06.10.2019

06.10.2019, ॴशिद (आश्विन) ज़ूनॖ पछॖ (शुक्ल पक्ष) ॴठम (देवादेव) (अष्टमी) आथवार (रविवार/एतवार) श्री सप्तर्षी सम्वत 5095, राश मकर (रऻच़ हॖन्ज़ॖ 9.35 बजि प्यठॖ) ऋतु हरुद (शरद)(चलान)..अज़ छि दुर्गाष्टमी
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: सोपोर्य माज़रथ
    अ: दपान सोपोरॖ ॴस्य ब्रौंह
         कालि छ़ऺरॖय माज़रथ करान
         वुठ माज़रथ
2. मु: सोरॖ रग मेलि तॖ वोरॖ रग
         मेलि नॖ
    अ: वोरॖ माजि ह्यॆकिनॖ लोलॖच
         रग ॴसिथ
3. मु: सोरुय छु दूर तॖ मरुन छु
         नऺज़दीख
    अ: मोत ह्यॆकि कुनि ति सातॖ
          यिथ
4. मु: सोरुय छु मऺल्य कथ छि
         मुफ़ॖत
    अ: कथ करनस छु नॖ कऻन्सि
         ठाख/कथ करॖन्य छि मुफ़ॖत
5. मु: सोंतॖ सुलि तॖ हरदॖ ब्रौंठॖय
    अ: वख़तॖ ब़्रुंहुय
**************************
1. आग बाग......Ways and
               means/Way out/
               Opportunity
2. आगाह...... Acquainted
               with/Informed/
               Aware/Warned
3. आगर पऺछॖन्य.... Eagle
4. आज्ञा......Permission/
              Order/Command
              Leave/Sanction
5. आगुर.....Source/Origin
                   of a river
6. आलऻयिश....Adulteration
                       Fifth/Mixed
7. आलथ......A Hindu cus-
               tom for greeting
               a person
8. आलुच़..... Laziness/
               Lethargy/Sloth/
               Inaction
9. आलव.... Summon/Call/
                   Invite
10. आम डाम........Lapse/
               False excuse/
               Forgetfulness
            Oversight/Mistake
**************************
         गीता ज्ञान  :अध्याय 17
अपोक ख्वशॖक रसॖ रॊस बदबू वोल छ़्यॊट नापाक ह्यॊदुर यि
यऺच़कोल, तामसी प्वरुशन छु
म्यूठ बासान
वॊन भगवानन गीता ज्ञान
**************************
यिथय पऻठ्य छि ॳस्य कऻशिर्य बटॖ हारॖ नवम ति मनावान। राथ वुछ असि ज़ि मऻज्य रऻज्ञन्या किथ पऻठय वऻच़ कऺशीरि मंज़ तुलमुल तॖ तमि पतॖ किथॖ पऻठ्य गऺयि ॳमिस माजि हॖन्ज़ स्थापना ब्यॊन ब्यॊन जायन कऺशीरि मंज़ तॖ यॆलि कऻशिर्य बटॖ च़ऺल्य कऺशीरि प्यठॖ 1990-तस मंज़ पनुन पान, पनुन मान बचावनॖ म्वखॖ ततिक्यन आतंकवाद्यन निशि, तॖ किथ पऻठ्य कऺरॖख माजि रऻज्ञन्यायि हॖन्ज स्थापना कऺशीरि न्यबर ति कॆंच़न जायन। यि गछ़ि सान्यन शुर्यन ताम कथ वातनावॖन्य ज़ि कम कम विक्षीप आयि असि कऻशिर्य बटन विज़ि विज़ि मगर असि कऺर पनॖनिस धर्मस तॖ कर्मस रऻछ सॗत्य सॗत्य तॖ यिहऻय वजह छु ज़ि कऻशुर बटॖ छु नऺविथ तॖ फॊलिथ यिमव त्रासदीयव बावऺजूद ति। यि छि अख खुशी हॖन्ज़ कथ ज़ि ॳस्य छि माजि दीवी शरण गऺछ़िथ ॳम्यसुन्द अनुग्रह मंगान रोज़ान हर हमेश चाहे स्व कुनि रूपस मंज़ छि असि सॗत्य सॗत्य रूज़िथ। नव दुर्गा हॖन्द्य यिम नव द्वह छि ॳम्यसॖय माजि हॖन्द्य ॳस्य मनावान यथ मंज़ यि मऻज्य छि नव रूप दऻरिथ असि बख्तन पनॖनिस दऺलिस तल थऺविथ असि रऻछ करान। माजि हुन्द अख रूप छु शारिकायि हुन्द ति युस हारॖ नवम द्वह ॳस्य कऻशिर्य बटॖ मनावान आयि तति ति तॖ यॆति ति। कथ छि जऻरी। माजि गछ़ शर्ण, माजि प्यॆ परन, माजि शारिकाये करसऻ नमन।
**************************
"ग्वरॖ कथ हृदयस मंज़ बाग़ रऺटॖम
गंगॖ ज़लॖ नऻवॖम तन तय मन
सदेह ज़ीवन म्वक्ती प्रऻवॖम
यमॖ भय च़ॊलुम पोलुम अख"
 पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
  भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)