07.10.2019

07.10.2019 ॴशिद (आश्विन) ज़ूनॖ पछॖ (शुक्ल पक्ष) नवम (देवादेव) (नवमी) च़ऺन्दॖरवार (सोमवार),श्री सप्तर्षी सम्वत 5095, राश मकर (चलान),ऋतु हरुद (शरद) (चलान)...नवरात्र (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: सहल चीज़स प्यठ जहल
    अ: मोमूली चीज़स या कथि
         प्यठ शरारत खसुन
2. मु: सेरॖ वाव ख्वतॖ छु डेरॖ वाव
         सख़
    अ: ख्यनॖ चीज़ न आसनॖ सॗत्य
         छॆनॖ तीच़ सख्ती गछ़ान
         यीच़ सख्ती गछ़ान छि जाय
         न आसनॖ किन्य
3. मु: स्यॆदिस हॊल करि क्याह
    अ: युस दिलॖ साफ़ आसि तस
          छु नॖ ब्यॆयिसुन्द हजर कॆंह
          करान
4. मु: स्यॆज़ि ऒंगजि छु नॖ ग्यव
         खसान
    अ: युस चीज़ नॖ स्यॊद स्यॊद
         हऻसिल सपदि सु छु कुनि
         विज़ि हजरॖ सॗत्य हऻसिल
         प्यवान करुन/रोब दाब
         करुन ति छु ज़रूरी।
5. मु: स्यॊद सादॖ माहराज़ॖ
    अ: सादगी छु पनुन बजर/
          स्यॊद सादॖ गव शहज़ादॖ
**************************
1. आमादॖ.....Ready/Agreed
                    Prepared
2. आमॖताव.... Searing
3. आमॖलेट....Omellete
4. आमदनी....Income/Profit
             Receipts/Revenue
5. आमदरफ़्त...Arrival and
             departure/Traffic
6. आमॖन्युक टॊट.... Cunning/
             Impostor/Pretend
             er/Trickster
7. आमुन...Smell of burning
                cloth
8. आम....Thread worm/
                Common
9. आंफ़.....Hope/Trust/
                 Quarter/Region
10. आमीन....Words used
               at the end of a
               prayer/May it be
**************************
         गीता ज्ञान   :अध्याय 17
शास्त्र व्यज़ सान यऺगन्य करान कर्तव्य ज़ऻनिथ करान फल नॖ यछ़ान, स्वख दिनॖ वोल यि सातवॖक्य यऺगन्य ज़ानान।
वॊन भगवानन गीता ज्ञान
**************************
अख कहावत छि ज़ि कऺशीरि मंज़ ओस अख राख्युस यॆमिस नाव ओस जलोद्बव। दपान दीवता ॴस आमॖत्य तंग ॳमिस राख्यसॖ सॖन्दि दुर्व्यहारॖ तॖ ज़ुल्मॖ सॗत्य तॖ यिम दीवता गऺयि शरण कश्यप ऋशिस तॖ कऺरख ॳमिस ब्रौंह कनि मातायि हॖन्ज़ आराधना। वनॖनॖ छु यिवान ज़ि कश्यप ऋशि सॖन्दि तपोबलॖ सॗत्य दोर मातायि शारिकाय हुन्द रूप तु कॊरुन जलोद्बव सुन्द वध। कहावत छि ज़ि जलोद्बव सुन्द शरीर बन्यव अख पहाडकिस रूपस मंज़ तॖ शारिका माता आयि हऻर बऺनिथ तॖ बीठ ॳथ्य पहाडकिस त्यॆंतऻलिस प्यठ। ॳथ्य जायि आव नाव दिनॖ शक्तिपीठ या हारीपर्वत या च़क्रीश्वर। शारिकायि हॖन्ज़ स्थापना ति छि आमॖच़ करनॖ कऺशीरि मंज़ ब्यॊन ब्यॊन जायन तॖ कऺशीरि न्यबर 1990-तॖ पतॖ आव हारीपर्वत बनावनॖ अनंगपुर, फऺरीदाबाद यॆमुक श्रॆह छु गछ़ान स्वर्गीय जे एन कौल सऻबस यॆमिस मायि मोहब्बतॖ सॗत्य वनान छि पापा जी ति। यिथॖ पऻठ्य छि शारिका दीवी ति रूज़िथ कऺशीरि मंज़ ब्यॊन ब्योन रूपन मंज़। त्रुपरा दीवी करफऺल्य मऺहलॖ, हब्बॖकदलॖ दपान छु माजि शारिकाय हुन्दुय अख रूप।
**************************
"गगनस भूतलस शिव यॆलि ड्यूंठुम
रवस लऺब नॖ रोज़नस जाय
सिरियिके प्रभाव विशमय ज़ोनुम
ज़ल गव थलस सॗत्य मीलिथ क्याह"
पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)