22.04.2019

22.04.2019, वह्यक (वैशाख) गटॖ पछॖ (कृष्ण पक्ष) त्रय (तृतीय) च़ऺन्दॖरवार(सोमवार),श्री सप्तार्षि सम्वत 5095, राश वृश्चिक (चलान), ऋतु बसन्त (चलान)...अज़ छि संकट च़ोरम (संकट निवारण चतुर्थी)..
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: गोंछ़ि मथुन सोंम्ब
    अ: स्यठाह कम
2. मु: गॊसऻन्य त्वमुल
    अ: वारियाह कॖस्मॖ ख्यनॖ
         चीज़न हुन्द रलॖ
3. मु: गॊसऻन्य गऺडवॖ
    अ: बेछवुन
4. मु: ग्वलाबॖ तॗर
    अ: सौंतॖ कालॖच तॗर/
          मोमूली सर्दी
5. मु: ग्यॆलि ग्यॆलि छि कांह
         ग्यल स्यॆज़ गछ़ान
    अ: लगातार कूशिश करनॖ
         सॗत्य छु स्यज़र गछ़ान
**********************
1. तन....Body
2. तनाव...Tension
3. तिम....They
4. तनि-तनहा...All alone/
              All by oneself
5. तमाह.... Greediness/
            Temptation/
            Inducement
6. तमना...Wish/Desire/
                Longing
7. तुम्बकनऻर...A musical
                   Instrument
8. तमगॖ....Medal
9. तम्बलुन...To be rest-
           less/Impatient/
           Hasty
10. तम्बलावुन...To tempt
                       To attract
**********************
       गीता ज्ञान :अध्याय-11
यि म्यऻन्य यूगॖ शक्ती तॖ परम दाम, च़्यॆ सिवाय वुछ नॖ कऻन्सि अज़ताम
आदि अंतॖ रॊस म्योन रूप महान
वॊन भगवानन गीता ज्ञान
**********************
म्यॆ छु बासान ज़ि व्वंय गव सान्यन संस्थायन तसलाह मर्दन दऺस्य कऻम करनऻव्य करनऻव्य तॖ प्यॊख ख़याल ज़ि क्याज़ि थवोख नॖ ज़नानॖ ति पानस सॗत्य सॗत्य या पानस ब्रौंठ ब्रौंठ युथ तिम ति ह्यकन पनॖनि समाजिक्यन मसलन हल छ़ऻन्डिथ। हालांकि वुन्यखताम आव यि नज़रि ज़ि प्रथ संस्थायि मंज़ छि ज़नानॖ थॊद वऺथ्य वऺथ्य समाजिच सीवा करान रोज़ान अल्बतॖ यिमन छॆ नॖ कांह पदवी आमॖच़ दिनॖ माने काह ख़ास ज़िम्वऻरी आमॖच़ दिनॖ ॳकिस द्वन संस्थायन रॊस। यि छु अख जान व्यच़ार। ज़नानॖ यॆलि गरॖ गृहस्ती ह्यकन चलऻविथ, संस्थायि क्याज़ि ह्यकन नॖ चलऻविथ। बऺल्कि अथ ख़यालस पज़िहे वारियाह ब्रौंठ अमली जामॖ छ़ॖनॖनॖ आमुत। खऻर, देर आयद दुरुस्त आयद। यॆति यिम त्रॖह वऺरी कऺड्य मर्दन हॖन्दिस राज्यस मंज़, ब्यॆयि त्रॖह वऺरी कडव ज़नानॖ ब्वदि तल द्यवॖ कुनि अंदस लगव। ब्यॆयि पज़ि सानि समाजिक्यन युवा पीढी कमर कऺसिथ संस्थायन हॗन्ज़ लाकम पनॖन्यन अथन मंज़ रटॖन्य तॖ पनॖन्य जवान ख़यालव सॗत्य मसलन हल छ़ान्डुन। ब्रौंठ ब्रौंठ पकुन तॖ पनॖनिस समाजस वथ हावॖन्य। कॆंह मसलॖ छि तिम ति यॆत्यन तिमनॖय छु सख़ फऻसलॖ करॖन्य ति ज़न गव ज़ि ज़ऻच़ न्यबर खान्दर न करुन, शुर्य कम से कम त्रॆ या च़ोर आसॖन्य, वुहि प्यठॖ पॖन्च़ॖह वुहरिस अंदर अंदर खान्दर करुन, मोल मऻज्य कुनी ज़ऺन्य त्रऻविथ व्यलायत गछ़नुख ख़याल मऺशरावुन, रॗनिस ज़नानि हॖन्द्य तनाज़ॖ अदालतन न्यॆबरय अंज़रावॖन्य वगैरा वगैरा। युवा पीढ्यहॖन्ज़ ज़िम्वऻरी छि बनान ज़ि तिम वातन यिमन मसलन कूनि न तॖ कुनि तरीकॖ।
**********************
"नागेन्द्रहाराय त्रिलोचनाय भस्मान्गरागाय। देवाधिदेवाय दिगम्बराय तस्मै नकाराय नम: शिवाय।।"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
   नऺविव तॖ फॊलिव
    भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)