02.10.2019

02.10.2019, ॴशिद (आश्विन) ज़ूनॖ पछॖ (शुक्ल पक्ष) च़ोरम (देवादेव) (चतुर्थी) ब्वदवार (बुधवार) श्री सप्तर्षी सम्वत 5095, राश वृश्चिक (सुबहॖचि 7.9 बजि प्यठॖ), ऋतु हरुद (शरद) (चलान), नवरात्र चलान
*************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: छ़ॊह मारॖन्य द्वह वुछिथ
    अ: मॊकॖ वुछिथ फ़ऻयदॖ तुलुन/
         वख वुछिथ यायमॖ करुन
2. मु: छ़्यॊट हय ख्यॆज़ि मेठि कि
         तमाह
    अ: कऻन्सि पतॖ पतॖ पकनस
          गछ़ि कॆंह फ़ऻयदॖ मेलुन
3. मु: छ़ॊप गाव गुदऻम्य खाव
    अ: ख़ामोश इन्सान छु वुटुकुर
         आसान
4. मु: छ़ॊर अथ छु नॖ अच़ान
         ॴसस ति
    अ: लाचऻरी छि इन्सानस
         मारान
5. मु: सानि ज़ूरि ति दॊद च़ोंग
    अ: यॆमिच नॖ व्वमेद आसि ती
         बनुन
**************************
1. इसतादॖ......Upright/Stand
                      ing
2. उस्ताद.....Teacher/Guide
3. इरशाद....Expression/Be-
                  hest/Command
                  Guidance
4. इरादॖ..... Intention/Mind/
                 Desire/Design/
                 Plan/Determina
                 tion
5. इखलास..... Attachment/
                 Sincerity/Loyal
6. इख्तियार ... Authority/
             Power/Command
           Discretion/Control
           Choice/Option
7. इदारॖ..... Institution/
           Organisation/Estab
           lishment/Adminis-
           tion/Office/Depart-
           ment
8. इदारिय..... Editorial/Take
             to leading article
9. इदरार.....Urine
10. इसबन्द...A kind of seed
             burnt at certain
             occasions for
             fragrance
**************************
          गीता ज्ञान :अध्याय 17
यिम शऺरीर रूपॖ दऻरिथ सारिनॖय ज़ीवन, अंत:कर्नन मंज़ म्ये कष्ट
दिवान, ति अज्ञऻनी असुर स्वबावॖ आसान
वॊन भगवानन गीता ज्ञान
**************************
हऻरऻनीय छि गछ़ान यि वुछिथ ज़ि बजि कोरि पॖन्च़ॖहि त्रॖहि वॖहरि ह्यॊर यिम खान्दरॖ रॊस छि वुनि या बऺड्य लऺडकॖ त्रॖहि दॊयत्रॖहि वॖहरि ह्यॊर यिम खान्दरॖ रॊस नच़ान नज़र यिवान छि। प्वत काल कुन अगर पनॖन्यन ख़यालन फ्युर दिमव तॖ याद छु प्यवान  ज़ि ॳकिस त्रॖह वुहिर्य शुरिस ॴस्य त्रॆ च़ोर पांछ़ शुर्य ज़ामॖत्य आसान मगर अज़कल छि त्रॖह वऺरिश कूर या त्रॗह दॊयत्रॖह वुहुर लऺडकॖ  वुनि शुरुय यिवान मानॖनॖ।फिकिरी छु नॖ तरान ज़ि यि लऺडकॖ या कूर खान्दर कर करि, ॳमिस शुर्य कर ज़्यवन तॖ यि गृस्थ आश्रमस मंज़ ख्वर कर डऺखरावि तॖ गृस्थ आश्रमॖच नाव कर चलावि।यि ति छु अख ख़ास वजह ज़ि सान्यन गरन मंज़ छु नॖ अकि या द्वयि अलावॖ शुर्य नज़र यिवान ति कयाज़ि खान्दर छु वारियाह च़ीर्य सपदान।  म्यॆ यॆलि ति नज़र त्रऻव म्यॆ बास्यव ज़ि सऻनिस समाजस मंज़ छि कोर्यन हॖन्ज़ संख्या बन्यसबतॖ लऺडकन हॖन्ज़  ज़्यादॖ। म्यॆ छु बासान ज़ि लऺडकन हॖन्ज़ संख्या छि सऻनिस समाजस मंज़ स्यठाह कम। यिति छु अख ख़ास वजह ज़ि सानि कोरि छि वुन्युख ताम अनहर्यशय। म्यॆ छु नॖ बासान असि छु वारियाह कालॖ प्यठॖ कोर्यन तॖ लऺडकन हॖन्दि न्यसबतुक शुमार कॊरमुत ताकि पताह लगिहे ज़ि असि छा लऺडकन हॖन्ज़ कमी किनॖ कोर्यन हॖन्ज़। प्राईवेट इदारन मंज़ कऻम करनॖ म्वखॖ छु नॖ ह्यकान यि लऺडकॖ या कूर ऒरॖ यॊर डऺलिथ तवॖ किन्य छु यि मजबूर गछ़ान शायद पनॖनिसॖय इदारस मंज़ गऻर ज़ऻच़ हुन्द लडकॖ या लड़की सॗत्य खान्दर करनॖ बापथ।
सान्यन ज़िठ्यन पज़ि यिमन कथन प्यठॖ ग़ोर करुन तॖ छान्डुन
कांह मुस्तकॖल हल। पनॖन्यन मांगन प्यॆयि असि ड्यॆजर द्युन तॖ कम ज़्यादॖ च़ालुन तॆलि छु म्यॆ विश्वास ज़ि सानि कोरि या सऻन्य लऺडकॖ गछ़न बजाह। असि पज़ि नॖ कारकुन तॖ अकारकुन ज़ऻच़न सवुन तॖ न पज़ि असि गाम शहर फरॖख करॖन्य य्वस नॖ वैसे ति कऺशीरि न्यबर यिथ रूज़ अगर ॳस्य वाकॖय छि यछ़ान ज़ि सऻन्य यिम शुर्य गछ़न खान्दर कऺरिथ पनुन गृस्थ आश्रम सम्बालॖन्य।
**************************
"हा च़्यता कवॖ छुय लॊगॖमुत परमस
कवॖ गॊय अपज़िस पज़्युक ब्रोंथ
व्यशि बॊज़ वश कॊरनख पर धर्मस
यिनॖ गछ़नॖ ज़्यनॖ मरनॖ क्रोंत"
 पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
  भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)