19.04.2019

19.04.2019, च़ित्थॖर (चैत्र) ज़ूनॖ पछॖ (शुक्ल पक्ष) पुनिम (पूर्णिमा), शॊकुरवार (शुक्रवार/जुम्मा),श्री सप्तार्षि सम्वत 5095, राश तुला (सुबहॖचि 8.25 बजि प्यठॖ) ऋतु बसन्त (चलान)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: लाम लगॖन्य
    अ: लऻन लगॖन्य/अख
         ॳकिस पतय कुनि
         जायि दवुन प्यॊन
2. मु: लरि तल नॖ वगुव ति
         रोज़ुन
    अ: स्यठाह ग़ुर्बत प्यॆन्य
3. मु: लऻर्य किन्य लोहूर
    अ: ज़्यॆछर द्युन/वथ तॖ
          कथ ज़्यॆठॖरावॖन्य
4. मु: लाख लाख निन्य तॖ
         बाख बाख दिन्य
    अ: नी नी ति बारव दिन्य/
         ॴसिथ बऺसिथ ति ना
         शुकरऻनी करॖन्य
5. मु: लऻर कमव ख्यॆयि?
         परद्यव। म्यॆ दॊप पनॖ-
         न्यव मा
    अ: पनॖनिसुन्द जानियर नॖ
          ज़रुन/पनॖनिस फऻयदॖ
          नॖ वातॖनावुन
**********************
1. तिख....Piece
2. तगुन..To know/Make
              possible
3. तग.....Row/Line
4. तिगडम....Fraud/
               Mischievous/
               Trick
5. तल.....,Under/Fry
6. तोल.....To weigh
7. तुल..... Mulberry/
                Pick up
8. तलुन....To fry
9. तलनावुन....To get
                       fried
10. तुलुन......To pick up
                     To lift
**********************
      गीता ज्ञान :अध्याय-11
अज़ वुछिथ यि अजब रूप च्योन, खोफ़ॖ सॗत्य व्याकुल गव मन म्योन।
चॊतुर ब्वज़ रूप छुसथ वुछुन
यछ़ान
वॊन भगवानन गीता ज्ञान
**********************
कथ कथ कथि दिमव वाठ। यपऻर्य वुछान छुस छि तपऻर्य क्रॖहिन्य काव।क्रुहुन यि ऒबरा कपऻर्य सना आव। ऊतरॖ ओसुस बॖ जंत्री वुछान तॖ नन्योम ज़ि ओंकार नाथ जीनि जंत्री मंज़ ॴस नॖ सिंह राश आमॖच़ हावनय। हेरथ छि युहुस ति ब्यॊन ब्यॊन तिथियन प्यठ आमॖच़ हावनॖ। कॆंह मंत्र ति छि कॆंच़न किताबन मंज़ ब्यॊन ब्यॊन आमॖत्य हावनॖ। यिमन कथन छु नॖ सऻनिस समाजस मंज़ कांह गोर करनवोल नज़र यिवान। ॳस्य हय परव तॖ परव क्या। म्यॆ करेयो मोबायलॖ दऺस्य ज्ञान-अंताक्षरी गिन्दॖनुक प्रोग्राम शुरु। गीता जी मंज़ॖ ॴस्य कॆंह श्वलूक छ़ान्डॖन्य तॖ नन्योम ज़ि सानि गीता जी मंज़ॖ ति छि गडबडी ति ज़न गव ज़ि अध्याय च़ूरिमि मंज़ छि कुल दॊयतऻजी श्वलूक। मगर फोन आव म्यॆ गुरुग्रामॖ प्यठॖ ज़ि ॳकिस गीतायि मंज़ छि सिरिफ चतजी श्वलूक आमॖत्य हावॖनॖ। ज़ॖ श्वलूक छि तऺमिसॖन्ज़ि गीता जी मंज़ॖ गऻबॖय। माने य्यॊस हिन्दु धर्मॖच अख ज़ऻन्यमॖच़ तॖ मऻन्यमॖच़ किताब छि भगवद् गीता तमिक श्वलूक ति छि नॖ पूरॖ मेल ख्यवान। दपान छि भगवद् गीतायि मंज़ छि कुल मिलऻविथ सथ हथ श्वलूक। म्यॆ बूज़ अज़ ज़ि ॳकिस गीतायि मंज़ छि शॆ हथ तॖ अरनमतय श्वलूक तॖ ब्यॆयिस ॳक्यसुन्द फ़ोन आव म्यॆ ज़ि तऺमिस छि गीतायि मंज़ सथ हथ तॖ अख श्वलूक। यॆहय ग्रन्दि-फ्युर छु मह्मिनापारस ति। अड्यन छि दॊयत्री तॖ अड्यन छि शॆयत्रॖह। कुस करि सान्यन किताबन सऺही? अगर यि ग्रन्ज़-फ्युर ब्यॆयन ज़ऻच़ हॖन्ज़न किताबन मंज़ आसिहे, तलातुम आसिहे आमुत तुलमुत। मगर ॳस्य छि पकान तॖ पकनावान नाव कस ताम हवालॖ कऺरिथ तॖ दिवान हॊछय क्रकॖ यड बऺरिथ
**********************