॖम वथ"
पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
  भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)