02.04.2019

02.04.2019, च़ित्थॖर (चैत्र) गटॖ पछॖ (कृष्ण पक्ष) बाह (द्वादशी), बॊम्वार (मंगलवार), श्री सप्तार्षि सम्वत 5094, राश कुम्भ (चलान), ऋतु बसन्त (चलान), द्रठॖपऻन्च़ुक (पंचक) चलान...बऻश्य हुन्द वॊहरवोद यी अज़
**********************
नमस्कार माहरा त्वहि सारिनी म्योन।त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: नाटॖ गऺन्ज़रिथ रस
         मीनिथ
    अ: यॆति प्रथ कांह चीज़
         हदस मंज़ आसि
2. मु: नाटि-फॊल छु नफ़सुख
         बेमॖ
    अ: म्यूठ चीज़ छु प्रथ
         कऻन्सि टोठ
3. मु: नादानस नऺसीह्यथ
         करॖन्य गऺयि पंज़्यन नून
         द्युन
    अ: बेवॖकूफ़स छॆ नॖ नसी-
          ह्यथ व्यपान
4. मु: नानि रॊस शुर गव
          पानि रॊस दानि
    अ: नान्य छि शुरिस रछनॖ
         खऻतरॖ तिछ़ॖय ज़ॊरूरी
         युथ दान्यस पोन्य
5. मु: नाफऺहम गव सु यस
         नाफऺहमस सॗत्य कऻम
         गछ़ि
   अ: नाफऺहमस सॗत्य करुन
       गव नादऻनी हुन्द निशानॖ
**********************
1. तबाह.... Destruction/
          Ruined/Destroy-
      ed/Wasted/Spoil-
      ed
2. तबाबथ.... Treatment
3. तबॖर....A small axe/
               Battle-axe
4. तबरदार.... Wood cutt-
               er/One who
               cuts wood
5. तबलॖ....A musical
                 drum
6. तबादुल... Transfer/
                    Exchange
7. ताशवान...Prostitution
8. तावन...... Plague/An
                    abuse
9. तावनज़द...Plagued
             man/An abuse
10. तावॖहॊत...Draughtful
                 Dry with heat
**********************
      गीता ज्ञान :अध्याय-11
        श्री भगवान वनान
भगवान वनान वुन्यक्यन छुस
महाकाल, लूख नाश करनुक आम ख़याल।
च्यानि य्यॊद न करनॖ बचि नॖ कांह च़ॖ ज़ान।
वॊन भगवानन गीता ज्ञान
**********************
वैयकुण्ठ मंडली फऺरीदाबाद छु बन्योमुत अख व्हाटसाप ग्रुप यॆमुक बॖति अख सदस्य छुस। पऺतिमि बटॖवारि यानि त्रॖहमि मार्च म्यूल म्यॆ मोकॖ यमि मंडलिक्यन कॆंच़न सदस्यन सॗत्य मुलाक़ात करनुक। यिम छि करान रोज़ान मंज़्य मंज़्य भजन कीर्तन तॖ तऺथ्य सिलसिलस मंज़ ओस अमि मंडली थोवमुत प्रोग्राम शारिका भवनॖ फ़रीदाबादॖ यथ मंज़ म्यॆति शिरकत कऺर। बडॖ मज़ॖ आव अथ कीर्तनस मंज़। फ़रीदाबादॖस मंज़ रोज़न वऻल्य कॆंह कऻशिर्य बटॖ ज़नानॖ, मर्द लऺडकॖ कोरि गऺयि म्यॆ नज़रि अथ प्रोग्रामस मंज़। खास कथ ॴस्य यि ज़ि ॳक्य गरन ओस पनॖनिस नवज़ात शुर्यसुन्द ग्वडन्युक वॊहरवोद मनावनुक ति प्रोग्राय थोवमुत तॖ ॴसॖख शामॖचॖ  ख्यनॖ-च्यनिच व्यवस्था ति कऺरमॖच़। अमि म्वखॖ आव ज़्यादय आनन्द।चूंकि म्यॆ ओस वातुन गुडगांव ति यिथिसॖय ॳकिस भजन कीर्तन प्रोग्रामस मंज़ अमि म्वखॖ द्रास बॖ हना जलदॖय पाहन मगर द्रास नवीद कऺरिथ। ब्यॊन ब्यॊन जायन ह्यच़न व्वंय यिछ़ॖ मंडली नज़रि गछ़ॖन्य यि छि अख रॖच़ कथ।मगर यिमन मंडलीयन मंज़ यॊदवय सऻन्य शुर्य ह्यकन शमूहलियत कऺरिथ सु रोज़ि स्यठाह जान ताकि तिमन ति मेलि मोकॖ रलनुक मेलनुक तॖ धर्म-कर्म करनुक युस तिहिन्द्यन संस्कारन रऻछ करनस मंज़ मद्दगार सऻबित सपदि। कथ छि जऻरी
**********************
"नमामि सर्वभूतानां वरदात्रि हरिप्रिये। मा गतिस्त्वत्प्रपन्नां सा मे भूयात्त्वदर्चनात्।।"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
 नऺविव तॖ फॊलिव
   भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)