04.10.2019

04.10.2019 ॴशिद (आश्विन) ज़ूनॖ पछॖ (शुक्ल पक्ष) शॆयम (देवादेव)(षऺष्टी) शॊकुरवार (शुक्रवार जुम्मा),श्री सप्तर्षी सम्वत 5095, राश धनु(दुहचि 12.18 बजि प्यठॖ)ऋतु हरुद (शरद) (चलान)
*************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: सिरस सर पोश
    अ: राज़ परदस तल थवुन
2. मु: सऺर्य प्यॆठ सऺहलाबॖ
    अ: बे अंदाज़ॖ ज़्यादती
3. मु: सुलि हॖन्द्य गुल्य मीठ्य
    अ: हॊछी हमदर्दी/छ्यॆनी
         नालमऺत्य
4. मु: सॊनि हॖन्ज़ प्वन्द
    अ: हंगॖ मंगॖ कॖठ कडॖन्य
5. मु: सूरस मंज़ सॖच़न
    अ: यिनॖ आसऻनी सान अथि
         प्यॆयि
**************************
1. आव गव......Visits/Com-
                    ing of visitors
2. आवुर.......Busy/Engaged
                    in some work
3. आहन बा.....Yes/O K
4. आयसतान....Upper top of
                        head
5. आयन्दॖ.....In future/Next
                   Again/Subse-
                   quent
6. आयुत......Available
7. आयतन....To make avail-
                      able
8. आयि....Came/Manner/
              Way/Kind/Verses
              of Quran/Aim at
9. आंकार...... Affirmation/
                      Acceptance
10. आनन्द.....Pleasure/Joy
                   Delight/Gaiety
**************************
         गीता ज्ञान :अध्याय 17
आय अकॖल बल सॆहत बडावन वऻल्य, रऺसिल्य, पिशिल्य, दर्रॆर थवन वऻल्य, यि ख्यन सात्विक
प्वरुशन टोठ आसान
वॊन भगवानन गीता ज्ञान
**************************
यॊदवय कऻशिर्य बटॖ शिव उपासक छि यिवान मानॖनॖ, बाकय त्यॊहार ति छि बटॖ जोश-खरोश सान मनावान रोज़ान। कॆंह ख़ास फाकॖ तॖ त्यॊहार छि कऻशिरिस बटस अलगॖय अख पनॖन्य पहचान दिवान आमॖच़ सऺदियव प्यठॖ। प्रथ रयतकि जूनॖ पछॖ ॴठम छि कऻशिर्य बटॖ अख ख़ास द्वह मानान तॖ अमि द्वह मामस ख्यनस हिरासॖ करान। फाकॖ थवान। वनॖनॖ छु यिवान ज़ि रऻज्ञन्या दीवी (क्षीर भवऻनी) तुलॖमुलिच छि ॴठम द्वह प्रकट सपज़ॖमॖच़। कऻशिर्य पंड्यतन छि ज़गद्अम्बा क्षीर भवऻनी स्यॆद्धदात्री, शरणागतवत्सलॖ, इहलूक तॖ परलूक सम्बालॖन वाज्यन आदिशक्ती यिवान मानॖनॖ। ज़्यॆठॖ ज़ूनॖ पछॖ ॴठम द्वह छु माताय क्षीर भवऻनी हुन्द वॊहरवॊद यिवान मनावनॖ तॖ ॳम्यसॖन्दि नावॖ छि बाकय रयतन हॖन्ज़ॖ ॴठम द्वह फाकॖ ति यिवान थवनॖ। कऺशीरि तुलमुलि ओस वक्तॖ अकि अमि द्वह बॊड बारॖ मेलॖ लगान।अख मान्यता छि ज़ि ज़गतजननी महा रऻज्ञन्याय हुन्द पूर्वॖ निवास छु ओसमुत लंकायि मंज़। दपान हनुमान जीयनिस आग्रह करनस प्यठ छु मातायि कऺशीरि कुन इशारॖ कॊरमुत। कऺशीरि यिथ दपान मातायि ॴस पनॖन जाय छ़ऻन्डमॖच़ कति ताम बडगाम्यकिस रऻयथन गामस मंज़। अमि ब्रौंहकुन कथा ज़ि जऻरी यथ प्यठ प्रकाश पगाह त्रावव
**************************
"लल बॖ द्रायस कपसि पोशॖचि सऺच़ॖय
कऻड्य तॖ दून्य कऺरनम यऺच़ॖय लय
तॖयि यॆलि खारिनम ज़ऻविज तॖये
वोवॖर्य वानॖ गऺयम अलऻन्ज़ॖय लथ"
 पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
   भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)