03.04.2019

03.04.2019, च़ित्थॖर (चैत्र) गटॖ पछॖ (कृष्ण पक्ष), त्रुवाह (त्रयोदशी) ब्वदवार (बुधवार),श्री सप्तार्षि सम्वत 5094, राश मीन (रऻच़ हॖन्ज़ॖ 8.47 बजि प्यठॖ) ऋतु बसन्त (चलान)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: मीठ प्वन्द तॖ ज़ीठ
         वुम्बॖर
    अ: रॖच़रॖक्य अलामथ/
         जऻनियर आसनुक
         ॴशिर्वाद
2.मु: मॆतरो शॊतुर मूद मॆतरस
        ति छु मरुन
   अ: मौत छु अटल/प्रथ
       कऻन्सि छु पतॖ ब्रौंह मरुन
3. मु: म्यूठ गामस क्रूठ पानस
    अ: सख़्ती पानस वऻतिथ
         ब्यॆयिस आराम द्युन
4. मु: म्योन ॴसिथ चोन गव
    अ: हमहऺस्ती हावॖन्य
5. मु: म्यॆच़ हय तुलख स्वन
         गऺछ़्यनय
    अ: दय कऺर्यनय हमेशि रुत
**********************
1. ताल....Rhythm/Tune
         Musical measure
2. तालाब...Pond/Pool/
                 Tank
3. तालरज़...An orna-
           ment/ used by
           Hindu women
4. तबखमाज़....A variety
           of cooked meat
5. तबॖच....A big pot
6. तबसुर..Commentary
7. तबसुर करुन....To re-
           view/To analyze
8. तबलीग़ करुन...To do
         missionary work/
         To preach/To
         spread or propa-
         gate views
9. तपऻल्य..Tuberculosis
10. तपऻर्य...On that side
**********************
       गीता ज्ञान :अध्याय-11
लॆहज़ा च़ॖ य्वद कऺरिथ यश कर प्राप्त, राज ज़ेन दुशमन करुख समाप्थ।
बहानॖ बन हऺरीमॖत्य छिम तिहॖन्द्य प्राण
वॊन भगवानन गीता ज्ञान
*********************
यिथय पऻठ्य छु गुडगांवस मंज़ रोज़न वाल्यव कॆंच़व लूकव अख ग्रुप तयार कऺरमुत यथ नाव छु आमुत दिनॖ "कथ बात तॖ ब्यॆयि कयाह"। अथ ग्रुपस मंज़ छि सऻरी यानि ल्वकॖट्य बऺड्य मर्द ज़नानॖ शिरकत करान प्रथ बटवारि शामन शामन ब्यॊन ब्यॊन गरन मंज़ ॳकिस जगराता किस रूपस मंज़ तॖ करान भजन कीर्तन। सॗत्य सॗत्य छि अथ ग्रुपस मंज़ अध्यात्मॖचि कथॖ ति यिवान करनॖ तॖ पनॖन्य संस्कृति ज़ानॖनॖच कूशिश यिवान करनॖ। कीर्तन यथ गरस मंज़ करान छि तऺथ्य गरस मंज़ छि नऺवीद ति करान तॖ अदॖ छि गछ़ान पनॖन्यन पनॖन्यन गरन कुन। ॳम्य ग्रुपन छु हऻलॖय हाल अख खलवख जायि ति छ़ऻन्डमॖच़ य्वस गाटा गामस मंज़ छि। अति छि अख गौशाला ति। यिमन गावन छि रछान अमि गामॖक्य लूख तॖ कथ बात तॖ ब्यॆयि क्या ग्रुपॖक्य सदस्य ति छि यिमन गऻवन रछनस मंज़ मदद करान रोज़ान। अति आव अख ल्वकुट मन्दर ति बनावनॖ तॖ ब्यॆयि बनऻवॖख बिहिन सोम्ब जाय यॆत्यन भजन कीर्तन यिवान छु करनॖ। म्यॆति कऺर शमूहलियत अथ कीर्तनस मंज़ ऊतरॖ त्रॖहमि मार्च यॆलि बॖ फ़रीदाबादॖ प्यठॖ आस तॖ रूद रऻत्य रातस प्रोग्राम चलान। यथ प्रोग्रामस मंज़ ग्यॆव्य बऻथ ल्वक्ट्यव ल्वक्ट्यव शुर्यॆव तॖ बड्यव। राथ खऻरॖख रथि। असुना गिन्दुना ति कॊर। ख्यनॖच च्यनॖच व्यवस्था ति ॴस आमॖच करनॖ स्यठाह जान पऻठ्य। रऻत्य रातस चलेयि चाया वाया ति।  सुबहस ताम रूद प्रोग्राम चलवुन। कथ छि जऻरी
**********************
"विश्वरूपस्य भार्यासि पद्मेपद्मामालये शुभे।
सर्वत: पाहि मां देवि महालक्ष्मि नमोsस्तुते।।"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
 नऺविव तॖ फॊलिव
   भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)