13.04.2019

13.04.2019, च़ित्थॖर (चैत्र)ज़ूनॖ पछॖ (शुक्ल पक्ष) ॴठम (अष्टमी) बटॖवार (शनिवार/शनिश्चरवार), श्री सप्तार्षि सम्वत 5095, राश कर्कट (चलान), ऋतु बसन्त (चलान)..अज़ छि दुर्गा अष्टमी तॖ रामॖ नवमी ति
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: लीखित गव ज़ि
         हॊखिथ गव
    अ: यि तहरीरस मंज़ आव
      तथ नॖ पतॖ क़लम च़ानुन/
       तहरीर मिटावुन छु
       मुश्किल
2. मु: लेखॖ बॖ तॖ परि ख्वदा
    अ: तथ तहरीरस मुतलक
         यिवान वनॖनॖ युस नॖ
      ब्यॆयि कांह पऺरिथॖय ह्यॆकि
3. मु: लॆजि ति च़ूरॖय गजि ति
         च़ूरॖय
   अ: यॆलि सऻरी बेईमान
        आसन
4. मु: ल्यॆकी तुलुन तॖ ल्यॆकी
         बॆहनावुन
    अ: कऻन्सि प्रथ विज़ि
         बेज़ती करॖन्य
5. मु: ल्यख छा थ्वख ज़ि
        लऻरिथ गछ़ि
    अ: ल्यॆकि क्याह खोच़ुन/
        बद-कामि छॆ नॖ वज़न-
        दार आसान
**********************
1. तस....To him/To her
2. तास.... Playing cards
3. तसला...Satisfaction
                Consolation
4. तसुन्द...His/Her
5. तसकीन....Consola-
           tion/Satisfac-
           tion/Appeas-
           ment/Soothing/
         Pacification/Rest
6. तसलीम....Concede/
                   Surrender/
                 Acceptance
7. तसलॖ...Cup shapped
             vessel/A shal-
             low pan
8. तशरीफ़ अनुन.....To
                              come
9. तशरीफ़ न्युन... To
            leave/Go away
10. तशनॖ.....Thirsty/In
            desire/Keen/
            Eager
**********************
       गीता ज्ञान :अध्याय-11
प्रबाव नॖ ज़ऻनिथ छुसथ मॆथॖर मानान, ही कृष्ण यादव वनान
लोलॖ सान
सोंचन समजनॖ बगऻर क्या क्या वनान, वॊन भगवानन गीता ज्ञान
**********************
यि ज़ऻनिथ ति ज़ि मरुन छु प्रथ ॳकिस। कऻन्सि ब्रौंठ तॖ कऻन्सि पथ। मऺरिथ अज़ ताम पानस सॗत्य ह्यॊक नॖ कांह कॆंह निथ। यि कॆंछ़ा सारीय वऻन्सि हऻसिल कॊरुन ति रूदुस यॆती। मगर यि ज़ऻनिथ ति छुस तमाह, लालॖच, तॆह, अहम्, मोह, तऺपिश कमावनॖच, सम्पति सोम्बरावनॖच, यि प्रावनॖ बापथ कम कम छ़ल त छ़्वम्बॖ छु करान रोज़ान यि इन्सान। पोज़ अपुज़ वऺन्य वऺन्य छु दम दम कडान। ॳथ्य दवि तॖ दोरि मंज़ कऻत्यहान सॗत्य व्वथान बॆहान, असान गिन्दान, लडायि च़ुवान जगडॖ करान, मार दाड करान रोज़ान। हालांकि ॳमिस इन्सानस छु अख ख़ौफ़ सॗत्य ज़ि मऺरिथ छि ज़ॖय वतॖ मेलान यानि जन्नत माने स्वर्ग तॖ जाहनम माने नरक।
यि डर, यि खौफ़, यि भय छु इन्सानस नॊमरावान कुनि हदस ताम तॖ द्यमागस मंज़ छुस याद रोज़ान ज़ि जान कामि करनॖ सॗत्य छु स्वर्ग मेलान तॖ नाकारॖ कामि करनॖ सॗत्य छु नरक मेलान।कॆंह छि नादान बऺनिथ यि कथ मऺशरावान तॖ ॳछ ज़ॖ वऺटिथ गन्दॖ कामि करान रोज़ान। मेलान कऺमिस क्याह छु यि ज़ानि भगवान मगर यॆति यीतिस कालस ज़िन्दॖ छु यि इन्सान, तीतिस कालस पज़ि ॳमिस हर हमेशॖ रुत करुन, रुत सोंचुन, रॖच़ वथ हावॖन्य, रॖत्य व्यच़ार थवॖन्य, प्रथ कऻन्सि रुत कान्छ़ुन। तऺमिस मेलि रुत फल ज़िन्दॖ ज़ुवस ति तॖ मरनॖ पतॖ ति। यी छु रॆश्यव मुनियव अज़मोवमुत परखोवमुत तॖ सानि बापथ वॊनुमुत। यि छु असि पानस ताम व्वंय ज़ि ॳस्य क्वस हिश वथ रटव यानि स्वर्गॖच किनॖ नरकॖच।
**********************
"दुर्गे स्मृता हरसि भीतिमशेषजन्तो: स्वस्थै: स्मृता मतिमतीव शुभां ददासि।दारिद्र्यदु:खभयहारिणि का त्वदन्या सर्वोपकारकारणाय सदार्द्रचित्ता।।"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
 नऺविव तॖ फॊलिव
  भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)