10.04.2019

10.04.2019, च़ित्थॖर (चैत्र) ज़ूनॖ पछॖ (शुक्ल पक्ष), पऻन्च़म (पन्चमी) ब्वदवार (बुधवार)श्री सप्तार्षि सम्वत 5095, राश मिथुन (रऻच़ हॖन्ज़ॖ 10.31 बजि प्यठॖ), ऋतु बसन्त (चलान)...अज़ छि कॊमारॖ शॆयम ति
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: माजि कऺर दन्दॖ तुज्य
         शुर्यव ख्यव गासॖ बॊद
    अ: बे-सोच नकॖल करुन
         ज़िठ्यन
2. मु: माजि नय बतॖ मंगव
         स्व ति दी नॖ पानय
    अ: कूशिश करनॖ बगऻर छॆ
          नॖ कांह कथ या कऻम
          बनान
3. मु: माजि मासि तॖ कोरि
         कुस कासि
    अ: कांह खानदऻन्य ॴब
         या कमज़ूरी
4. मु: माजि ल्यख, ब्यॆनि
        ल्यख मगर कॊल्यि
        ल्यख नॖ
   अ: ज़नानॖ सारिवॖय ख्वतॖ
        टऻठ आसॖन्य
5. मु: माजि हुन्द दोद
    अ: असलियत ज़ानॖन्य
**********************
1. त्राम.... Copper
2. त्राव....Leave/To give
              up
3. त्रठ....Thundering
              bolt
4. त्रावुन...To let go/To
                leave
5. त्रावनावुन....Cause to
           liberate/Cause
           to set free
6. त्रच़ुन....Fear/To get
           bored/Be dis-
           turbed
7. त्रऺच़रावुन....Cause to
           fear/Cause to
           be disturbed
8. त्रुकुन.....To cut to
           pieces/To cut
           with teeth
9. त्रॊम्बुन....To prick/
                  Inoculate
10. त्रॊश... Crisp
**********************
       गीता ज्ञान  :अध्याय-11
ही आदि दीव च़ॖ पुरातन प्वरुश छुख, परम दाम ब्यॆयि आदार ज़गतुक
ज़गतस व्याप्त ज़रॖ ज़रस आसान
वॊन भगवानन गीता ज्ञान
**********************
व्हाटसापन तुल व्वथवार च़्वपऻर्य। यि कॆंहछ़ा परॖ ओसुस सु कॊरनस पूरॖ फेसबुकन तॖ टॖविटरन। शुर्यव प्यठॖ बुज़र्गन ताम आमुत छु मोबायलुक सऺहलाब। कम कम त्वतमॖ छि गछ़ान मॊबायलॖ दऺस्य। जान ति तॖ नाकारॖ ति। परेशान छु ॳज़्युक इन्सान गछ़ान अगर नॖ मोबायल मेल्यस दऺस्ती यानि छ़्यनॖ गछ़ि नॖ गछ़ुन। बोज़ान ओसुस ज़ि महाशया अख ओस ॳकिस लिफटस मंज़ तॖ गछ़ुन ओसुस शुरहऻमिस पोरस प्यठ।मोबायलस सॗत्य रूद साहब व्यस्त यूत ज़ि यि गव नीरिथ लिफ्टॖ मंज़ॖ पंदहऻमिसॖय पोरस प्यठ तॖ कऺरॖन ब्यल ॳकिस फ्लैटस। फलैटिच मऻल्यक्यन ॴस मोबायलस प्यठ कस ताम सॗत्य कथ करान तॖ इशारॖ सॗत्य वॊनुन पनॖनि दायि दरवाज़ॖ मुच़रावुन। यि नफ़र च़ाव अन्दर तॖ ब्यूठ सोफस प्यठ। दायि ऒन त्रॆशि गिलासॖ तॖ दितुन ॳमिस पऺछ़िस। अमि फलैटचि मऻल्यक्यनि छु ख़याल ज़ि तम्यसुन्द रून आव ति क्याज़ि तमिस ति ओस यिहॊय वख़त यिनुक तॖ तमि ज़ोन मसऻवी तॖ रूज़ मोबायलस सॗत्य मस्त न्यबर वरनडाहस प्यठ कऺमिस ताम सॗत्य कथॖ करनस मंज़। आमुत नफ़र ति छु मोबायलस प्यठ कऺमिसताम सॗत्य कथॖ करान तॖ प्रारान कांह यी तॖ हय हैलो करि। ॳमिस छु नॖ ख़यालॖय ज़ि यि मा च़ाव ग़लत फ्लैट्स। यीतिस कालस मंज़ आव ॳमिस मऻल्यक्यनि हुन्द खान्दार ति तॖ यिति छु मोबायलस प्यठ कऺमिस ताम सॗत्य कथ करनस मंज़ मश्गूल। याम यि अन्दर च़ावॖय योत यि द्राव वापस न्यबर यि ज़ऻनिथ ज़ि शायद च़ास बॖ ग़लत फ्लैटस। वजह गव यि ज़ि ब्यल याम ॳम्य ह्यॆच़ बजावॖन्य ॳम्य वुछ दरवाज़ॖ यलय ति क्याज़ि प्वछ़ ओस अंदरॖ बिहिथ। ॳमिस गऺयि राय ज़ि यि च़ाव ग़लत फ्लैटस। यीतिस कालस आयि मऻल्यक्यन ति नफ़र वुछुन अजनऺबी। यिनॖ वोल नफ़र ति गव छितॖ यि वुछिथ ज़ि यि छु नॖ सु यॆमिस निश तऺमिस गछ़ुन ओस। यि छु मोबायलुक असर। कथ छि जऻरी
**********************
"सर्वमंगलमंगल्ये शिवे सर्वार्थसाधिके। शरण्ये त्र्यम्बके गौरि नारायणि नमोsस्तु ते।।"
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
   नऺविव तॖ फॊलिव
    भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)