16.09.2019

16.09.2019, ॴशिद (आश्विन) गटॖ पछॖ (कृष्ण पक्ष) द्वय (देवादेव)(द्विति), च़ऺन्दॖरवार (सोमवार),श्री सप्तर्षी सम्वत 5095, राश मेष (रऻच़ हॖन्ज़ॖ 4.21 बजि प्यठॖ),द्रठपऻन्च़ुक (पंचक) ति गछ़ि समाप्त अज़, ऋतु वर्षा (चलान)....त्रॆयि हुन्द श्राद्ध यी ॳज़्य
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
*************************
1. मु: रऻछस दॊहा तॖ च़ूरस गऺरा
    अ: वुम्रि हॖन्ज़ रऻछ छि रछ़ा
         ग़फ्लऺच़ किन्य क्वलि गछ़ान
2. मु: डेडि तलय चरॖस दज़ान
    अ: यॆलि बऺडिस हऻक्यमस ब्रौंह
          कनि कांह वुल्टॖ कऻम
          सपदि
3. मु: रब तॖ सब हिशी कथा
    अ: यॆलि रॖतिस तॖ क्रॖतिस
          फ़रकॖय रोज़ि नॖ
4. मु: रतस तॖ त्रेशि
    अ: सख़ अदावत
5. मु: रॖतिस छि दऺह बऻग्य
    अ: जान कारस छि सऻरी
          व्वमेदवार आसान
************************
1. अटल...Constant/Strong
                Firm/Unchange-
                able/Unmoved/
              Steady/Steadfast
2. अटकाव..... Interruption/
              Obstruction/Pre-
              vention/Suspen-
              sion
3. अटॖ रज़.....A part of an
              ornament/Hang-
              ing chain/The
              tying rope
4. अटॖ होर....A part of an
              ornament used by
              Kashmiri Hindu
              women
5. अटॖ.....To carry at back
6. अटकल....To guess/In-
                    genuity
7. अठ.....Golden chain of
               ear
8. अछिपोश.....A flower
9. अछोव.....Uncooked/
                   Half cooked
10. अछॖदऻर....Doll
**************************
        गीता ज्ञान  :अध्याय 16
छुस दनॖवान कॊटम्ब वोल, म्यॆ सिवाय छु नॖ कांह आसन वोल
बॖ यऺगॖन्य करॖ ब्यॆयि दिमॖ स्यठाह
दान
वॊन भगवानन गीता ज्ञान
**************************
डेज्यहोर छु सऻनिस समाजक्यन खान्दरवाज्यन ज़नानन हुन्द सुहागॖच निशऻनी। अमि डॆजहॆरुक ज़ेछर छु आमुत थवनॖ ज़नानीहॖन्दिस सीनस ताम कुनि ख़ास वजह किन्य। मंत्रव दऺस्य दिवॖगोनस प्यठ छि यिमन ज़ेवरातन शक्ती यिवान प्रदान करनॖ तॖ यथ मंज़ डॆज्यहोर छु ख़ास महत्व थवान। मानॖन छु आमुत ज़ि द्वदॖ शुर यॆलि माजि हुन्द द्वद चवान छु, डेज्यहार्यिच शक्ती छि अथ द्वदस वातान तॖ तमि द्वदॖ सॗत्य छु शुरिस शक्ती मेलान रोज़ान तॖ शुर छु महान बनान बऺडिथ। शुर छु संस्कऻरी बनान। दपान छि ज़ि शायद छु यिति अख वजाह यॆमिकिन्य कऻशुर बटॖसुन्द द्यमाग छु थॊद तेज़ तॖ अक्लि बऺरिथ आसान। मानॖनॖ छु यिवान ज़ि डॆज्यहऻर्य दऺस्य धार्मिक शक्ती मेलनॖ सॗत्य छु नॖ शुर ग़लत काम्यन लगान तॖ ॳम्यसॖन्द्य मनॖक्य भाव छि रोज़ान  सकारात्मक तॖ श्वद। ॳम्यसॖन्द्य व्यच़ार छि मॊदॖर्य तॖ मीठ्य बनान। यि छु ॳमिस शुरिस पनॖनि माजि हन्दिस द्वदस  मंज़ असर तॖ अथ असरस पऺत्यकिन छि अख दैव्य शक्ती कऻम करान। यि छु मानॖनॖ आमुत ज़ि शुर छु बऺडिथ हॊन्नरमंद तॖ आज्ञाकऻरी बनान। मिलनसार तॖ ईमानदार बनान। मगर शुर्यॆन हॖन्द्यन यिमन ग्वनन म़ज़ छि अज़कल दरार आमॖच़ नज़र यिवान। वजूहात छि वारियाह। करव पगाह अथ प्यठ ब्यॆयि ब्रौंहकुन कथबात
**************************
"परुन स्वलब तॖ पालुन द्वरलब
सहज़ गारुन सिखिम तॖ क्रूठ
अभ्यासॖकि गनिरय शास्त्र मॊठुम
च़ीतन आनन्द निश्च़य गोम"
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)