05.10.2019

05.10.2019 ॴशिद (आश्विन) ज़ूनॖ पछॖ (शुक्ल पक्ष) सतम (देवादेव) (सप्तमी) बटॖवार (शनिवार/शनिश्चरवार), श्री सप्तार्षि सम्वत 5095, राश धनु(चलान), ऋतु हरुद (शरद)(चलान)...नवरात्र (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: सासन डास व्वथरुन नॖ
         वगुव
    अ: बॆ-वऺतीरॖ ख़र्चावुन
2. मु: साद लऻगिथ सूद ख़ार
    अ: अन्दॖर्य अख तॖ न्यॆबॖर्य
         ब्याख/पऻपी ॴसिथ साद
         लागुन
3. मु: सासन स्वन पिटारस
         च़ऻन्गिस नॖ तील रातस
    अ: रॊपियि मचि बऺर्य बऺर्य अमा-
         पॊज़ च़ऻन्गिस नॖ तील/महा
         कॊन्जूस
4. मु: सऻरी करान पान्यो पान्यो
         जुमॖल्यव नॖ कांह
    अ: प्रथ कऻन्सि पनॖनी फिकिर
          तॖ कौमॖच नॖ कऻन्सि दग
5. मु: सथ बुथ्य चन्दस मंज़
    अ: बहुरूपी/यॆत्यन युथ चलि
          तत्यन त्युथ चलावुन
**************************
1. आव आव.....Expected to
                        come
2. आव जाव..Come and go/
                     Income and
            expenditure/Profit
            and loss
3. आवर्यर......Busyness
4. आवलुन..... Whirlpool
5. आवारॖ.......Vagabond/
             Tramp/Dissolute
6. आवरावुन....To cover/To
                       keep busy
7. आवरुन..... To cover/To
                       involve/To
                       mesh
8. आवारॖ गर्द.....One who
                wastes time/
                Vagabond/Dis-
                solute
9. आंचार...... Pickle
10. आंफ़.....Hope/Trust/
               Desire/Region/
               Quarter
**************************
         गीता ज्ञान  :अध्याय 17
ट्यॆठ्य, च़ॊक्य, गर्म तॖ त्रॊश आसन वऻल्य, द्वख दिवान तॖ रूग्न बडावन वऻल्य
रजस मनुश्यन यि बूज़न ठीख लगान
वॊन भगवानन गीता ज्ञान
**************************
कहावत छि ज़ि दपान ॳकिस महा यूग्यस यस नाव ओस कृष्ण कार तस सॖन्दिस स्वपनस मंज़ छि आमॖच़ मऻज्य रऻज्ञन्या तॖ वॊनॖनस ज़ि तुलॖमुलिस मंज़ कर म्यानि स्थापनायि हुन्द सन्ज़। दपान यूगी कृष्ण जीयन यॆलि माजि वॊन ज़ि तऺमिस छॆ नॖ तुलमुलिस मुतलक कॆंह ब्वयी, दपान माता रऻज्ञन्यायि वॊनुनस ज़ि सुबहऻय यी अख स्वरुफ च़्यॆ निश युस च़्यॆ तथ जायि निश वातनावीय मगर शर्त छुय ज़ि यॊत ताम नॖ च़ॖ तथ जायि ताम वातख कऻन्सि गछ़ि नॖ कानोकान ख़बर गछ़ॖन्य। यि बूज़िथ स्वपनस मंज़ दपान कृष्ण कार सऻबन कॊर माजि हॖन्ज़ि आज्ञायि पालन तॖ दॊयिमि द्वह सुबहस गव अख नाग यानि स्वरुफ प्रकट यॆमिस पतॖ पतॖ यूगी तुलमुल नागस ताम वोत। माजि रऻज्ञन्यायि हॖन्ज़ि ह्वकमॖ हिसा़बॖ कऺर कृष्णॖ जीयन अथ नागस मंज़ माजि हॖन्ज़ स्थापना। चूंकि यि दर्शुन माताय हुन्द छु सपद्योमुत कृष्ण जियस ज़्यॆठ ज़ूनॖ पछॖ ॴठम दुहुय तवॖ म्वखॖ छु यि द्वह यिवान मनावनॖ बडॖ चावॖ सान तॖ भक्ति भावॖ सान। अमि पतॖ दपान आमॖच़ छि माजि हॖन्दि नावॖ, कॊलॖगाम(खनबरन्यन), मंज़गामि, लोगरीपोरॖ (पऺहलगामॖ), टिकरॖ (कॊपवारि) दीवीबल नावॖ, वर्मुलि मंगला तीर्थॖ नावॖ  तॖ व्यॆजिब्रारि जयाभगवती नावॖ वगैरा वगैरा जायन स्थापना करनॖ। यिथपऻठ्य दपान रऻज्ञन्या हॖन्ज़ स्थापना छि सपदेमॖच़ कऺशीरि मंज़। कऻशिर्य बटन यॆलि च़लुन प्यव कऺशीरि प्यठॖ 1990-तस मंज़ तॖ आयि छऺकॖरावनॖ होरॖ योर जायन। तिमव कऺर पनॖनि पनॖनि आयि माजि रऻज्ञन्या हॖन्ज़ स्थापना कऺशीरि न्यबर कॆंच़न जायन, ज्यॆमिस मंज़, दिल्लि मंज़, ग़ाज़ियाबादस मंज़ वगैरा वगैरा तॖ नाग आयि बनावनॖ तमी आयि तॖ त्रायि यिथ पऻठ्य तुलमुल (क्षीर भवऻनी) कऺशीरि मंज़ छु। मेलॖ छु यिमन जायन ति लगान अज़कल प्रथ रयतॖ प्रथ ज़ूनॖ पछॖ ॴठम द्वह। मगर कऺशीरि तुलॖमुलि तथ मेलस ओस पनुनुय अख अलग चिकॖ चाव।
**************************
 "दॊब्य यॆलि छऻवनस दॊब्य-कनि प्यठॖय
सज़ तॖ साबन मऺछ़नम यऺच़ॖय
सॖच़्य यॆलि फिरनम हनि हनि कऻच़्यॖ
अदॖ ललि म्यॆ प्रऻवॖम परम गथ"
 पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)